«بۋراباي» ۇلتتىق پاركىنىڭ ورمان پيتومنيگىندە 2 گەكتار جەرگە 57 200 كوشەت وتىرعىزىلدى, ولاردىڭ ومىرشەڭدىك دەڭگەيى 70-80%-دى قۇرايدى. تابيعي پاركتىڭ ەكولوگيالىق ميسسياسى اياسىندا ۇيىمداستىرىلعان شارا – توپىراقتى دايىنداۋدان باستاپ قايتا وتىرعىزۋ كەزەڭىنە دەيىن مۇقيات ويلاستىرىلعان كوشەتتەردى كۇتۋ جۇيەسىنىڭ ناتيجەسى.
قاراعاي كوشەتتەرىن وتىرعىزۋ بىرنەشە كەزەڭدە جۇزەگە اسىرىلادى. الدىمەن ارامشوپتەر جويىلادى, توپىراق قوپسىتىلادى, اعاشتاردىڭ وسۋىنە وڭتايلى جاعداي جاساۋعا قاجەتتى تىڭايتقىشتار قولدانىلادى. سودان سوڭ پيتومنيك قىزمەتكەرلەرى ماتەريالدىڭ ءوزىن – الدىن-الا وسىرىلگەن, قاجەتتى مولشەرگە جەتكەن قاراپايىم قاراعاي كوشەتتەرىن دايىندايدى.
«پيتومنيكتىڭ ۇلگىلىك بولىمشەسىنە كوشەت وتىرعىزۋ – جاڭا ورمان القاپتارىنىڭ قالىپتاسۋىن قامتاماسىز ەتەتىن ماڭىزدى كەزەڭ. توپىراقتى دايىنداعاننان كەيىن وتىرعىزۋ ۇدەرىسى باستالادى. ءاربىر اعاش الدىن الا قازىلعان ويىقتارعا مۇقيات ورنالاستىرىلادى, بۇل ولاردىڭ ىڭعايلى وسۋىنە قاجەت تەرەڭدىك پەن قاشىقتىقتى قامتاماسىز ەتەدى. وتىرعىزىلعان كوشەتتەرگە ۇنەمى كۇتىم جاساۋ تۇراقتى تەكسەرۋلەردى, سۋارۋدى, سونداي-اق زيانكەستەر مەن اۋرۋلاردان قورعاۋدى قامتيدى», دەدى ورمان پيتومنيگىنىڭ باستىعى بەيبىت ەرعاليەۆ.
وسى جىلدىڭ كوكتەمىندە ورمان پيتومنيگىندە 1,1 گا القاپقا 64,4 كگ قاراعاي تۇقىمى ەگىلدى. سالىستىرا كەتسەك, 2023 جىلى 1 گا جەرگە 60 كگ تۇقىم سەبىلدى, بۇل جۇمىس كولەمىنىڭ ءوسۋ ديناميكاسىن كورسەتەدى.
ء«بىز ونگىشتىگى كەمىندە 60% بولاتىن قاراپايىم 1-سىنىپتى قاراعاي تۇقىمىن سەپتىك. ءونۋ دەڭگەيىنە توپىراق جاعدايلارى, ەگۋدىڭ اگروتەحنيكالىق مەرزىمدەرىن ساقتاۋ, كليماتتىق جاعدايلار, ورمان داقىلدارىنا كۇتىم جاساۋ دا اسەر ەتەدى. ورمان پيتومنيگىنىڭ قىزمەتكەرلەرى اعىمداعى جىلعى ەگىستەردى 8 رەت قولمەن ارامشوپتەن تازارتىپ, وتكەن جىلدارداعى ەگىس جولدارىن كەم دەگەندە 5 رەت تازارتتى, بۇل 20 گەكتاردان استام اۋماق», دەيدى بۋراباي «مۇتپ ورمان پيتومنيگىنىڭ ورماندى قالپىنا كەلتىرۋ جونىندەگى ينجەنەرى بەگزات گابچەنكو.
پيتومنيكتەگى جۇمىستىڭ كۇزگى كەزەڭى «بۋراباي» مۇتپ-نىڭ جاسىل القاپتاردى ساقتاۋ, ۇلعايتۋ جونىندەگى ۇزاق مەرزىمدى ستراتەگياسىن تانىتادى. ءاربىر وتىرعىزىلعان اعاش قامقورلىقتى, كۇتىمدى, قاجىرلى ەڭبەكتى قاجەت ەتەدى. بۇگىنگى تاڭدا دامىپ كەلە جاتقان ورمان داقىلدارى تۇراقتى ەكوجۇيەنىڭ كەپىلى بولادى.