دەنساۋلىق ساقتاۋ مينيسترلىگى مەن تۇركيانىڭ «Orhun Medical» كومپانياسى ونكولوگيالىق اۋرۋلارى بار پاتسيەنتتەر ءۇشىن ەمدەۋ مەن دياگنوستيكانىڭ ساپاسى مەن قولجەتىمدىلىگىن جاقسارتۋعا باعىتتالعان اۋقىمدى جوبانى ىسكە اسىرۋ تۋرالى كەلىسىمگە قول قويدى.
«جابدىقتالعان ورتالىقتاردىڭ اشىلۋى ونكولوگيامەن اۋىراتىن ناۋقاستارعا شەتەلگە شىقپاي-اق, ەل ىشىندە الەمدىك ستاندارتتار دەڭگەيىندە جوعارى ءتيىمدى دياگنوستيكا مەن قاۋىپسىز ەم الۋعا مۇمكىندىك بەرەدى. جاڭا تەحنولوگيالاردىڭ كومەگىمەن وبىردى دۇرىس جانە ۋاقتىلى ەمدەۋ اۋرۋدىڭ انىقتالۋىن جاقسارتۋعا, ءومىر ءسۇرۋدىڭ بەس جىلدىق شەگى بار پاتسيەنتتەردىڭ ۇلەسىن ارتتىرۋعا, ونكولوگيالىق ناۋقاستاردىڭ ءومىر ءسۇرۋ ساپاسىن ارتتىرۋعا مۇمكىندىك بەرەدى», دەپ اتاپ ءوتتى قول قويۋ بارىسىندا دەنساۋلىق ساقتاۋ ءمينيسترى اقمارال ءالنازاروۆا.
كەلىسىم شەڭبەرىندە الماتى قالاسىندا پەت/كت, بفەكت/كت ءۇشىن تالاپ ەتىلەتىن راديوفارمپرەپاراتتاردى ءوندىرۋ ءۇشىن عيمارات سالۋ جانە ارنايى جابدىقپەن - تسيكلوتروندى كەشەنمەن جاراقتاندىرۋ كوزدەلگەن.
اقتاۋ, اقتوبە, قاراعاندى, قىزىلوردا جانە وسكەمەن قالالارىندا كومپيۋتەرلىك توموگرافيامەن (پەت/كت) بىرىكتىرىلگەن پوزيتروندىق-ەميسسيالىق توموگرافيانىڭ جاڭا ورتالىقتارى قۇرىلاتىن بولادى.
الماتى قالاسىندا قاتەرلى ىسىكتەردى دياگنوستيكالاۋ مەن تەراپيانىڭ پروگرەسسيۆتى كەشەندى ادىستەرىن ەنگىزۋ ءۇشىن ءبىر فوتوندىق-ەميسسيالىق توموگرافيامەن جانە كومپيۋتەرلىك توموگرافيامەن ۇشتاستىرا وتىرىپ راديويزوتوپتىق پرەپاراتتار قولدانىلاتىن تەرانوستيكا ورتالىعىن اشۋ جوسپارلانىپ جاتىر.