قازاقستانداعى رەسپۋبليكالىق ماڭىزى بار اۆتوجولداردا ءار كولىكتىڭ ورتاشا جىلدامدىعىن ولشەيتىن ارنايى جۇيە ورناتىلىپ جاتىر, دەپ حابارلايدى Egemen.kz.
- قازىر ءبىزدىڭ كامەرالاردى اكىمشىلىك قۇقىق بۇزۋشىلىقتىڭ بىرىڭعاي ءتىزىلىمى جۇيەسىنە قوسىپ ورناتۋ ءجۇرىپ جاتىر. جەلتوقسان ايىنىڭ ورتاسىنا قاراي بۇل ينتەگراتسيانى اياقتايمىز دەپ ويلايمىن. وسىدان كەيىن ەرەجە بۇزۋ دەرەكتەرىن ەسەپكە الۋ باستالادى, – دەدى كولىك ءمينيسترى مارات قاراباەۆ پارلامەنت ماجىلىسىندە تىلشىلەر ساۋالىنا وراي.
مينيستر بۇل كامەرالار جول ەرەجەسىن ورەسكەن بۇزاتىن ادامداردى انىقتاۋ ماقساتىندا قويىلىپ جاتقانىن ايتتى.
ونىڭ سوزىنە قاراعاندا, "استانا-بۋراباي" جولىندا ساعاتىنا 140 كم جىلدامدىقپەن جۇرۋگە رۇقسات ەتىلگەن. الايدا, وسى جولدا ساعاتىنا 200 كم-دەن جوعارى جىلدامدىقپەن ءجۇرىپ وتكەندەردىڭ بار ەكەنى انىقتالعان.
سونىمەن قاتار م. قاراباەۆ قالا ىشىندەگى جولداردا ورتاشا جىلدامدىقتى باقىلايتىن جۇيە ورناتىلمايتىنىن اتاپ ءوتتى.