ماشينا جاساۋ سالاسىندا ەكىباستۇز جانە ساران قالالارىندا 2 تۇراقتى كلاستەر قالىپتاسقان. كلاستەرلىك ءتاسىلدى ماشينا جاساۋدىڭ باسقا سەكتورلارىنا دا تاراتۋ جوسپارلانعان. بۇل تۋرالى ۇكىمەت وتىرىسىندا ونەركاسىپ جانە قۇرىلىس ءمينيسترى قانات شارلاپاەۆ مالىمدەدى, دەپ حابارلايدى Egemen.kz ۆەدومستۆونىڭ ءباسپاسوز قىزمەتىنە سىلتەمە جاساپ.
ءمينيستردىڭ ايتۋىنشا, ەكىباستۇزدا تەمىرجول سالاسىنا ارنالعان بۇيىمداردىڭ كەڭ سپەكترىن شىعاراتىن 6 كاسىپورىننان تۇراتىن كلاستەر قۇرىلعان. وندا 2 مىڭ ادام جۇمىس ىستەيدى. قوسىمشا تاعى 739 جۇمىس ورنىن اشاتىن 104,2 ملرد تەڭگەگە 3 جوبا ىسكە اسىرىلىپ جاتقاندىعى بەلگىلى بولدى.
ايتا كەتەيىك, ساران قالاسىندا 6 كاسىپورىننان تۇراتىن كلاستەر قۇرىلعان, ونىڭ 3-ءى ماشينا جاساۋ سالاسىنا قاتىستى.
«ماشينا جاساۋدىڭ 2 جاڭا جوباسىن, ونىڭ ىشىندە تۇرمىستىق تەحنيكاعا ارنالعان ەلەكتر كومپونەنتتەرىن ءوندىرۋ ءۇشىن لوكاليزاتسيالىق ورتالىق قۇرۋ جونىندەگى جوبانى ىسكە اسىرۋ قوسىمشا پىسىقتالىپ جاتىر. ناتيجەسىندە ءبىز وسى قالالاردىڭ ەكونوميكاسىن ارتاراپتاندىرۋعا قول جەتكىزدىك, بۇل ساراندى مونوقالا مارتەبەسىنەن شىعارۋعا مۇمكىندىك بەردى», دەدى قانات شارلاپاەۆ.