قازاق ۇلتتىق ونەر ۋنيۆەرسيتەتىندە مەملەكەتتىك سىيلىقتىڭ لاۋرەاتى, سۋرەتشى سەمبىعالي سماعۇلوۆتىڭ «كۇردەلى كوپفيگۋرالى كومپوزيتسيا تۇتاستىعىن قۇرۋ ءتاسىلى» اتتى شەبەرلىك ساعاتى ءوتتى. سۋرەتشىنىڭ شىعارماشىلىق دارىسىنە ستۋدەنتتەر مەن قىلقالام شەبەرلەرى قاتىستى.
شەبەرلىك ساعاتىندا اۆتور بىرنەشە كارتيناسىن تانىستىردى. سونداي-اق ورتادا بوزوق قالاشىعىنا ارنالعان كومپوزيتسياسىمەن جۇمىس ىستەدى. ءار دەتالدىڭ ورنىن كورسەتىپ, سالىنۋ تەحنيكاسىمەن ءبولىستى. تولىق كومپوزيتسيادا كورىنە بەرمەيتىن سۋرەتشىلىك ايلا-تاسىلدەرىن ايتتى.
«مۇنداي شەبەرلىك ساعاتتارىن ۇيىمداستىرۋ وسى سالاداعى ماماندارعا, بولاشاق سۋرەتشىلەرگە وتە پايدالى. بەينەلەۋ ونەرىندەگى ەڭ ءبىرىنشى قۇندىلىق – كومپوزيتسيا. ياعني ۇيلەستىرۋ, ءبىر ەلەمەنت پەن ءبىر ەلەمەنتتى ۇيقاستىرۋ. كومپوزيتورلار ءبىر نوتا مەن ءبىر نوتانى ۇيلەستىرىپ, تاڭعاجايىپ تۋىندى شىعارىپ جاتادى. سول سياقتى بەينەلەۋ ونەرىندە دە كومپوزيتسيالاردىڭ ءوزارا ۇندەسىپ, ءتۇرلى دەتالدار ءىشىنارا جىمداسىپ تۇرسا عانا ناعىز كوركەم كارتينا تۋادى. ءبىز كاسىبي مامانداردى دايىنداپ جاتقاننان كەيىن قانشاما جىلدىق تاجىريبەممەن ءبولىسۋ, سۋرەتشىلىك سىرلارىمدى اشىپ, وبراز جاساۋداعى قۇپيالارىممەن ءبولىسۋدى ۇستازدىق پارىز سانايمىن. ونەر ادامدارىنىڭ ماقساتىنىڭ ءبىرى – ۇلتقا قىزمەت. ابايدىڭ «ۇستازدىق ەتكەن جالىقپاس, ۇيرەتۋدەن بالاعا» دەگەنىندەي, بۇل شەبەرلىك ساعاتى شاكىرتتەرىمە جاساعان ەسەبىم مەن تاجىريبەم. ستۋدەنتتەر شىعارماشىلىق كوڭىل كۇيدەن شىعا الماي, ۇلكەن تولقىنىسپەن تاراپ جاتىر», دەيدى سەمبىعالي سماعۇلوۆ.
ايتا كەتەيىك, سۋرەتشى بيىلدىققا مۇنداي شەبەرلىك ساعاتتارىن ءۇشىنشى رەت وتكىزىپ وتىر. بۇعان دەيىن اتىراۋدا, استانادا ل.ن.گۋميلەۆ ۋنيۆەرسيتەتىندە بولىپ, شىعارماشىلىق ءدارىس وقىعان.
شەبەرلىك ساعاتىنىڭ سوڭىندا قاتىسۋشىلار ءتۇرلى سۇراقتار قويىپ, پىكىر الماستىردى. كومپوزيتسياداعى ءار سىزىقتىڭ, ءار نۇكتەنىڭ ءمان-ماڭىزىن, باسقا دەتالدارمەن بايلانىسىن تالقىلادى.
«ال مىناۋ ورتادا جۇمىس ىستەگەن كومپوزيتسيانى بوزوق قالاسىنا ارنادىم. جالپى, بۇل قالاشىقتىڭ تاريحي ماڭىزى زور. سول زاماننىڭ كەسكىن-كەلبەتىنە بويلاپ, كومپوزيتسيالىق ۇيلەسىمدە بەرۋ وزىمە قىزىق بولدى. كوپ ۋاقىتتان بەرى تولعانىپ ءجۇرمىن. بۇل جۇمىسىم جارىققا شىققان جوق, بۇگىن ارنايى ەلدىڭ الدىنا ۇسىنىپ وتىرمىن. ادام ەشقاشان تولىق كەمەلدەنبەيدى عوي. دەگەنمەن الپىستىڭ اسۋىنا كەلىپ جاتقان تۇستا قانشاما جىلدىق تاجىريبەمنىڭ ەسەبى سىندى بولدى», دەيدى سۋرەتشى.