شەريازدان ەلەۋكەنوۆتىڭ باسپا ءىسى مەن كىتاپتاناداعى, عىلىم مەن ادەبيەتتەگى ەڭبەگى ولشەۋسىز. اسىرەسە, ولجاس سۇلەيمەنوۆتىڭ «از ي يا» كىتابى عالىمنىڭ باسپا كوميتەتىنىڭ توراعاسى بولعان كەزدە جارىق كورگەنىن جالپاق جۇرت جاقسى بىلەدى. كەزىندە وسى باتىل ارەكەتى قاتاڭ سىنعا الىنىپ, اقىرىندا «باسقا جۇمىسقا اۋىسۋىنا بايلانىستى» دەگەن جەلەۋمەن قىزمەتتەن بوساتىلعانىن عالىمنىڭ ۋنيۆەرسيەتتەگى دارىستەرىنەن دە تالاي ەستىدىك.
كۇنى كەشە شەريازدان ەلەۋكەنوۆتىڭ تۋعانىنا 95 جىل تولۋىنا وراي ءال-فارابي اتىنداعى قازۇۋ كىتاپحاناسىندا «ۇلتتىق كىتاپتانا ماسەلەلەرى: تاريحى جانە بۇگىنگى جاعدايى» اتتى حالىقارالىق عىلىمي-تاجىريبەلىك كونفەرەنتسيا ءوتىپ, وندا قايراتكەردىڭ كىسىلىك قىرى مەن عىلىمداعى ۇستانىمى باياندامالارعا ارقاۋ بولدى.
جيىندى جۋرناليستيكا فاكۋلتەتىنىڭ دەكانى, فيلولوگيا عىلىمىنىڭ كانديداتى قانات اۋەسباي جۇرگىزدى. ۋنيۆەرسيتەتتىڭ باسقارما مۇشەسى – اكادەميالىق ماسەلەلەر جونىندەگى پرورەكتورى اباي قازماعامبەتوۆ ءسوز سويلەپ, عالىمنىڭ عىلىمعا قوسقان ۇلەسىن زور باعالادى. «ادالدىق, ادامگەرشىلىك, ەڭبەكقورلىق قاعيدالارىن باستى ورىنعا قويعان شەريازدان ەلەۋكەنوۆ قانداي قىزمەت اتقارسا دا ۇلتتىق ۇستانىمىنان تانعان ەمەس» دەگەن ول عالىم وسى تاباندى ەڭبەگى مەن ىزدەنىستەرىنىڭ ناتيجەسىندە فيلولوگيا عىلىمدارىنىڭ دوكتورى, پروفەسسور, قازاقستاننىڭ ەڭبەك سىڭىرگەن مادەنيەت قايراتكەرى, مەملەكەتتىك سىيلىق لاۋرەاتى اتانعانىن ايرىقشا اتاپ ءوتتى.
«قازاق ادەبيەتى» گازەتىنىڭ باس رەداكتورى باۋىرجان جاقىپ ش.ەلەۋكەنوۆتىڭ ۇستازدىق جولى مەن عىلىمداعى ونەگەسىن بايانداماسىنا ارقاۋ ەتتى. سونداي-اق پروفەسسورلار جانعارا دادەباەۆ, ءنامازالى وماش ۇلى, قانسەيىت ابدەز ۇلى, قوڭىر مۇقاتايقىزى, تەمىرعالي كوپباەۆ, ساعاتبەك مەدەۋبەك ۇلى كىتاپتانۋ ماسەلەلەرىمەن قوسا قايراتكەردىڭ ادەبيەتتانۋ, باسپا ءىسى سالاسىنداعى ەڭبەگىنە تالداۋ جاسادى. پروفەسسور تەمىرعالي كوپباەۆ عالىمنىڭ كوپتومدىعىن شىعارۋ ءىسى توقتاپ قالعانىن ايتىپ, وسى جاعدايدىڭ شەشىلۋى كەرەك ەكەنىن جەتكىزدى. ال نۇرداۋلەت اقىش, سەرىكقازى قوراباي, گۇلجاھان وردا, ەلەنا دۋدينوۆا سەكىلدى ءبىر توپ عالىم شەريازدان رۇستەم ۇلىنىڭ قالامىنان شىققان تۋىندىلار جونىندە اڭگىمەلەدى.
ءوز كەزەگىندە عالىمنىڭ ۇلى, فيزيكا-ماتەماتيكا عىلىمىنىڭ دوكتورى داستان ەلەۋكەنوۆ حالىقارالىق كونفەرەنتسيانى ۇيىمداستىرۋشىلارعا العىس ايتىپ, اكە اماناتى مەن ۇستانىمى قانداي بولعانىن ايتىپ بەردى.
شەريازدان ەلەۋكەن ۇلىنىڭ ەڭبەكتەرى تۇركى ەلىنە دە قۇندى. قىرعىز رەسپۋبليكاسى ج.بالاساگىن اتىنداعى قۇۋ-ءنىڭ جۋرناليستيكا جانە كوممۋنيكاتسيا ينستيتۋتىنىڭ ديرەكتورى, الەۋمەتتىك عىلىم كانديداتى, دوتسەنت شيرين كوستيۋك جانە تۇركيانىڭ ساكاريا ۋنيۆەرسيتەتىنىڭ پروفەسسورى مۋحاممەد بيلال چەليك وسىلاي دەدى. شەتەلدىك عالىمدار دا تۇركى ەلىنە ورتاق تۇلعا ش.ەلەۋكەنوۆتىڭ قايراتكەرلىك قىرى مەن باسپا ىسىندەگى ەڭبەگىنە توقتالدى.
حالىقارالىق كونفەرەنتسيا ماتەريالدارى ارنايى جيناق بولىپ جارىق كورىپ, ءىس-شارا بارىسىندا كوپشىلىككە تانىستىرىلدى. بۇعان قوسا ءىس-شارا اياسىندا ءال-فارابي كىتاپحاناسىنىڭ فويەسىندە عالىم شىعارماشىلىعى مەن ومىرىنە ارنالعان كىتاپ كورمەسى جانە فوتوكورمە ۇيىمداستىرىلدى.
قاراگوز سەرىكقىزى,
باسپاگەرلىك-رەداكتورلىق جانە ديزاينەرلىك ونەر كافەدراسىنىڭ وقىتۋشىسى