ەل بالۋانى ءجاميلا باقبەرگەنوۆا كۇرەس تۇرلەرىنەن وليمپيادالىق ەمەس سالماقتا وتكەن الەم ءبىرىنشىلىنىڭ كۇمىس مەدالىن جەڭىپ الدى, دەپ جازادى Egemen.kz.
72 كەلىدە قازاقستان نامىسىن قورعاعان جاميلا باقبەرگەنوۆا فينالدا جاپونيالىق بالۋانعا ەسە جىبەردى. قورىتىندى ەسەپ 8:6 ۇپايمەن جەڭىس امي ءيسيدىڭ ەنشىسىنە جازىلدى.
وسىلايشا ايەلدەر ۇلتتىق قۇراماسىنىڭ كوشباسشىسى ءجاميلا سپورتتىق مانسابىندا ءۇشىنشى رەت الەم چەمپيوناتىنىڭ كۇمىس جۇلدەگەرى اتاندى. سونداي-اق ونىڭ قورجىنىندا الەم بىرىنشىلىگىنىڭ «قولا» مەدالى دە بار.
ءجاميلا باقبەرگەنوۆا قازاق قىزدارى اراسىنان الەم چەمپيوناتتارىندا 4 مارتە جۇلدە العان العاشقى بالۋان ەكەنىن ايتا كەتۋ كەرەك.
ول فينالعا دەيىنگى 1/8 باسەكەسىندە ەميليا كرەچۋن 10:0 ەسەبىمەن تىزە بۇكتىرسە, 1/4 فينالدا ادەل گانزليچكوۆادان (ەۋروپا چەمپيوناتىنىڭ قولا جۇلدەگەرى) 6:3 ۇپاي سانىمەن باسىم ءتۇستى. جارتىلاي فينالدىق بەلدەسۋدە بولورتۋياا زوريگتتى (ازيا چەمپيونى) 8:6 ەسەبىمەن جولدا قالدىردى.