الماتىدا رەسپۋبليكا كۇنىنە ارنالعان سالتاناتتى ءىس-شارا ءوتىپ, مەملەكەت باسشىسىنىڭ اتىنان مادەنيەت جانە اقپارات ءمينيسترى ايدا بالاەۆا ەلدىڭ دامۋىنا ەلەۋلى ۇلەس قوسقان مادەنيەت جانە ونەر قايراتكەرلەرىنە, جۋرناليستەرگە, اقپارات سالاسىنىڭ وكىلدەرىنە مەملەكەتتىك ناگرادالار تابىس ەتتى.
«بارشاڭىزدى ەلىمىزدىڭ ۇلىق مەرەكەسى – رەسپۋبليكا كۇنىمەن شىن جۇرەكتەن قۇتتىقتايمىن! كەشە پرەزيدەنت جارلىعىمەن ەلىمىزدىڭ دامۋىنا زور ۇلەس قوسىپ جۇرگەن ءبىر توپ ازامات مەملەكەتتىك ناگرادالارمەن ماراپاتتالدى. ولاردىڭ قاتارىندا ونەر قايراتكەرلەرى, بەلگىلى قالامگەرلەر, عالىمدار, ءتۇرلى سالانىڭ وكىلدەرى, ەڭ باستىسى, قاراپايىم ەڭبەك ادامدارى بار. بۇل مەملەكەت باسشىسىنىڭ قوعامدا ەڭبەكقورلىق پەن كاسىبي بىلىكتىلىك قۇندىلىقتارىن دارىپتەۋ باستاماسىنىڭ ايقىن كورىنىسى ەكەنى ءسوزسىز», دەدى مينيستر.
پرەزيدەنت جارلىعىمەن اقىن يسرايل ساپاربايعا «قازاقستاننىڭ حالىق جازۋشىسى» اتاعى بەرىلدى.
«قازاقستاننىڭ حالىق ءارتىسى» اتاعىنا تەاتر ارتىستەرى ءجاميليا باسپاقوۆا, ولگا كورجەۆا, ليديا كادەن, ريحان ماحپيروۆا يە بولدى.
«قازاقستاننىڭ ەڭبەك سىڭىرگەن قايراتكەرى» اتاعى تاتيانا كوستيۋچەنكوعا, مارزيا ماميدولديناعا, سافۋان رىسباي ۇلىنا, سەرگەي پوپوۆقا, اجار يۋسۋپوۆاعا, ولەگ تاتاميروۆقا بەرىلدى.
سونىمەن قاتار بىرقاتار ازامات «پاراسات», «قۇرمەت» وردەندەرىمەن, «ەرەن ەڭبەگى ءۇشىن» مەدالىمەن, مادەنيەت جانە اقپارات مينيسترلىگىنىڭ «ەڭبەك ارداگەرى» ۆەدومستۆولىق مەدالىمەن ماراپاتتالدى.