قاسىم-جومارت توقاەۆ مەملەكەتتىك قىزمەتكەرلەرگە سىياقى بەرۋگە تىيىم سالۋ تۋرالى حابارلاماعا قاتىستى پىكىر ءبىلدىردى, دەپ حابارلايدى Egemen.kz اقوردانىڭ ءباسپاسوز قىزمەتىنە سىلتەمە جاساپ.
«سونىمەن قاتار جاقىندا مەملەكەتتىك قىزمەتكەرلەرگە سىياقى بەرۋگە تىيىم سالىناتىندىعى تۋرالى ماسەلە قىزۋ تالقىلاندى. قارجى مينيسترلىگى وعان تىيىم سالۋعا نەگىز جوق ەكەنىن ءتۇسىندىرىپ بەردى. مەملەكەتتىك قىزمەتشىلەر – ەلدەگى جۇيەلى وزگەرىستەردىڭ باستى جولباسشىلارى. ولاردىڭ تابىسى ايتارلىقتاي كوپ ەمەس. كەي كەزدەرى تۇنىمەن جۇمىستا وتىرادى. مەملەكەتتىك قىزمەتشىلەردىڭ دە وتباسى مەن مىندەتى, قالا بەردى قاراپايىم ادام رەتىندەگى قالاۋى مەن جوسپارى بار.مەملەكەتتىك ورگانداردىڭ تيىمدىلىگىن ارتتىرۋ ءۇشىن قاتارداعى قىزمەتكەرلەردىڭ ەڭبەكاقىسى باسەكەگە قابىلەتتى بولۋى كەرەك دەپ ويلايمىن. سىياقى اتالعان ماسەلەنى شەشۋگە مۇمكىندىك بەرەدى. باسقا جولمەن مەملەكەتتىك قىزمەتكە بىلىكتى مامانداردى تارتىپ, كادر تۇراقسىزدىعى پروبلەماسىن شەشۋ قيىن», دەدى مەملەكەت باسشىسى.
ەستەرىڭىزگە سالا كەتەيىك, بۇعان دەيىن قارجى ءمينيسترى ءمادي تاكيەۆ قازاقستاننىڭ مەملەكەتتىك قىزمەتكەرلەرگە سىياقى تولەۋ جۇيەسىندەگى جاڭاشىلدىق تۋرالى مالىمدەگەن بولاتىن. ءمينيستردىڭ ايتۋىنشا, مەملەكەتتىك قىزمەتكەرلەر بۇدان بىلاي مەملەكەتتىك ورگاندار ۇنەمدەگەن قاراجاتتان سىياقى المايدى. بۇل اقشا بيۋدجەتكە قايتارىلادى.