بىرەگەي

القالى جيىنعا مادەنيەت جانە قوعام قايراتكەرلەرى, اقىن-جازۋشىلار, ادەبيەتتانۋ­شىلار مەن اۋدارماشىلار, سونداي-اق رەسەي ديپلوماتيالىق كورپۋسىنىڭ وكىلدەرى قاتىستى.

ءىس-شارادا مادەنيەت جانە اقپارات مينيسترلىگى ارحيۆ, قۇجاتتاما جانە كىتاپ ءىسى كوميتەتىنىڭ توراعاسى رۋستام ءالي مينيستر ايدا بالاەۆانىڭ قۇتتىقتاۋ حاتىن وقىپ بەردى.

مينيستر قۇتتىقتاۋىندا گەرولد بەلگەردىڭ قازاق ادەبيەتى مەن مادەنيەتىن دارىپتەۋدەگى ادال قىزمەتى مەن كوپتىلدى مۇراسى كەلەشەك ۇرپاق ءۇشىن ماڭىزدى قۇندىلىق ەكەنى ايتىلعان.

«بۇل جيناق مادەنيەت جانە اقپارات مينيسترلىگى ۇيلەستىرەتىن «قوعامدىق ماڭىزى بار ادەبيەتتەردى باسىپ شىعارۋ جانە تاراتۋ» مەملەكەتتىك باعدارلاماسى اياسىندا جارىق كورىپ, ەلىمىزدىڭ كىتاپ­حانالارىنا تاراتىلادى. بۇدان بولەك بيىل بىرەگەي تۇلعاعا ارنالعان جۇزدەن استام رۋحاني ءىس-شارا ەلىمىزدىڭ تۇكپىر-تۇكپىرىندە كەڭىنەن اتالىپ ءوتىپ جاتىر. جىلدىڭ كەيىنگى شيرەگىنىڭ وزىندە گەرولد بەلگەردىڭ 90 جىلدىق مەرەيتويى قارساڭىندا 32 ءىس-شارا جوسپارلانىپ, قالىڭ وقىرمانعا ۇسىنىلۋدا. مينيسترلىك تاراپىنان جازۋشىنىڭ شىعارماشىلىعى مەن ءومىر جولىن ناسيحاتتاۋ جۇمىستارى دا قارقىندى جۇرگىزىلىپ وتىر. تەلەارنالار ارقىلى تاراعان «بىرەگەي» باعدارلاماسى, ء«بىز بىرگەمىز» روليگى, «نەيزداننىە پرويزۆەدەنيا گەرولدا بەلگەرا» سيۋجەتتەرىن ەرەكشە اتاپ وتكىم كەلەدى», دەلىنگەن قۇتتىق­تاۋ حاتتا.

سونداي-اق جيىندا جازۋشىنىڭ قىزى يرينا كوۆالەۆا-بەلگەردىڭ ءىس-شارا ۇيىم­داستىرۋشىلارىنا العىس بىلدىرگەن حاتى وقىلدى.

«قازاقستاننىڭ ءار وڭىرىندە گەرولد بەلگەردىڭ 90 جىلدىق مەرەيتويى اياسىندا كوپتەگەن ءىس-شارا وتكىزىلىپ جاتىر. سونداي ماڭىزدى ءىس-شارانىڭ ءبىرى – ەكى تومدىق جيناقتىڭ جارىق كورۋى. ءبىرىنشى تومدا ەڭ ۇزدىك اڭگىمەلەرى مەن شىعارمالارى جيناقتالعان. ەكىنشى توم ومىرىندەگى اسا قىمبات جاندارعا, بىرگە ءومىر سۇرگەن, ءوزى تالانتىن جوعارى باعالاعان ادامدارعا ارنالعان. ونىڭ شىعارماشىلىعى مەن ومىرىنە قىزىعۋشىلىق تانىتىپ, ناسيحاتتاپ جاتقاندارىڭىز ءۇشىن شەكسىز العىس بىلدىرەمىز», دەدى ي.كوۆالەۆا-بەلگەر.

سانالى عۇمىرىندا «قازاقتىڭ قۋا­نىشى – مەنىڭ قۋانىشىم, قازاقتىڭ تويى – مەنىڭ تويىم» دەپ تۋعان جەرىنە, وسكەن ورتاسىنا, قابىرعالى قازاق ەلىنە قىزمەت ەتكەن ادال ازاماتتىڭ ۇلت رۋحانياتىنا سىڭىرگەن ەڭبەگى وراسان. قازاقتىڭ قايعىسى ءۇشىن قابىرعاسى قايىسىپ, قۋانىشىنان قۋاتتانعان گەرولد بەلگەر كوزى تىرىسىندە الپىسقا جۋىق كىتاپ, «گەتە مەن اباي», «اسىلعا اباي بولايىق!» سىندى ەكى مىڭعا تارتا ماقالا جازدى.

