پرەزيدەنت قاسىم-جومارت توقاەۆ «ادىلەتتى قازاقستان: زاڭ مەن ءتارتىپ, ەكونوميكالىق ءوسىم, قوعامدىق وپتيميزم» جولداۋىندا مەملەكەت مۇقتاج ادامدارعا قاشاندا قولداۋ كورسەتەتىنىن ايتقان ەدى. حالىقتى قولداۋ تاسىلدەرىن جەتىلدىرىپ, الەۋمەتتىك كومەك ءادىل, اشىق ءبولىنىپ, ءتيىمدى جۇمسالۋعا ءتيىس ەكەنىن ەسكەرتتى.
بيىلعى 14 قازانعا دەيىنگى مالىمەتكە سايكەس, 12 530 ادام ارناۋلى الەۋمەتتىك كومەك الۋعا ءوتىنىش جازعان. ەڭبەك جانە حالىقتى الەۋمەتتىك قورعاۋ مينيسترلىگى 11 814 ازاماتقا زياندى ەڭبەك جاعدايلارىندا ۇزاق ۋاقىت جۇمىس ىستەگەن ادامدارعا ارنالعان ارناۋلى الەۋمەتتىك تولەم ء(اات) تاعايىندالعانىن جاريا ەتتى.
ەكى كوزدەن, ياعني ەل بيۋدجەتى مەن بىرىڭعاي جيناقتاۋشى زەينەتاقى قورىنان تولەنەتىن ارناۋلى الەۋمەتتىك تولەم الۋعا 3 077 ادام ءوتىنىش جازىپ, ونىڭ ىشىندە 2 963 ادامعا تاعايىندالدى. ال رەسپۋبليكالىق بيۋدجەت, بىرىڭعاي جيناقتاۋشى زەينەتاقى قورى, جۇمىس بەرۋشى, ءومىردى ساقتاندىرۋ ۇيىمى سىندى ءتورت قارجىلاندىرۋ كوزىنەن الەۋمەتتىك تولەم الۋعا 8 928 ادام ءوتىنىش جازىپ, ونىڭ ىشىندە 8 851 ازاماتتىڭ قۇجاتى وتكەن. مۇنىڭ سىرتىندا 474 ازامات ساقتاندىرۋ كومپانياسىمەن زەينەتكەرلىك اننۋيتەت شارتىن جاساسپاق. 51 ازامات ۇيالى تەلەفونىنا جولدانعان سمس حابارلاماعا جاۋاپ بەرمەگەن. مىندەتتى شارتتاردى ورىنداماعاندىقتان, 191 ءوتىنىش بەرۋشىگە ءاات تاعايىندالماپتى.
وڭىرلەردە ارناۋلى الەۋمەتتىك تولەمدەردى الۋعا ءوتىنىش بىلدىرگەندەردىڭ ەڭ كوبى قاراعاندى وبلىسىندا تىركەلدى. 2 كوزدەن – 528, 4 كوزدەن 1 598 ادام تىركەلسە, قوستاناي وبلىسىندا ءاات الۋعا 2 كوزدەن – 334, ال 4 كوزدەن 1 057 ادام قۇجاتىن وتكىزگەن. شىعىس قازاقستان وبلىسىنان 2 كوزدەن تولەم الۋعا – 275, 4 كوزدەن بەرىلەتىن جاردەمگە 1 063 ادام مۇقتاج رەتىندە تىركەلىپتى.
بيىلعى 1 قاڭتاردان باستاپ ەلىمىزدە زياندى ەڭبەك جاعدايىندا ۇزاق ۋاقىت جۇمىس ىستەگەن ادامدارعا ارناۋلى الەۋمەتتىك تولەم تولەنەدى. ارناۋلى الەۋمەتتىك تولەمگە ءوتىنىش جولداۋشىلاردىڭ 55 جاسقا تولۋى, بىرىڭعاي جيناقتاۋشى زەينەتاقى قورىندا (بجزق) كەمىندە 7 جىل كاسىپتىك زەينەتاقى اۋدارىمدارىنىڭ قاراجاتى بولۋى مىندەتتى. تولەم زەينەتكەرلىك جاسقا دەيىن تولەنەدى. ارناۋلى الەۋمەتتىك تولەمدەردى الۋشىلار ەڭبەك جاعدايلارى زياندى جۇمىستارمەن اينالىسپاۋعا ءتيىس. جۇمىسكەرلەر جەڭىل جۇمىسقا اۋىسا الادى, سودان كەيىن ولار جالاقى مەن تولەم الادى نەمەسە دەمالىسقا شىعىپ, زەينەتكە شىققانعا دەيىن ارناۋلى الەۋمەتتىك تولەم الىپ تۇرادى.
بجزق دەرەكتەرىنە سايكەس, ارناۋلى الەۋمەتتىك تولەمدى تاعايىنداۋعا مىندەتتى شارتتاردى ەسكەرە وتىرىپ, وعان 2024 جىلى 37 مىڭنان استام جۇمىسكەر ۇمىتكەر رەتىندە ءوتىنىشىن جولداۋىنا بولادى. تولەمنىڭ ورتاشا مولشەرى 208 مىڭ تەڭگەدەن اسادى. ءاربىر جۇمىسكەرگە تولەم مولشەرى بجزق-داعى جيناقتارىنا بايلانىستى ەسەپتەلەدى. الەۋمەتتىك كودەكسكە سايكەس جۇمىس بەرۋشىلەر كاسىپتەرى مەن قىزمەت تۇرلەرىندە دەنساۋلىققا زياندى ءارى اۋىر جۇمىستارمەن اينالىساتىن جۇمىسكەرلەردىڭ كاسىپتىك زەينەتاقى جارناسىن اۋدارادى.
ارناۋلى الەۋمەتتىك تولەم ەكونوميكانىڭ 17 سالاسىندا, ونىڭ ىشىندە تاۋ-كەن ءوندىرۋ, وڭدەۋ ونەركاسىبىندە, وزگە دە وندىرىستە جۇمىس ىستەيتىن ازاماتتارعا بەرىلەدى.