ءال-فارابي اتىنداعى قازاق ۇلتتىق ۋنيۆەرسيتەتىندە جوعارى ءبىلىم بەرۋ ماسەلەلەرىنە ارنالعان QS Higher Education: Asia Pacific 2024 پرە-ءسامميتى ءوتتى. حالىقارالىق شارا QS ازيا-تىنىق مۇحيتى ءسامميتىنىڭ 20 جىلدىق مەرەيتويىنا وراي ۇيىمداستىرىلدى.
جيىنعا QS Quacquarelli Symonds ساراپتاما اگەنتتىگىنىڭ كوممەرتسيالىق باس ديرەكتورى دجەيسون نيۋمان, قر پرەزيدەنتىنىڭ كەڭەسشىسى مالىك وتارباەۆ, قر عىلىم جانە جوعارى ءبىلىم ءمينيسترى ساياسات نۇربەك, ءال-فارابي اتىنداعى قازۇۋ-دىڭ باسقارما توراعاسى – رەكتور جانسەيىت تۇيمەباەۆ, الماتى قالاسىنىڭ اكىمى ەربولات دوساەۆ, ەاەو ەلدەرىندەگى كليەنتتەرمەن سەرىكتەستىك جونىندەگى جانە QS جاھاندىق ۇكىمەتىندەگى ايماقتىق ديرەكتورى سەرگەي حريستوليۋبوۆ قاتىستى. سونىمەن قاتار 150 مەملەكەتتەن, اتاپ ايتقاندا قىتاي, جاپونيا, يندونەزيا, ءۇندىستان, مالايزيا, ت.ب. وزگە ەلدەردەن كەلگەن 350-گە جۋىق جوو رەكتورلارى, حالىقارالىق ساراپشىلار جانە وتاندىق جوعارى ءبىلىم باسشىلارى قاتىستى.
شارانى ءال-فارابي اتىنداعى قازاق ۇلتتىق ۋنيۆەرسيتەتىنىڭ رەكتورى جانسەيىت تۇيمەباەۆ قۇتتىقتاۋ سوزبەن اشتى.
«مەملەكەت باسشىسى قاسىم-جومارت توقاەۆ: ء«بىلىم مەن عىلىمعا وزىق حالىقارالىق تاجىريبە اۋاداي قاجەت. ۋنيۆەرسيتەتتەر مەن عىلىمي ۇيىمدار ەلدىڭ الەۋمەتتىك-ەكونوميكالىق دامۋىنا زور ۇلەس قوساتىن ستراتەگيالىق ورتالىق بولۋى كەرەك», دەپ اتاپ وتكەن بولاتىن. بۇگىندە جاhاندىق ەكونوميكانى دامىتۋدا ۋنيۆەرسيتەتتىك عىلىم ماڭىزدى ءرول اتقارىپ وتىر. جاھاندىق ترەندتەر مەن زاماناۋي سىن-قاتەرلەر جوعارى ءبىلىمنىڭ دامۋىن ايقىندايدى. QS – الەمدەگى ۋنيۆەرسيتەتتەردىڭ كورسەتكىشى مەن ناتيجەسىن كورسەتەتىن ەڭ بەدەلدى حالىقارالىق رەيتينگتەردىڭ ءبىرى. سوندىقتان بىلىكتى مامان دايارلاۋدا, عىلىمي زەرتتەۋ ناتيجەلەرىن وندىرىسكە ەنگىزۋدە وزىق تاجىريبەلەردى جەتىلدىرىپ وتىرۋ قاجەت», دەدى رەكتور.
ءوز كەزەگىندە QS Quacquarelli Symonds ساراپتاما اگەنتتىگىنىڭ كوممەرتسيالىق باس ديرەكتورى دجەيسون نيۋمان شارانىڭ قازاقستانداعى كوشباسشى ۋنيۆەرسيتەت – قازۇۋ-دا ءوتىپ جاتقانىنىڭ ماڭىزدىلىعىنا توقتالدى.
«QS پرە-ءسامميتىن قازاقستاندا, سونىڭ ىشىندە كوشباسشى جوعارى وقۋ ورىندارىنىڭ ءبىرى – ءال-فارابي اتىنداعى قازۇۋ-دا ءوتىپ جاتقانىنا قۋانىشتىمىن. جاھاندىق ماسەلەلەردى جالعىز شەشە المايمىز, بارلىعىمىز بىرگە جۇمىس ىستەۋىمىز ماڭىزدى. بۇگىنگى ءىس-شارا الەمدەگى ۋنيۆەرسيتەت رەكتورلارىنىڭ باسىن قوسىپ, جوعارى ءبىلىم مەن عىلىم سالاسىنداعى حالىقارالىق دەڭگەيدەگى ماسەلەلەردى شەشۋگە مۇرىندىق بولىپ وتىر. QS رەيتينگى بارلىق جوو-لاردىڭ ءبىر-بىرىمەن تىعىز جۇمىس ىستەۋ, اكادەميالىق ۇتقىرلىق باعدارلاماسىن دامىتۋ, عالىمداردىڭ تاجىريبە الماسۋ, الەۋەتىن ارتتىرۋ باعىتىنداعى جۇمىستارىن جانداندىرۋعا سەرپىن بەردى», دەدى دجەيسون نيۋمان.
