«ATP 250 Almaty Open» ءتۋرنيرى اياقتالدى. جۇلدە قورى 1 036 700 دوللاردى قۇراعان ءدۇبىرلى دودادا الەمنىڭ بىرقاتار بەلدى تەننيسشىسى ونەر كورسەتتى. جەكەلەگەن سايىستا جەڭىمپاز اتانعان ساڭلاق 157 695 دوللارمەن قوسا, 250 رەيتينگتىك ۇپايعا يە بولسا, جۇپتىق باسەكەدە باس جۇلدەنى ولجالاعاندارعا 54 780 دوللار تابىس ەتىلدى.
ەلىمىزدىڭ تەننيس فەدەراتسياسى اتالعان ءتۋرنيردى اسا جوعارى دەڭگەيدە وتكىزۋ ماقساتىندا قىسقا مەرزىمدە قىرۋار ءىس تىندىردى. «الماتى ارەنادا» نەگىزگى كورتتان بولەك, قوسىمشا الاڭدار دا بار. العاشقىسى 6 000, ەكىنشىسى 1 000 كورەرمەنگە ەسەپتەلگەن. كەشەننىڭ سىرتىندا ورنالاسقان ەكى كورت پەن ءۇش جاتتىعۋ الاڭىندا ەش الاڭسىز دايارلانۋعا قولايلى جاعداي جاسالدى. توسەنىشتەر حالىقارالىق ستاندارتقا ساي. «Almaty Open» ءتۋرنيرىنىڭ كورسەتىلىمى 40-تان اسا مەملەكەتكە تارادى. تەلەديداردان ونى 3 ميلليوننان اسا كورەرمەن تاماشالاسا, ءتۇرلى پلاتفورمالار ارقىلى كورۋشىلەردىڭ سانى 8,5 ميليوننان استى.
العاشىندا وسى جارىسقا قاتىسۋعا نيەت بىلدىرگەن فرانتسيالىق ارتۋر فيس پەن يتاليالىق فلاۆيو كابوللي تۋرنيرگە كەلمەدى. ەلىمىزدىڭ ءبىرىنشى راكەتكاسى الەكساندر بۋبليك تە بۇل باسەكەدە بوي كورسەتپەدى. بارلىعى دا جاراقات الىپ قالىپتى. ءتۋرنيردىڭ نەگىزگى بولىگىندە ەلىمىزدىڭ ءتورت وكىلى ونەر كورسەتتى. سوقىر جەرەبە الەكساندر شەۆچەنكو مەن ميحايل كۋكۋشكيندى العاشقى اينالىمدا جولىقتىردى. بۇل تارتىس العاشقىسىنىڭ پايداسىنا شەشىلدى. تيموفەي سكاتوۆ توماش ماحاچتان ۇتىلسا, بەيبىت جۇقاەۆ ءدال سول چەحيانىڭ ويىنشىسىن جولىنان ىعىستىردى. تۇساۋكەسەر كەزدەسۋىندە بەيبىت ليۆاندىق بەنيامين حاسساننان باسىم ءتۇستى. بىراق جەرلەستەرىمىزدىڭ ودان ارىگە شامالارى جەتپەدى. شيرەك فينالدا شەۆچەنكو (الەمنىڭ 61-راكەتكاسى) ارگەنتينالىق فرانسيسكو سەرۋندولودان (31), جۇقاەۆ (213) رەسەيلىك كارەن حاچانوۆتان (26) ۇتىلدى.
جارتىلاي فينالدىق كەزدەسۋلەر مىناداي ناتيجەمەن اياقتالدى: فرانسيسكو سەرۋندو – گابريەل دياللو (كانادا, 118) 4:6, 2:6. كارەن حاچانوۆ – الەكساندر ۆۋكيچ (اۋستراليا, 85) 6:7 (3:7), 6:3, 6:4. فينالدىق ويىن 6:2, 5:7, 6:3 ەسەبىمەن ك.حاچانوۆتىڭ پايداسىنا شەشىلدى. جۇپتىق سايىستا ءۇندىستان تەننيسشىلەرى – اردجۋن كاداحە مەن ريتۆيك ءبولليپالليدىڭ باعى جاندى.