بۇگىن اقش-تىڭ قازاقستانداعى توتەنشە جانە وكىلەتتى ەلشىسى دەنيەل روزەنبليۋم استاناداعى ÖzgeEpiس كرەاتيۆ حابىنا ارنايى قوناق رەتىندە كەلىپ, بىرقاتار مادەني, شىعارماشىلىق جوبالاردى تاماشالادى. بۇل ساپار مادەنيەتارالىق ديالوگتىڭ, ونەر مەن ءبىلىمنىڭ ءوزارا بايلانىسىن نىعايتۋدىڭ ايقىن كورىنىسى. ەلشى روزەنبليۋمگە كەڭىستىكتىڭ نەگىزىن قالاۋشىلار اپالى-ءسىڭلى توعجان جانە ماقپال حانىمدار كرەاتيۆ حاب جۇمىسىن تانىستىردى.
ەڭ الدىمەن ەلشى «ÖzgeEpic» كىتاپحاناسىن ارالادى. ونەر كەڭىستىگىندەگى كىتاپ قورىنا ەرەكشە نازار اۋدارىپ, 300-گە جۋىق قازاق تىلىندەگى كىتاپتى تارتۋ ەتتى. ەلشىنىڭ نازارىنا «اسپان جىلقىلارى» كورمەسى ۇسىنىلدى. بۇل – ۇلتتىق قۇندىلىقتاردى دارىپتەيتىن باعالى كوللەكتسيا ءحىح–ححى عاسىرلار ارالىعىنداعى ات ابزەلدەرىن نەگىز ەتكەن بىرەگەي جادىگەرلەر توپتاماسى. سول ءۇشىن دە ۇلتتىق ناقىش پەن زاماناۋي كوركەمدىك شەشىم ەلشىنىڭ جوعارى باعاسىنا يە بولدى.
كەزدەسۋ بارىسىندا ەلشى ەتنو-مۇراجايمەن دە تانىستى. مۇندا قازاقتىڭ قولونەر تۇرلەرى مەن تۋىندىلارى كورسەتىلدى. «ÖzgeEpic» كرەاتيۆ حابىنىڭ جەتەكشىسى توعجان قۇرمانجانقىزى اقش ەلشىسىنە قازاقتىڭ ۇلتتىق مادەنيەتىنىڭ ماڭىزىن ءتۇسىندىرىپ, سىي رەتىندە اسىق توپتاماسىن تارتۋ ەتتى. سونىمەن بىرگە وسمان مۇراعاتتارىنان تابىلعان قازاق حاندارى مەن وسمان سۇلتاندارى اراسىنداعى ديپلوماتيالىق قۇجاتتاردىڭ تۇپنۇسقا كوشىرمەلەرى تانىستىرىلدى. ولاردىڭ تاريحى مەن ديپلوماتيالىق ماڭىزى ەلشىنىڭ ەرەكشە قىزىعۋشىلىعىن تۋعىز- دى.
كەزدەسۋ بارىسىندا اقش ديپلوماتىنا تانىستىرىلعان كەلەسى جوبا – ءبىلىمدى تۇراقتى دامىتۋ قورىمەن بىرلەسە جاسالعان «اۋىل مەكتەبى» فوتوكورمەسى. بۇل جوبا – اۋىل مەكتەپتەرىنىڭ دامۋى مەن ولاردىڭ جەرگىلىكتى قوعامعا تيگىزگەن اسەرىن بەينەلەيتىن الەۋمەتتىك جوبا. ءىس-شارا سوڭىندا دەنيەل روزەنبليۋم مىرزا «ÖzgeEpic» قابىرعاسىنا ەستەلىك رەتىندە ءوز لەبىزىن قالدىردى. ەلشى مىرزانىڭ بۇل ساپارى ەكى ەل اراسىنداعى مادەني ديالوگتىڭ ماڭىزىن كورسەتتى.