مەملەكەتتىك ورتالىق مۋزەيدە «قازاقستان. قىتاي. رەسەي. قۋات پاليتراسى» دەپ اتالعان حالىقارالىق فوتوكورمە اشىلدى. اۋقىمدى جوبا كورشى مەملەكەتتەر اراسىنداعى مادەني ىنتىماقتاستىقتى نىعايتىپ, ستراتەگيالىق بايلانىستاردى ورىستەتۋگە باعىتتالىپ وتىر.
كورمەگە ءۇش مەملەكەتتىڭ تابيعي ەرەكشەلىكتەرى مەن مادەني بايلىعىن كورسەتەتىن 600 سۋرەت قويىلعان. قاس-قاعىم ءساتتى ماڭگىلىك تاريحقا اينالدىرعان كاسىبي فوتوشەبەرلەر ءار ەلدىڭ جارقىن جەتىستىكتەرىن, ايتۋلى تابىستارىن ءوز جۇمىستارى ارقىلى كورسەتۋگە كۇش سالعان.
مادەني شارا قوناقتارىنىڭ قاتارىندا كورشىلەس ەلدەردىڭ تانىمال سۋرەتشىلەرى مەن ونەرتانۋشىلارى بوي كورسەتتى. ولاردىڭ اراسىندا كاسىبي فوتوگرافتار ليگاسىنىڭ پرەزيدەنتى كسەنيا لەبەد, «تسيفرلىق فوتوسۋرەتشىلەر مەن فوتوگرافتار» وداعى قوعامدىق قورىنىڭ پرەزيدەنتى دارە دۋنيچ تە بار. رەسەي فەدەراتسياسىنىڭ الماتى قالاسىنداعى كونسۋلى ناتاليا سوروكينا كورەرمەندى كورمەنىڭ اشىلۋىمەن قۇتتىقتاپ: «فوتوونەر سالاسىنداعى مادەني كاسىبي قاۋىمداستىقتار اراسىنداعى ءوزارا ىنتىماقتاستىق پەن بايلانىستى كۇشەيتۋ, سونداي-اق كەلۋشىلەردى ءۇش ەلدىڭ مادەنيەتىمەن, داستۇرىمەن, قازىرگى دامۋىمەن تانىستىرۋ – فوتوكورمەنىڭ باستى ماقساتى. ءبىز بۇل كورمە مادەني بايلانىستاردى نىعايتۋداعى جانە ەلدەر اراسىنداعى ىنتىماقتاستىق ءۇشىن جاڭا مۇمكىندىك جاساۋداعى ماڭىزدى قادام بولاتىنىنا سەنىمدىمىز», دەپ اتاپ ءوتتى.
كورشىلەس ەلدەردى مادەني ىنتىماقتاستىققا ۇيىستىرعان ونەر جارمەڭكەسىن مەملەكەتتىك ورتالىق مۋزەيى, قىتايدىڭ عىلىمي-تانىمدىق فيلمدەر مەن تەلەباعدارلامالار قاۋىمداستىعى, «فوتو جانە ۆيدەوتۇسىرىلىم» جۋرنالى, رەسەيدىڭ كاسىبي فوتوگرافتار ليگاسى بىرلەسە ۇيىمداستىرعان. كورمە فوتوونەر مەن ۆيدەوتۇسىرىلىمنىڭ زاماناۋي جەتىستىكتەرى تۋرالى سىر شەرتىپ, سالا ماماندارىن كاسىبي دامۋعا شاقىرادى. سەبەبى ورتا ازيا ەلدەرىندە كاسىبي فوتوشەبەرلەردى بىرىكتىرەتىن ورتاق الاڭ كوپ ەمەس.
«فوتوگرافتار مەن تسيفرلىق فوتوسۋرەتشىلەر وداعى» قب پرەزيدەنتى داريا دۋنيچ: ء«بىز ارىپتەستەرىمىزگە ەۋروپالىق ديپلومدار مەن بىلىكتىلىك الۋعا كومەكتەسەمىز, كورمەلەر, دارىستەر ۇيىمداستىرامىز, ساۋدا كورمەلەرىنە قاتىسامىز. ليگانىڭ باستى مىندەتى – جوعارى ساپالى سۋرەتتەردى ناسيحاتتاۋ. بىرلەستىك ونەرگە جانە جالپى فوتو مادەنيەتتىڭ دامۋىنا ۇقساس كوزقاراستارى بار كاسىبي فوتوگرافتار مەن فوتواۋەسقويلار مۇددەسىن بىلدىرەدى» دەپ مالىمدەدى.
«ەل مەن ەلدى, ۇلت پەن ۇلتتى ءبىر-بىرىنە جاقىنداستىرا تۇسەتىن قۋاتتى كۇش – مادەني بايلانىستار. مەملەكەتتىك ورتالىق مۋزەي ەلىمىزدىڭ جەتەكشى مادەني-ءبىلىم بەرۋ ورتالىعى رەتىندە تاريحي مۇرانى, مادەني جانە ءبىلىم بەرۋ باستامالارىن دامىتۋدى كوزدەيدى. فوتومادەنيەت تاقىرىبىندا كەزدەسۋلەر ۇيىمداستىرۋ جانە كونفەرەنتسيالار وتكىزۋ, فوتوگرافيالىق مۇرانى ساقتاۋ ارقىلى ەلىمىزدە جانە سول سياقتى شەتەلدە قازاقستاننىڭ وڭ ءيميدجىن قالىپتاستىرۋ ماڭىزدى مىندەت. شەتەلدىك ارىپتەستەرمەن بىرلەسە وتىرىپ, مەملەكەتتەر اراسىنداعى مادەني بايلانىستاردى نىعايتۋعا باعىتتالعان جوبالاردى جۇزەگە اسىرا بەرەمىز», دەيدى مەملەكەتتىك ورتالىق مۋزەي ديرەكتورى راشيدا حاريپوۆا.
الماتى