الماتىدا «اباي» باسپاسىنان بيىل جارىق كورگەن 155 كىتاپتىڭ تۇساۋكەسەر ءراسىمى ءوتتى. ونىڭ ىشىندە قازاق ادەبيەتىنىڭ كلاسسيك اقىن-جازۋشىلارىنىڭ شىعارمالارىنان جاساقتالعان بىرەگەي تۋىندىلارمەن قاتار بالالار مەن جاسوسپىرىمدەرگە ارنالعان تىڭ شىعارمالار دا بار.
ەسكە سالساق, بىلتىر «اباي» باسپاسىنان شىققان 35 كىتاپتىڭ تۇساۋكەسەرى وتكەن كەزدە باسپا ۇجىمى «الداعى جىلى قازاقتىڭ كوركەم ادەبيەت تۋىندىلارىن 100 تومدىققا جەتكىزەمىز» دەگەن ۋادە بەرگەن ەدى. بيىل باسپا سول ۋادەسىن ارتىعىمەن ورىنداپ, ءجۇز ەلۋدەن استام كىتاپ جارىق كورىپ, وقىرمانعا جول تارتتى.
كوركەم ادەبيەتتەن بولەك, باسپانىڭ قورجىنى بيىل قۇندى ءدىني-رۋحاني باعىتتاعى, تاريح سالاسى بويىنشا قىزىقتى كىتاپتار مەن اۋىز ادەبيەتىنىڭ جاۋھارلارىمەن دە تولىقتى. اتاپ ايتساق, « ۇلى تاريح جانە ۇلى اۋليەلەر», « ۇلى دالا اقيقاتى», «تاراز – وركەنيەتتەر ورىمدەرىنىڭ كۋاگەرى», «قاراحان بابا مەن ايشا ءبيبى», التىبارماق بابامىزدىڭ «مۇحاممەدتىڭ پايعامبارلىق دالەلدەرى», «تۇرمىس-سالت جىرلارى», «باتىرلىق جىر-داستاندار», «ليرو-ەپوستىق جىرلار», «تۇرمىس-سالت ەرتەگىلەرى», «اڭىز-اڭگىمەلەر», «قيال-عاجايىپ ەرتەگىلەر», «اۋىز ادەبيەتىنىڭ شاعىن تۇرلەرى», «حايۋاناتتار تۋرالى ەرتەگىلەر», تاعى باسقالار.
«اباي» باسپاسىنان جارىق كورگەن كوركەم ادەبيەت كىتاپتارىنىڭ كوشىن دۋلات باباتاي ۇلى, حاكىم اباي, شاكارىم, ءماشھۇر ءجۇسىپ كوپەي ۇلى باستاپ, مۇحتار اۋەزوۆ, الاشوردا قايراتكەرلەرىنىڭ شىعارمالارى مەن كەڭەس وداعى زامانىنىڭ ايگىلى قالامگەرلەرى جالعاستىرادى. سونىمەن قاتار اتالعان باسپا وقىرماننىڭ سورەسىن تاۋەلسىز قازاقستاننىڭ كورنەكتى جازۋشىلارى مەن بەلگىلى جاس اۆتورلاردىڭ شىعارمالارىمەن تولىقتىرىپ وتىر.
جاڭا كىتاپتار الەمدىك سۇرانىسقا ساي, زاماناۋي ۇلگىدە, بوياۋى باي, بىرەگەي ديزايندا جاساقتالىپ, وزىنە ءتان تارتىمدىلىعىمەن ەرەكشەلەنەدى. بۇدان بولەك بيىلعى تۇساۋكەسەردە «اباي» باسپاسى قازاق اۆتورلارى مەن وتاندىق باسپالار ءۇشىن تاعى ءبىر توسىن سىي جاسادى. ول – ەلەكتروندىق جانە اۋديوكىتاپتار جاريالاناتىن بىرەگەي ينتەرنەت پلاتفورما. «Bookstagram» دەپ اتالاتىن موبيلدىك قوسىمشا ارقىلى باسپا ەندى قالىڭ وقىرمانعا قازاق كىتاپتارىن قولجەتىمدى ەتىپ بەرگىسى كەلەدى. بۇل موبيلدىك قوسىمشانى دامىتىپ, ەلدىڭ سۇيىكتى ونلاين كىتاپحاناسىنا اينالدىرۋ ارقىلى قازىرگى تاڭدا اۆتورلىق قۇقىقتاردى ورەسكەل بۇزىپ, قازاق كىتاپتارىن ءتۇرلى الەۋمەتتىك جەلى ارقىلى ءجونسىز تاراتىپ جاتقان پيراتتىق قوسىمشالارعا توسقاۋىل قويماق.
باسپا ۇجىمى ەلەكتروندى كىتاپتار پلاتفورماسىن ازيالىق «Amazon» دەڭگەيىنە كوتەرەمىز دەپ ماقسات قويىپ وتىر. ياعني ەڭ الدىمەن پلاتفورمادا قازاق كىتاپتارىن جاريالاپ, تەستىلەۋدەن وتكىزىپ, الداعى جىلدارى «تۇركىستان ايماعى» دەپ اتالاتىن حالىقارالىق ءوڭىردىڭ نارىعىنا شىعۋدى كوزدەيدى. اتالعان پلاتفورما ارقىلى كۇللى تۇركىتىلدەس اۆتورلاردىڭ باسىن بىرىكتىرىپ, بولاشاقتا ينتەرنەت كەڭىستىكتە تۇركىتىلدەس ادەبي, عىلىمي كىتاپتاردىڭ ورتاق الەمىن قالىپتاستىرماق.
«سۇمبىلە جۇلدىزى تۋعاندا» دەگەن كىتابىم شىقتى. مۇندا بۇرىنعى ولەڭدەرىممەن قاتار جاڭا جازىلعان «جاسىل ءتۇن» دەگەن پوەمام كىرىپ وتىر. ارينە, ءسوزسىز قۋانىشتىمىن. مۇنداي يگى باستاما مەن ءۇشىن عانا ەمەس, بارشا قالامگەر ءۇشىن ۇلكەن ءبىر جاقسىلىق دەپ ويلايمىن», دەيدى اقىن مۇرات شايماران.
« ۇلى اعارتۋشىلاردان باستاپ بۇكىل قازاقتىڭ اۋىز ادەبيەتى, فولكلورى بار – سونىڭ ءبارىن قوسقان كەزدە قىرىق پايىزىن قۇرايدى. ال قالعان قىرىق پايىزى – كەڭەس وكىمەتى مەن تاۋەلسىز زامانداعى ءومىر سۇرگەن ءبىزدىڭ كلاسسيك اقىن-جازۋشىلارىمىز. قالعان بولىگى جاس اۆتورلارمەن تولىقتىرىلىپ وتىر», دەيدى «اباي» باسپاسىنىڭ ديرەكتورى اقبەرەن ەلگەزەك.
ايتا كەتەيىك, «اباي» باسپاسى بارلىق كىتاپتى ءوز قارجىسىنا شىعارىپ, ساتىپ, اۆتورلارعا قوماقتى قالاماقى تولەيتىن جاعدايعا دا جەتتى. بيىلدىڭ وزىندە 50-دەن استام اۆتور مەن قايتىس بولعان اۆتورلاردىڭ مۇراگەرلەرى «اباي» باسپاسىنان ءتۇرلى سوماداعى قالاماقى الدى. ال الداعى جىلى كىتاپ اسسورتيمەنتىن كوبەيتىپ, قوعامدى كىتاپ وقۋعا شاقىراتىن بىرقاتار قىزىقتى جوبا ۇسىنباق.