رەسپۋبليكا كۇنىنە وراي حالىقارالىق «قازاق ءتىلى» قوعامى مەن قازاقستاننىڭ اقش-تاعى ەلشىلىگى الەمدەگى ەڭ ۇلكەن كىتاپحانا سانالاتىن – اقش كونگرەسى كىتاپحاناسىنىڭ قورىنا قازاق ءتىلى, رۋحانياتى مەن مادەنيەتى ءۇشىن اسا ماڭىزدى بىرقاتار كىتاپ تاپسىردى.
اتاپ ايتقاندا, كونگرەسس كىتاپحاناسىنىڭ قورىنا حالىقارالىق «قازاق ءتىلى» قوعامى دايىنداپ شىعارعان Oxford Qazaq Dictionary سوزدىگى, اعىلشىن تىلىندەگى اباي شىعارمالارىنىڭ جيناعى, م.اۋەزوۆ اتىنداعى ادەبيەت جانە ونەر ينستيتۋتى باستىرعان « ۇلى دالا ويىندارى» جانە «قازاقتىڭ وتباسى فولكلورى» دەپ اتالاتىن ەڭبەكتەر قوسىلدى. بۇعان دەيىن كونگرەسس كىتاپحاناسىنا اعىلشىن تىلىندە شىققان «قازىرگى قازاق پروزاسى», «قازىرگى قازاق پوەزياسى» اتتى انتولوگيالارى تاپسىرىلعان ەدى. بۇل ءىس-شارا – اقش-تاعى قازاقستان ەلشىلىگىنىڭ باستاماسىمەن قولعا الىنعان جىل سايىنعى ءداستۇر.
قازاق مادەنيەتى مەن ادەبيەتىن, تاريحىن دارىپتەيتىن كىتاپتاردىڭ جىل سايىن شەكارا اتتاپ, ءار ەلدىڭ الەمدىك كىتاپحانالارىنان ءتيىستى ورىن الىپ جاتقانىنا دا ءبىراز جىلدىڭ ءجۇزى بولدى. بۇل ءۇردىس – ەلىمىزدىڭ وسى سالاداعى جۇمىستارىنىڭ قاۋىرت جۇرگىزىلىپ جاتقانىنىڭ ايعاعى. كىتاپ قورى 5 ميلليوننان اساتىن اقش كونگرەسىنىڭ كىتاپحاناسىنان قازاقشا كىتاپتاردىڭ تابىلۋى دا ۇلكەن مادەني جەتىستىكتىڭ ءبىرى بولماق.