ساياسي الاياقتار قاۋىپ ءتوندىرىپ تۇر

ينتەرنەت باسىلىمنىڭ حابارلاۋىنشا, ساياسي الاياقتار كوبىنەسە سىبايلاس جەمقورلىقپەن كۇرەسۋ نەمەسە ازاماتتاردىڭ قۇقىعىن قورعاۋ جەلەۋىمەن ارەكەت ەتەدى. بىراق ءىس جۇزىندە ولاردىڭ ۋاجدەرى قارجىلىق نەمەسە ساياسي مۇددەلەرگە نەگىزدەلگەن. مۇنداي الاياقتار قوعام سەنىمىنە ايتارلىقتاي زيان كەلتىرىپ, ناقتى مەملەكەتتىك ورگاندار مەن قوعامدىق ۇيىمداردىڭ جۇمىسىنا كەدەرگى بولادى.

سوڭعى جىلدارى ولار «زاڭ جانە ءتارتىپ» تۇجىرىمداماسىن جۇزەگە اسىرۋ تولقىنىندا ارنايى قىزمەتتەردىڭ جۇمىسىن الماستىرىپ, بەدەلىن تۇسىرۋگە ىقپال جاساپ كەلەدى.

مۇنداي اقىلعا قونىمسىز ارەكەتتىڭ مىسالى - توقبەرگەن ابيەۆتىڭ وقيعاسى. 2017 جىلى الەۋمەتتىك جەلىلەردە ساۋناداعى ماس ادام كۇش قۇرىلىمدارى قىزمەتكەرلەرىنىڭ ءبىرىن «پارا الۋىمەن» قۇتتىقتاعان ۆيدەو تاراعان. سول كەزدە ەل ازاماتتارى مەملەكەتتىك قىزمەتشىلەردى سىنعا الىپ, ۇلكەن داۋ تۋىندادى. الايدا, كەيىنىرەك بەلگىلى بولعانداي, ۆيدەوداعى ادامدار مەملەكەتتىك قىزمەتتە جۇمىس ىستەمەيتىن بولىپ شىقتى.

سونداي-اق ابيەۆ «وتاندىق باق اليانسى زاڭ جانە سوت تورەلىگى» جشس دەپ اتالاتىن جالعان ۇيىمدى باسقارعان. كەيىنىرەك ابيەۆ تە, ونىڭ باسقا سەرىكتەستەرى دە مەملەكەت پەن قوعامنان كەشىرىم سۇراعانىنا كۋا بولدىق.

الايدا, بۇل وقيعالار ابيەۆكە ساباق بولماعان كورىنەدى. 2022 جىلى ول ەلوردالىق كاسىپكەردەن 50 ميلليون تەڭگە بوپسالاعانى ءۇشىن ۇستالعان. وسىلايشا 2023 جىلى الاياق 7 جىلعا باس بوستاندىعىنان ايىرىلدى.

تاعى ءبىر مىسال - نۇربول كارىموۆ وقيعاسى. ول بيلىك پەن بيزنەس وكىلدەرىنە قىسىم جاساۋ ماقساتىندا جالعان قۇجاتتار مەن جالعان مارتەبە قولدانعان. بۇل وعان جۇرتتى بوپسالاپ, زاڭسىز اقشا مەن م ۇلىك يەمدەنۋگە مۇمكىندىك بەرگەن.

2020 جىلى كارىموۆ تاعى ءبىر الاياقتىق ارەكەتكە قاتىسقان: ول سىبايلاسىمەن بىرگە بالاباقشا مەڭگەرۋشىسىنەن اقشا تالاپ ەتەدى. سول كەزدە كارىموۆ ءوزىن ءبىلىم جانە عىلىم ۆيتسە-ءمينيسترى رەتىندە تانىستىرعان.

وسىنداي زاڭسىز ارەكەتتەرى ءۇشىن 2022 جىلى ول قاماۋعا الىنىپ, 7,5 جىلعا باس بوستاندىعىنان ايىرىلدى.

تاعى ءبىر الاياق - ارنۇر اپسەيىتوۆتىڭ ءىسى دە سۇمدىق جاعدايلاردىڭ بەتىن اشتى. ول ءوزىن «پرەزيدەنتتىڭ سىبايلاس جەمقورلىققا قارسى ءىس-قيمىل ساياساتىنا جاردەمدەسۋ ورتالىعى» توراعاسىنىڭ كەڭەسشىسى, قر قۇرمەتتى ازاماتى رەتىندە تانىستىرعان. بار بولعانى 21 جاستاعى جىگىت قانداي ەڭبەگى ءۇشىن وسىنداي «جوعارى اتاققا» يە بولعانى بەلگىسىز. ءبىر جىل بۇرىن قر سىبايلاس جەمقورلىققا قارسى ءىس-قيمىل اگەنتتىگىنىڭ الماتى قالاسى بويىنشا دەپارتامەنتى قىلمىسكەردى ۇستاپ, 2 ايعا قاماۋعا العان. كەيىن الاياق 5 جىلعا شارتتى تۇردە سوتتالدى. قازىرگى ۋاقىتتا ونىڭ ءىسى پروباتسيالىق باقىلاۋعا الىنعان.

سونداي-اق كەيبىر دەرەكتەر بويىنشا, 2022 جىلدىڭ مامىر ايىندا ءوزىن جاستار ىستەرى جونىندەگى سەناتور رەتىندە تانىستىرعان اپسەيىتوۆ «Evergreen» جشس جوبا جەتەكشىسىنەن الاياقتىق جولمەن 20 ميلليون تەڭگە العان.

اپسەيىتوۆ سونداي-اق ءىس جۇزىندە جوق, ويدان شىعارىلعان مەملەكەتتىك ناگرادالاردى دا تاپسىرۋەن اينالىسقان. وتىرىك مەدالدار بقو كاسىپكەرى مارات قايىرعاليەۆتىڭ اتىنان بەرىلگەن.

ول الماتىدا وتكەن «Be Woman» ورتالىق ازيا فورۋمىنىڭ ساحناسىنا شىعىپ, پرەزيدەنت جانىنداعى كوميسسيا اتىنان ءسوز سويلەپ, فورۋمنىڭ قۇرىلتايشىسى جاننا كانعا «ەكونوميكالىق ۇلەسى مەن دامۋى ءۇشىن, سونداي-اق قر پرەزيدەنتى ق.ك. توقاەۆتىڭ ساياساتىن ىسكە اسىرعانى ءۇشىن» مەدالىن تابىستاعان.

اتالعان جاعدايلار ساياسي الاياقتاردىڭ قالاي ەل سەنىمىنە كىرىپ, وڭاي ولجاعا كەنەلۋىن, مەملەكەتتىگىمىزگە قاۋىپ توندىرەتىنىن ايشىقتاپ بەرەدى. ارينە, مۇنداي ارەكەتتەر جاۋاپسىز قالماۋى جانە قايتالانباۋى كەرەك. مۇددەلى مەملەكەتتىك ورگاندار, ەڭ الدىمەن ادىلەت مينيسترلىگى وسى جاعداي بويىنشا جاعدايدى باقىلاۋعا الىپ, تۇسىنىكتەمە بەرۋى قاجەت.سەبەبى مۇنداي وقيعالار بيلىكتىڭ بارلىق تارماعىنا زيان كەلتىرەدى.