مۇنايلى ءوڭىردىڭ «وزگەرىس كوشباسشىلارى» جاس ساياساتكەرلەر مەكتەبىنىڭ رەزيدەنتتەرى مادەنيەت جانە اقپارات مينيسترلىگىنىڭ جۇمىسىمەن تانىستى. ولار استاناعا ساپارلاپ, مەملەكەتتىك اپپاراتتىڭ نەگىزگى نىساندارىنا باردى.
اتىراۋ وبلىسىندا بيىل ماۋسىم ايىنان بەرى «وزگەرىس كوشباسشىلارى» جاس ساياساتكەرلەر مەكتەبى جۇمىس ىستەيدى. ىرىكتەۋ بارىسىندا ءار سالادان 30 ادام تاڭدالدى. جوبانىڭ ماقساتى – ءوڭىردىڭ الەۋمەتتىك-ەكونوميكالىق ماسەلەلەرىن شەشۋگە بەلسەندى جاستاردى تارتۋ. مەكتەپ قاتىسۋشىلارى مەملەكەت جانە قوعام, ازاماتتىق قۇقىق, بيۋدجەت, الەۋمەتتانۋ جانە ازاماتتىق تەحنولوگيالاردى پايدالانۋ سەكىلدى بەس باعىت بويىنشا وقۋدان وتەدى.
استاناعا ساپارلاعان ولار اۋەلى مادەنيەت جانە اقپارات مينيسترلىگىندە جاستار جانە وتباسى ىستەرى كوميتەتى توراعاسىنىڭ ورىنباسارى ءبىرجان الىمجانوۆپەن كەزدەستى. جيىندا جاستار ساياساتىنىڭ نەگىزگى اسپەكتىلەرى قوزعالدى. قوناقتارعا قىسقاشا ەكسكۋرسيا دا ۇيىمداستىرىلدى.
كوشباسشىلار جاستار عىلىمي-زەرتتەۋ ورتالىعى ۇجىمىمەن دە جۇزدەستى. كەزدەسۋ بارىسىندا قاتىسۋشىلار ورتالىق جۇمىسىمەن, ونىڭ عىلىمي جوبالارى جانە جاستاردى قولداۋ مەن دامىتۋعا ارنالعان ماڭىزدى ءىس-شارالارمەن تانىستى.
بۇل كەزدەسۋ جاس كوشباسشىلارعا جاستاردىڭ وزەكتى ماسەلەلەرى مەن قاجەتتىلىكتەرىن قامتيتىن زەرتتەۋلەر جۇرگىزۋ باعىتىنداعى نەگىزگى قىزمەتى تۋرالى تەرەڭىرەك تۇسىنىك الۋعا مۇمكىندىك بەردى. جاستار ساياساتىن دامىتۋدا عىلىمي كوزقاراستىڭ ماڭىزى ەرەكشە اتالىپ ءوتتى. تالقىلاۋدا ورتالىقتىڭ زەرتتەۋ ناتيجەلەرىن كۇن تارتىبىندە تۇرعان وزەكتى ماسەلەلەردى ەسكەرەتىن وڭىرلىك دامۋ ستراتەگيالارى مەن باعدارلامالارىنا ەنگىزۋ قاجەتتىگى ءسوز بولدى.
قاتىسۋشىلار «وزگەرىس كوشباسشىلارى» سياقتى جوبالار تاجىريبە الماسۋعا, سونداي-اق عىلىمي قاۋىمداستىق پەن جاستار اراسىنداعى ءوزارا بايلانىستى نىعايتۋعا ىقپال ەتەتىنىن اتاپ ءوتتى. بۇل ءوز كەزەگىندە جاستاردى ءوڭىردى دامىتۋ ۇدەرىسىنە بەلسەندى تارتۋعا مۇمكىندىك بەرەدى.