ۇيىمداسقان قىلمىسقا قارسى كۇرەس دەپارتامەنتى جىل باسىنان بەرى 14 «جالعان پوليتسەيدى» ۇستاعان, دەپ حابارلايدى Egemen.kz Polisia.kz-كە سىلتەمە جاساپ.
قاراشا ايىندا شىمكەنتتە ءبىر توپ ادام پوليتسيا قىزمەتكەرلەرىنىڭ كەيپىنە ەنىپ, «قامقورلىعى» ءۇشىن اي سايىن 1,5 ملن تەڭگە الىپ وتىرعان.
ءدال سول سياقتى اقتوبەدە 2 جاس جىگىت قالانىڭ ەكى تۇرعىنىنا زورلىق-زومبىلىق كورسەتىپ, 300 مىڭ تەڭگە العان.
قوناەۆتا ۇيىمداسقان قىلمىسقا قارسى كۇرەس باسقارماسىنىڭ قىزمەتكەرلەرى الماتى وبلىسىنىڭ 2 تۇرعىنىن ۇستادى. ولار وزدەرىن جەدەل ۋاكىل رەتىندە كورسەتىپ, جابىرلەنۋشىدەن 500 مىڭ تەڭگە بوپسالاعان.
جالعان قىزمەتتىك كۋالىكتەر, قۇجاتتار, نىساندى كيىمدەر تاركىلەنىپ, كۇدىكتىلەر قاماۋعا الىندى.
«ايتا كەتۋ كەرەك, زاماناۋي تەحنولوگيالار الاياقتارعا ىقتيمال قۇرباندار تۋرالى ءارتۇرلى اقپاراتتى وڭاي الۋعا مۇمكىندىك بەرەدى. بۇل ولاردىڭ قىلمىستىق سحەمالارىن سەنىمدى ەتەدى. قىلمىسكەرلەر ادامداردى مانيپۋلياتسيالاۋ ءۇشىن پسيحولوگيالىق ادىستەردى قولدانادى. جالعان پوليتسيا قىزمەتكەرلەرىن ۇستاۋ – بۇل قاۋىپسىزدىك ماسەلەسى عانا ەمەس, ازاماتتاردىڭ قۇقىقتارىن قورعاۋدىڭ ماڭىزدى بولىگى. ازاماتتاردىڭ قىراعىلىعى مۇنداي قىلمىستاردىڭ سانىن ەداۋىر تومەندەتۋى مۇمكىن. ءىىم كەز كەلگەن زاڭسىز ارەكەتتەر تۋرالى پوليتسياعا دەرەۋ حابارلاۋدى سۇرايدى. بۇل باعىتتاعى پروفيلاكتيكالىق جۇمىستار جالعاسىپ جاتىر», دەدى ءىىم ۇيىمداسقان قىلمىسقا قارسى كۇرەس دەپارتامەنتىنىڭ وكىلى قۋاندىق الپىس.