اقمولا وبلىسى اكىمىنىڭ 2024 جىلعى 13 قاراشاداعى وكىمىمەن جانە قازاقستان رەسپۋبليكاسى پرەزيدەنتى اكىمشىلىگىنىڭ كەلىسىمىمەن, سونداي-اق ءماسليحات دەپۋتاتتارىنىڭ ماقۇلداۋىمەن ستەپنوگورسك قالاسىنىڭ اكىمى بولىپ گايدار قاسەنوۆ تاعايىندالدى, دەپ حابارلايدى Egemen.kz اكىمدىكتىڭ ءباسپاسوز قىزمەتىنە سىلتەمە جاساپ.
ستەپنوگورسك قالاسىنىڭ جاڭا اكىمىن وبلىس اكىمىنىڭ ءبىرىنشى ورىنباسارى ەلدوس رامازانوۆ قالا اكتيۆىنە تانىستىردى. ەلدوس رامازانوۆ بۇرىنعى اكىم الپىسباي قايىرجانوۆقا العىسىن ءبىلدىرىپ, جاڭا اكىمگە ساتتىلىك تىلەدى.
مەملەكەت باسشىسىنىڭ تاپسىرماسى بويىنشا گايدار قاسەنوۆكە قالانى دامىتۋ جانە تۇرعىندارعا قولايلى جاعداي جاساۋ بويىنشا بىرقاتار مىندەتتەر جۇكتەلدى.
«بۇگىنگى كۇنى جىلىتۋ ماۋسىمىندا قالا اكىمى ءۇشىن ەڭ باستى مىندەت – حالىقتى جانە الەۋمەتتىك نىسانداردى جىلۋمەن ۇزدىكسىز جانە تۇراقتى قامتاماسىز ەتۋ. سونداي-اق, سۋمەن جابدىقتاۋ نىساندارىنىڭ جۇمىسىن اياقتاۋ جانە ولاردى ۋاقىتىندا ىسكە قوسۋ ەرەكشە باقىلاۋدا بولۋى قاجەت», دەدى ە.رامازانوۆ.
سونىمەن قاتار, ستەپنوگورسك قالاسىنىڭ اكىمدىگىنە ينۆەستيتسيا تارتۋ, جاڭا جۇمىس ورىندارىن قۇرۋ, كاسىپكەرلىكتى دامىتۋ جانە تۇرعىن ءۇي قۇرىلىسى بويىنشا ناقتى جۇمىستار جۇرگىزۋ تاپسىرىلدى.