سەمەي قالاسىنداعى قاراعايلى شاعىن اۋدانىندا جاڭا پاتەرلەر پايدالانۋعا بەرىلدى. باسپانا كەزەگىندە تۇرعان الەۋمەتتىك وسال توپتارعا جاتاتىن, اتا-اناسىنىڭ قامقورلىعىنسىز قالعان 30 ازامات سوڭعى ۇلگىدە سالىنعان باسپاناعا قول جەتكىزدى. ۇيدە مۇمكىندىگى شەكتەۋلى جانداردىڭ كىرىپ-شىعۋىنا قولايلى جاعداي جاسالعان.
سالتاناتتى ءىس-شارادا ءسوز الىپ, جاڭا پاتەرلەردىڭ كىلتىن تابىستاعان قالا اكىمى نۇربول نۇرساعاتوۆ: «2022 جىلدان بەرى پرەزيدەنت قاسىم-جومارت توقاەۆتىڭ شەشىمىمەن 25 قازان – رەسپۋبليكا كۇنى ۇلتتىق مەرەكە بولىپ بەكىتىلدى. وسىنداي ايتۋلى ءىس-شارا اياسىندا ەرەكشە قاجەتتىلىكتەرى بار ازاماتتار, اتا-انا قامقورلىعىنسىز قالعان تۇرعىنداردىڭ باسپاناعا قول جەتكىزۋى – ەل يگىلىگى جولىندا قىزمەت اتقارىپ جاتقان بارشا جاننىڭ ناتيجەلى جۇمىسى. جاڭا پاتەرلەردىڭ يەگەرلەرى اتانىپ وتىرعان بارشاڭىزدىڭ شاڭىراقتارىڭىز بەرەكەگە تولسىن», دەپ ىزگى تىلەگىن ارنادى.
سەمەي قالاسىندا كەيىنگى جىلدارى قۇرىلىس قارقىنى ارتىپ كەلەدى. وسىعان دەيىن بوي كوتەرگەن تۇرعىن ۇيلەردەن 525 وتباسى جاڭا پاتەردىڭ كىلتىن العان. تامىز ايىندا 237 پاتەردىڭ كىلتتەرى كەزەك تارتىبىمەن تابىستالسا, بيىل ناۋرىز ايىندا دا قاراعايلى شاعىن اۋدانىندا تۇرعىن ءۇي كەزەگىندە تۇرعان 77 ازامات باسپانامەن قامتىلدى. ال وتكەن جىلى 211 وتباسى پاتەرگە يە بولدى.
سەمەي