اۋداندىق ءبىلىم ءبولىمىنىڭ بۋحگالتەرى بيۋدجەت قاراجاتىن جىمقىرعانى ءۇشىن سوتتالدى, دەپ حابارلايدى Egemen.kz.
سىبايلاس جەمقورلىققا قارسى قىزمەت ءبىلىم بەرۋ سالاسىنداعى جۇيەلى سىبايلاس جەمقورلىق فاكتىلەرىنىڭ جولىن كەسۋ بويىنشا جۇمىستى جالعاستىرىپ جاتىر. جىمقىرۋ تاۋەكەلدەرىن بارىنشا ازايتۋ ماقساتىندا بارلىق وڭىردە بىرىڭعاي بۋحگالتەرلىك ەسەپ جۇيەسى ەنگىزىلدى. بۇل جوعارى جالاقى مەن ء«ولى جانداردى» ەسەپتەي وتىرىپ, الاياقتىقتى ۋاقىتىلى توقتاتۋعا, جالعان دەرەكتەردىڭ ەنگىزىلۋىنە توسقاۋىل قويۋعا مۇمكىندىك بەرەدى.
قازىر اكىمدىكتەر اي سايىن ءبىلىم بەرۋ ۇيىمدارىنىڭ بۋحگالتەرلىك ەسەپ جۇيەلەرىن قازىناشىلىق ەسەپتەرىمەن اۆتوماتتى تۇردە سالىستىرىپ وتىرادى. كەز كەلگەن سايكەسسىزدىكتەر ەكى رەت تەكسەرىلەدى.
سونىمەن قاتار, ىشكى مەملەكەتتىك اۋديت كوميتەتى جانە ونىڭ اۋماقتىق دەپارتامەنتتەرى بيىل تامىز ايىنان باستاپ جالاقىنى نەگىزسىز اۋدارۋ تۇرعىسىنان تولەمدەردى كامەرالدىق باقىلاۋدى جۇزەگە اسىرادى.
بارلىق كۇدىكتى وپەراتسيالار سىبايلاس جەمقورلىققا قارسى قىزمەتكە, ءبىلىم باسقارماسىنا جانە اۋدارىم جاساعان ۇيىمنىڭ وزىنە تالداۋ جاساۋ ءۇشىن تۇسەدى. بۇل بارلىق كۇدىكتى وپەراتسيالاردى باقىلاۋعا جانە قۇقىق بۇزۋشىلىقتاردى انىقتاۋعا مۇمكىندىك بەرەدى. جەرگىلىكتى جەرلەردە ءبىلىم بەرۋ سالاسىنىڭ باسشىلارىنا بيۋدجەتتى بولۋگە جاۋاپتى قىزمەتكەرلەرمەن پروفيلاكتيكالىق جۇمىستار جۇرگىزۋ قاجەت.
ءاربىر بولىنگەن تيىن ەرەكشە باقىلاۋدا جانە جىمقىرۋدى انىقتاۋ قيىن ەمەس. 2023 جىلدىڭ باسىنان باستاپ وسى سالادا بارلىعى 297 قىلمىستىق ءىس جۇرگىزىلدى. قىلمىس جاساۋدا 406 ادام اشكەرەلەنىپ, ونىڭ ىشىندە 196 ادام ءتۇرلى جازالاۋ شارالارىنا سوتتالدى. ماسەلەن, شىعىس قازاقستان وبلىسى بويىنشا سىبايلاس جەمقورلىققا قارسى قىزمەتى ج.جاباەۆ اتىنداعى وبلىستىق مامانداندىرىلعان مەكتەپ-ينتەرنات گيمنازياسىنىڭ ەكى بۋحگالتەرىنە قاتىستى قىلمىستىق ءىس تەرگەپ جاتىر.
ولار الدىن الا ءسوز بايلاسۋ ارقىلى قىلمىستىق توپ قۇرامىندا 5 جىل بويى ءوزىنىڭ كارتوچكالىق شوتتارىنا اسىرا جالاقىنى جانە باسقا دا تولەمدەردى اۋدارۋ جولىمەن 120 ملن تەڭگە بيۋدجەت قاراجاتىن جىمقىردى دەگەن كۇدىككە ءىلىندى. تەرگەۋ جالعاسىپ جاتىر.
قىلمىستىق-پروتسەستىك كودەكستىڭ 201-بابىنا سايكەس وزگە اقپارات جاريا ەتۋگە جاتپايدى. كونستيتۋتسيانىڭ 77-بابى 3-تارماعىنىڭ 1-تارماقشاسىنا جانە قىلمىستىق-پروتسەستىك كودەكستىڭ 19-بابى 1-بولىگىنە سايكەس, قىلمىستىق قۇقىق بۇزۋشىلىق جاساۋداعى كىناسى سوتتىڭ زاڭدى كۇشىنە ەنگەن ۇكىمىمەن بەلگىلەنگەنگە دەيىن ءاربىر ادام كىناسىز دەپ ەسەپتەلەدى.