جيىن بارىسىندا سويلەگەن مەملە­كەتتىك سىيلىقتىڭ لاۋرەاتى ساۋىتبەك ابدراحمانوۆ كورنەكتى اۋدارماشىنىڭ ءتىلىمىزدىڭ ءورىسىن كەڭەيتكەنىن اتاپ ءوتتى.

«گەراعانىڭ 90 جىلدىعىنا ءبىزدىڭ مينيسترلىكتىڭ وسىنداي كوڭىل ءبولۋى, مەملەكەتتىك تاپسىرىس بويىنشا ەكى تومدىعىن شىعارۋى, تۇساۋكەسەرىن وتكىزۋى قۇپتارلىق. ول قانداي قۇرمەتكە دە لايىقتى ادام. ءبىزدىڭ ءتىلىمىزدىڭ داڭقىن كوتەرگەن, ءوزىمىزدى وزىمىزگە تانىتۋعا ۇلكەن ۇلەس قوسقان تۇلعا», دەدى س.ابدراحمانوۆ.

ال جازۋشى قۋانىش جيەنباي تۇلعا تۋرالى ەستەلىكتەرىمەن ءبولىستى.

«ەندى كورنەكتى تۇلعالار ساناتىنا گەراعاڭ­دى قوسۋعا بولادى. نۇرپەيىسوۆپەن كەيدە كەلىسىپ, كەيدە كەلىسپەي قالعان ساتىنە مەن كۋاگەر بولدىم. بۇل كىسىنىڭ جا­زۋعا دەگەن شەبەرلىگى, ءار سوزىنە دەگەن جاۋاپكەرشىلىكپەن قارايتىنى, قولىمەن جازعان دۇنيەسى تاسقا باسىلعانداي ورفوگرافيالىق ەرەجەلەرمەن ءتۇپ-ءتۇزۋ جازاتىن. ونىڭ ۇستىنە ول كىسى قايتىپ سىزبايتىن, قايتىپ جوندەمەيتىن. سول كۇيىندە باسپاعا كەتە بەرەتىن. بەلگەر دەگەن كىسى قازاققا قارىزدار. قازاق بەلگەرگە قارىزدار. ول كىسىنىڭ ءومىر جولىنىڭ بار­لىعى قازاقتىڭ تىنىس-تىرلىگىمەن بىتە قاي­ناسقان. قازاقتىڭ نەبىر مىقتى جازۋشى­لارىنىڭ بارلىعىن بەلگەر اعامىز اۋداردى» دەيدى جازۋشى.

اۋدارماشى بەيىمبەت مايلين, ءابدى­جامىل نۇرپەيىسوۆ, ءابىش كەكىلباەۆ, دۇكەنباي دوسجانوۆ سىندى قازاق جازۋ­شىلارىنىڭ بىرقاتار شىعارمالارىن ورىس تىلىنە اۋدارعان. قوعام قايراتكەرى ومىرزاق وزعانباەۆتىڭ ايتۋىنشا, گەرولد بەلگەر قازاق حالقىنىڭ ەرتەڭىنە الاڭداعان تۇلعا بولدى.

«قازاق حالقىنىڭ كوپتەگەن ۇنامايتىن جاقتارىن اشىق, انىق ايتاتىن. مىنا مەملەكەت باسىندا جۇرگەن ازاماتتار, مينيسترلەر, دەپۋتاتتار نەگە قازاقشا سويلەمەيدى, ولار ۇلى ابايدىڭ تىلىندە وسى مىنبەردەن ءبىر رەت پىكىر ايتىپ, سولاردىڭ سوزىنە سىلتەمە جاساپ جاتقانىن كورگەنىم جوق دەيدى. قازاقتىڭ ءبىر پەرزەنتىنەن ارتىق قىزمەت جاساعان ۇلى بولدى», دەيدى ءو.وزعانباەۆ.

گەرولد بەلگەردىڭ ەكى تومدىق «تاڭدا­مالىلار» جيناعىنا 140-تان اسا شىعار­ماسى مەن اۋدارماسى ەنىپ, ارقايسىسى 3 مىڭ دانامەن جارىق كورىپ وتىر.