اقتوبە وبلىسىنىڭ پروكۋرورى حاليدۋللا داۋەشوۆ قىزمەتىنەن بوساتىلدى, دەپ حابارلايدى Egemen.kz باس پروكۋراتۋرانىڭ ءباسپاسوز قىزمەتىنە سىلتەمە جاساپ.
«قازاقستان رەسپۋبليكاسى پرەزيدەنتىنىڭ كەلىسىمى نەگىزىندە باس پروكۋروردىڭ 2024 جىلعى 18 قاراشاداعى بۇيرىعىمەن 3-سىنىپتى مەملەكەتتىك ادىلەت كەڭەسشىسى حاليدوللا زينوللا ۇلى داۋەشوۆ اقتوبە وبلىسىنىڭ پروكۋرورى لاۋازىمىنان قىزمەتتى وتكەرۋدىڭ شەكتى جاسىنا جەتۋىنە بايلانىستى بوساتىلدى», دەلىنگەن مالىمدەمەدە.
ح.ز. داۋەشوۆ زاڭدىلىق پەن قۇقىقتىق ءتارتىپتى نىعايتۋعا قوسقان ۇلەسى ءۇشىن ءى جانە ءىى دارەجەلى «داڭق» وردەنىمەن ناگرادتالعان. پروكۋراتۋرانىڭ قۇرمەتتى قىزمەتكەرى.
حاليدۋللا داۋەشوۆ 1964 جىلى اتىراۋ وبلىسىندا دۇنيەگە كەلگەن. 1984-1985 جىلدارى اۋعانستانداعى ۇرىس قيمىلدارىنا قاتىستى. 1991 جىلى س.م.كيروۆا اتىنداعى قازاق مەملەكەتتىك ۋنيۆەرسيتەتىنىڭ زاڭ فاكۋلتەتىن بىتىرگەن.