پلەنارلىق وتىرىستا مالىك وتارباەۆ مەملەكەت باسشىسى قاسىم-جومارت توقاەۆتىڭ ىستىق ىقىلاسىن جەتكىزدى.
«پرەزيدەنتىمىز «وزىق ويلى ۇلتقا اينالۋىمىز كەرەك», دەگەن نەگىزگى ماقساتتى ۇلتتىق قۇرىلتايدا ايقىنداپ بەردى. عىلىم مەن جوعارى ءبىلىمدى دامىتۋ – ەلىمىز ءۇشىن ستراتەگيالىق ماڭىزى بار باسىمدىق. جوعارى ءبىلىم يننوۆاتسيالىق جانە تۇراقتى ەكونوميكانى قۇرۋعا, مەملەكەتتىڭ باسەكەگە قابىلەتتىلىگىن ارتتىرادى. بىلىكتى مامانداردىڭ ءبىلىمى مەن دايىندىعىنا قاتىستى ماسەلەلەر حالىقارالىق ىنتىماقتاستىقتى, ديالوگتى جانە تاجىريبە الماسۋدى تالاپ ەتەدى. پرە-سامميت ازيا-تىنىق مۇحيتى ايماعىندا جانە ودان تىس جەرلەردە ءبىلىم بەرۋ جۇيەسىن جەتىلدىرۋگە, جوعارى وقۋ ورىندارىنىڭ باسەكەگە قابىلەتتىلىگىن ارتتىرۋعا باعىتتالعان», دەپ اتاپ ءوتتى مالىك وتارباەۆ.
ءىس-شارا بارىسىندا عىلىم جانە جوعارى ءبىلىم ءمينيسترى ساياسات نۇربەك وتاندىق ۋنيۆەرسيتەتتەردىڭ جوعارى ءبىلىم مەن عىلىم سالاسىن دامىتۋ باعىتىندا جۇرگىزىپ جاتقان جۇمىستارى تۋرالى بايانداما جاسادى. مينيستر QS الەمدىك رەيتينگىنە وتاندىق 21 جوعارى وقۋ ورنى قاتىساتىنىن جانە جاقسى ناتيجەلەرگە قول جەتكىزىپ وتىرعانىن اتاپ ءوتتى.
ءمينيستردىڭ ايتۋىنشا, قازاقستان الەمدىك ۋنيۆەرسيتەتتەرمەن سەرىكتەستىكتى ارتتىرۋ باعىتىندا جۇيەلى جۇمىستار جۇرگىزىپ كەلەدى. بۇل – ۋنيۆەرسيتەتتەردىڭ بەدەلىن ارتتىرۋعا مول مۇمكىندىك بەرەدى. بيىلعى وقۋ جىلىندا 30 مىڭعا جۋىق شەتەلدىك ستۋدەنت قازاقستانعا وقۋعا كەلدى. سوڭعى ەكى جىلمەن سالىستىرعاندا 10 مىڭ ستۋدەنتكە كوپ. الەمدە اۋقىمدى ءۇش رەيتينگ بار. ەڭ ماڭىزدىسى – QS حالىقارالىق رەيتينگى. بۇل رەيتينگكە قازاقستاننىڭ 21 ۋنيۆەرسيتەتى قاتىسادى. سونىڭ ىشىندە ءال-فارابي اتىنداعى قازۇۋ وتاندىق ۋنيۆەرسيتەتتەر اراسىندا كوش باستاپ, 163-ورىندا تۇر.
پلەنارلىق وتىرىس عالامدىق تاقىرىپتارعا ارنالعان سەكتسيالاردا جالعاسىپ, QS جاھاندىق ۇكىمەتىندەگى ايماقتىق ديرەكتورى سەرگەي حريستوليۋبوۆ QS World University Rankings 2025 رەيتينگىندەگى بىرقاتار ۋنيۆەرسيتەتتەردى ماراپاتتاپ, سەرتيفيكاتتار تابىستادى.
ازيا-تىنىق مۇحيتى ايماعىنداعى جوعارى ءبىلىم بەرۋ ماسەلەلەرى بويىنشا QS ءسامميتى الداعى 5-7 قاراشا كۇندەرى ماكاو قالاسىندا جالعاسادى. قورىتىندى جيىن رەتىندە QS پرە-ءسامميتى 8 قاراشادا گونكونگتا وتەدى دەپ جوسپارلانعان.
الماتى