23 قازان كۇنى سىبايلاس جەمقورلىققا قارسى كۇرەس اگەنتتىگىنىڭ توراعاسى ا.جۇماعاليدىڭ باسشىلىعىمەن جول سالاسىنداعى جەمقورلىق تاۋەكەلدەرىن جويۋ بويىنشا ۆەدومستۆوارالىق كەڭەس ءوتتى, دەپ جازادى Egemen.kz.
جيىنعا كولىك ءمينيسترى م. قاراباەۆ, جوعارى اۋديتورلىق پالاتانىڭ, ستراتەگيالىق جوسپارلاۋ, باسەكەلەستىكتى قورعاۋ جانە دامىتۋ اگەنتتىكتەرىنىڭ, قارجى, ونەركاسىپ جانە تسيفرلاندىرۋ مينيسترلىكتەرىنىڭ, «اتامەكەن» ۇكپ, سونداي-اق جەرگىلىكتى اتقارۋشى ورگانداردىڭ وكىلدەرى قاتىستى.
كەڭەستە جول سالاسىنا قاتىستى جەمقورلىق جاعدايلارىنا سىرتقى تالداۋ جۇرگىزىلدى.
كەيىنگى 5 جىلدا جول سالاسىنا 6 ترلن تەڭگەدەن استام قاراجات جۇمسالعان. دەسە دە, جينالعاندار جول جەلىسىنىڭ جاي-كۇيىنە قاتىستى حالىق تاراپىنان شاعىم ءجيى تۇسەتىنىن اتاپ ءوتتى.
«ماسەلەن, 2023-2024 جىلدارى مەملەكەتتىك ورگاندارعا اۆتوموبيل جولدارىنىڭ ساپاسىزدىعىنا قاتىستى 20 مىڭنان استام شاعىم تۇسكەن. جۇرتشىلىق مۇنى جەمقورلىقپەن بايلانىستىرادى. وسى جىلدىڭ باسىنان بەرى عانا اگەنتتىك وسى سالادا 24 قىلمىستىق ءىستى تىركەدى. سىرتقى تالداۋ جوسپارلاۋدان باستاپ باقىلاۋ مەن كۇتىپ ۇستاۋعا دەيىنگى جول قۇرىلىسى مەن جوندەۋدىڭ بارلىق كەزەڭدەرىندە جۇيەلى جەمقورلىق تاۋەكەلدەرىنىڭ بار ەكەنىن كورسەتتى», دەلىنگەن اگەنتتىك حابارلاماسىندا.
سونداي-اق ەلدەگى جولداردىڭ ساپاسىز بولۋىنا قاتىستى سەبەپتەر تالداندى. سالانى دامىتۋ ءۇشىن قازاقستانداعى جول عىلىمي-زەرتتەۋ ينستيتۋتىنىڭ الەۋەتى تولىق كولەمدە پايدالانىلمايتىنى ايتىلدى. قولدانبالى عىلىمي زەرتتەۋلەر مەن يننوۆاتسيالاردى ەنگىزۋدىڭ ورنىنا ينستيتۋت نورماتيۆتىك قۇجاتتامانى ازىرلەۋمەن اينالىسىپ وتىرعانىنا نازار اۋدارىلدى.
جول سالۋ ىسىندە جاڭا تەحنولوگيالاردى ەنگىزۋ كەزىندە باقىلاۋدىڭ بولماۋى, بىلىكتى كادرلاردىڭ جەتىسپەۋشىلىگى جانە كۇردەلى نورماتيۆتىك-قۇقىقتىق بازا دا اۆتوجولداردىڭ ساپاسىنا كەرى اسەر ەتىپ وتىر.
«تسيفرلاندىرۋدىڭ جەتكىلىكسىزدىگى پروبلەمانى ۋشىقتىرادى. كەيىنگى 10 جىلدا اقپاراتتىق جۇيەلەردى دامىتۋعا 16 ملرد بيۋدجەت قاراجاتى جۇمسالدى. دەگەنمەن, جولداردىڭ تسيفرلىق كارتاسى ءالى ازىرلەنبەگەن. تالداۋ قورىتىندىسى بويىنشا اگەنتتىك وسى سالاداعى جەمقورلىق تاۋەكەلدەرىن جويۋ بويىنشا 90-نان استام ۇسىنىس دايىندادى», دەلىنگەن اگەنتتىك حابارلاماسىندا.