بۇل كۇندەرى اقش-تا ەڭبەك ەتىپ جۇرگەن ەلىمىزدىڭ ازاماتتارى اراسىندا دا دارىندىلار مەن قارىمدىلار از ەمەس. سولاردىڭ ءبىرى – باقىتكەلدى قاسەنوۆ. وتباسىمەن بىرگە الىستاعى امەريكادا تۇرىپ جاتقانىنا بىرەر جىلدىڭ ءجۇزى بولعان قانداسىمىز سپورت سالاسىندا ەلەۋلى تابىستارعا قول جەتكىزىپ ۇلگەردى.
34 جاستاعى باقىتكەلدى جەتىسۋ وبلىسى كەربۇلاق اۋدانىنىڭ تۋماسى. سول وڭىردە ول ءار جىلدارى الەم, ازيا چەمپيونى اتانعان بەرىك جەتپىسباەۆ, مەيىرجان قاشاعانوۆ, ءدىلداش قۇرىشباەۆا تاعى باسقا بەلگىلى بالۋانداردى تاربيەلەگەن مايتالمان مامان باقىت قوقىسبەكوۆتىڭ قول استىندا جاتتىعىپ, كۇرەس ونەرىنىڭ قىر-سىرىنا قانىقتى. كەيىن اسان جولدىباەۆ, ۆارۆارا ماسياگينا, ەرمەك ناسيەۆتەن ءتالىم-تاربيە الدى. قول جەتكىزگەن تابىسى جامان ەمەس. سامبو مەن دزيۋدودان جاسوسپىرىمدەر مەن جاستار اراسىندا وبلىس چەمپيونى بولدى, رەسپۋبليكالىق تۋرنيرلەردە سان مارتە جۇلدەگەرلەر قاتارىنان كورىندى.
سپورت پەن ءبىلىمدى قاتار الىپ جۇرگەن باقىتكەلدى قاسەنوۆتىڭ ءتورت ديپلومى بار. ءاۋ باستا قازاقتىڭ دەنە شىنىقتىرۋ, تۋريزم جانە سەرۆيس كوللەدجىندە وقىسا, كەيىن سپورت جانە تۋريزم اكادەمياسى, ەۋرازيا تەحنولوگيا ۋنيۆەرسيتەتى, قازاق ۇلتتىق اگرارلىق ۋنيۆەرسيتەتىن ءتامامدادى. ءتۇرلى سالادا ەڭبەك ەتىپ, بىرنەشە شەت ءتىلىن جەتىك مەڭگەردى. سول ەڭبەگىنىڭ جەمىسىن كورىپ, سونىمەن قاتار ءبىلىمىن جەتىلدىرۋ ماقساتىندا اقش-قا اتتاندى. بۇل كۇندەرى وتباسىمەن بىرگە لوس-اندجەلەستە تۇرىپ جاتقان قازاقتىڭ ۇلى سپورتتان دا الشاقتاعان جوق.
– بوزبالا شاعىمنان بالۋاندىق ونەرگە اڭسارىم اۋدى. كىندىك قانىم تامعان كەربۇلاق اۋدانىندا دزيۋدو مەن سامبونىڭ دامۋ بارىسى وتە كەرەمەت. باقىت قوقىسبەكوۆ ەسىمدى مىقتى مامان وسى سپورت تۇرلەرىنىڭ سارىوزەك وڭىرىندە دامۋىنا بارىنشا ەڭبەك ءسىڭىردى. مەن سول كىسىنىڭ قول استىندا جاتتىعىپ, بەرىك جەتپىسباەۆ, مەيىرجان قاشاعانوۆتاي اعالارىما ەلىكتەپ ءوستىم. ولاردىڭ سامبودان باعىندىرماعان بەلەسى جوق. دزيۋدودا دا وزدەرىن مويىنداتتى. كەلەسى ايدا باقىت جاكەت ۇلى 70 جىلدىق مەرەيتويىن اتاپ وتكەلى جاتىر. ءسوز ورايى كەلگەندە, ۇلاعاتتى ۇستازىما امەريكادان جالىندى سالەم جولداپ, وسكەلەڭ ۇرپاقتى سپورت پەن سالاماتتىققا باۋلىپ قانا قويماي, ومىردە دە دۇرىس باعىت-باعدار بەرە بىلگەن ابزال ازاماتتى اتاۋلى كۇنمەن قۇتتىقتاعىم كەلەدى, – دەيدى باقىتكەلدى.
جۋىردا عانا امەريكادان قۋانىشتى حابار جەتتى. اينالدىرعان ءبىر اي ىشىندە باقىتكەلدى ءۇش بىردەي ءدۇبىرلى دوداعا قاتىسىپ, بارلىعىندا دا ولجاعا كەنەلدى. اتاپ ايتساق, دزيۋدودان نانكاداعى «Nanka Fall Tournament», سان-حوسەدەگى «San Jose open» تۋرنيرلەرىندە باس جۇلدەنى ولجالادى. سول جارىستاردا مەكسيكالىق حوسە الۆارادو, جاپونيالىق كۋلەن ياموساكي, امەريكالىق روبەرت نيكولس, قىتايلىق جاسون لي مەن داكتا چين سىندى تانىمال سپورتشىلارعا سان سوقتىردى. سونىمەن قاتار دجيۋ-دجيتسۋدان ۇيىمداستىرىلعان لوس-اندجەلەستەگى دودادا قولا مەدالدى موينىندا جارقىراتتى. ب.قاسەنوۆتىڭ ەندىگى ماقساتى – حالىقارالىق ارەنادا اتوي سالۋ.