سۋ رەسۋرستارى جانە يرريگاتسيا مينيسترلىگى ازىرلەگەن جاڭا سۋ كودەكسى – ۇكىمەت, مينيسترلىك, وزگە دە مەملەكەتتىك جانە جەرگىلىكتى اتقارۋشى ورگانداردىڭ, جەرگىلىكتى ۋاكىلەتتى ورگانداردىڭ قۇزىرەتتەرىن مۇقيات رەتتەيدى. بۇل – سۋ رەسۋرستارىن باسقارۋ ءىسىن ۇيلەستىرۋدى جاقسارتۋعا ىقپال ەتەدى, دەپ حابارلايدى Egemen.kz.
مينيسترلىكتىڭ ءباسپاسوز قىزمەتىنىڭ ءمالىم ەتۋىنشە, نەگىزگى جاڭاشىلدىقتاردىڭ ءبىرى – سۋ نىساندارىنىڭ جاي-جاپسارى تۋرالى دەرەكتەردىڭ مونيتورينگىن جانە ەسەپكە الىنۋىن قامتاماسىز ەتەتىن سۋ رەسۋرستارىنىڭ ۇلتتىق اقپاراتتىق جۇيەسىنىڭ قۇرىلعانى بولىپ وتىر. اتالعان جۇيە سۋدى پايدالانۋدى باقىلاۋ جانە شەشىم قابىلداۋ ءۇشىن قاجەتتى اقپاراتقا قول جەتكىزۋگە مۇمكىندىك بەرەدى.
سونىمەن قاتار سۋ رەسۋرستارىن قورعاۋ مەن پايدالانۋدىڭ باس جوسپارىن جانە باسسەيندىك جوسپارىن جاساۋ تالابى پايدا بولدى, بۇل – ءار ايماقتىڭ ەرەكشەلىكتەرىن ەسكەرۋگە مۇمكىندىك بەرەدى. باس جوسپاردىڭ قورىتىندىلارى مەن ۇسىنىمدارى مەملەكەتتىك جوسپارلاۋ كەزىندە ەسكەرىلەتىن بولادى. بۇل سۋ شارۋاشىلىعى باسسەيندەرى دەڭگەيىندە رەسۋرستاردى نەعۇرلىم ۇتىمدى ءبولۋدى قامتاماسىز ەتۋگە ارنالعان حالىقارالىق ستاندارت.
جاڭا سۋ كودەكسىندە سۋ وبەكتىلەرىن قورعاۋ نورمالارى دا ەنگىزىلدى. اتاپ ايتقاندا, شاعىن سۋ قويمالارى, سۋلى-باتپاقتى جەرلەر, مۇزدىقتار قاراستىرىلعان. العاش رەت ەكوجۇيەلەر مەن بيوارتۇرلىلىكتى ساقتاۋ ءۇشىن ماڭىزدى بولىپ تابىلاتىن شاعىن سۋ وبەكتىلەرىن قورعاۋ ءىس-شارالارى ەگجەي-تەگجەيلى سيپاتتالعان. سونىمەن بىرگە «ەكولوگيالىق اعىن» ۇعىمى ەنگىزىلەدى, بۇل – سۋ وبەكتىلەرىنىڭ ەكوجۇيەلەرىن ساقتاۋ ءۇشىن سۋدىڭ ەڭ تومەنگى رۇقسات ەتىلگەن دەڭگەيى, سارقىلۋدان جانە باسقا دا جاعىمسىز سالداردان قورعايدى.
سۋ كودەكسىنىڭ جاڭارتىلعان جوباسى ەلدى مەكەندەردەگى سۋمەن جابدىقتاۋ, سۋ بۇرۋ جانە گيدروتەحنيكالىق قۇرىلىستاردىڭ قاۋىپسىزدىگىنە ەرەكشە نازار اۋدارادى. اۋىل شارۋاشىلىعى مەن ونەركاسىپ ءۇشىن سۋدى پايدالانۋدىڭ قاتاڭ نورمالارىن بەلگىلەيدى. سونداي-اق قۇجات سۋ وبەكتىلەرىن قورعاۋ جونىندەگى ءىس-شارالاردى ەداۋىر كەڭەيتەدى جانە سۋدى پايدالانۋدى رەتتەۋدى جەتىلدىرەدى.
«جاڭا سۋ كودەكسى جوباسىنىڭ نەگىزگى ماقساتى − ەكونوميكانىڭ تۇراقتى دامۋىن قامتاماسىز ەتۋ, ازاماتتاردىڭ ءومىر ءسۇرۋ ساپاسىن جاقسارتۋ, قورشاعان ورتانى ساقتاۋعا مۇمكىندىك بەرەتىن سۋدى پايدالانۋدىڭ قاۋىپسىز دەڭگەيىنە قول جەتكىزۋ جانە ونى قولداۋ بولىپ تابىلادى. قۇجات – كليماتتىڭ وزگەرۋىنە بەيىمدەلۋگە جانە سۋدى ۇنەمدەۋ پرينتسيپتەرىن ەنگىزۋگە باسا نازار اۋدارادى. العاش رەت جەراستى جانە جەرۇستى سۋلارىن كەشەندى پايدالانۋ قاعيداتى ەنگىزىلدى, بۇل – قازاقستاننىڭ سۋ وبەكتىلەرىن ءبىرتۇتاس جۇيە رەتىندە قاراستىرۋعا مۇمكىندىك بەرەدى», دەدى مينيسترلىكتىڭ سۋ ساياساتى دەپارتامەنتىنىڭ ديرەكتورى سەرىكجان بەكەتاەۆ.