قازاقستاندا كامەلەتكە تولماعانداردىڭ ىستەرى جانە ولاردىڭ قۇقىقتارىن قورعاۋ جونىندەگى كوميسسيالار بەلسەندى جۇمىس جۇرگىزىپ جاتىر. وسى جىلدىڭ توعىز ايىندا 30 مىڭنان استام بالاعا كوميسسيا جۇمىسى اياسىندا قاجەتتى كومەك كورسەتىلگەن. قولداۋ ءبىلىم الۋعا قولجەتىمدىلىكتى, پسيحولوگيالىق, قۇقىقتىق جانە الەۋمەتتىك كومەكتى, سونداي-اق وڭالتۋ ءىس-شارالارىن قامتىدى, دەپ حابارلايدى Egemen.kz وقۋ-اعارتۋ مينيسترلىگىنىڭ ءباسپاسوز قىزمەتىنە سىلتەمە جاساپ.
مينيسترلىكتىڭ حابارلاۋىنشا, بۇگىنگى تاڭدا ەلىمىزدە بالا قۇقىعى بۇزىلۋىنىڭ الدىن الۋ جانە ولارعا كومەك كورسەتۋ بويىنشا مەملەكەتتىك ورگاندار مەن ۇيىمداردى ۇيلەستىرۋدە نەگىزگى ءرول اتقاراتىن 235 كوميسسيا قىزمەت ەتەدى. ال ولاردىڭ جۇمىس تيىمدىلىگىن ارتتىرۋ ءۇشىن 2024 جىلى نورماتيۆتىك-قۇقىقتىق بازاعا ەلەۋلى وزگەرىستەر ەنگىزۋ جوسپارلانعان. ونىڭ ىشىندە جاعدايدى باسقارۋ (كەيس-مەنەدجمەنت) جانە مەديتسينالىق-الەۋمەتتىك ەسەپكە الۋ مودەلىن ەنگىزۋ بار.
«وتباسىن قولداۋ ورتالىقتارىمەن ءوزارا ءىس-قيمىلعا ەرەكشە نازار اۋدارىلاتىن بولادى. بۇل قيىن ومىرلىك جاعدايلارداعى بالالاردى جانە ولاردىڭ وتباسىلارىن كەشەندى سۇيەمەلدەۋدى قامتاماسىز ەتۋگە مۇمكىندىك بەرەدى. سونداي-اق, وبلىستىق, قالالىق جانە اۋداندىق كوميسسيالار اراسىنداعى ءوزارا ارەكەتتەسۋى ناقتى اجىراتىلاتىن بولادى. بۇل بالالاردىڭ قۇقىقتارىن قورعاۋ جۇيەسىنىڭ جالپى تيىمدىلىگىن ارتتىرادى جانە مەملەكەتتىك باسقارۋ دەڭگەيلەرى اراسىنداعى ءىس-قيمىلداردى ۇيلەستىرۋدى جاقسارتىپ, مۇقتاج بالالارعا كومەك كورسەتۋدى ايتارلىقتاي جىلدامداتادى», دەپ اتاپ ءوتتى قر وقۋ-اعارتۋ مينيسترلىگى بالالاردىڭ قۇقىقتارىن قورعاۋ كوميتەتىنىڭ ءتورايىمى ناسىمجان وسپانوۆا.
ۆەدومستۆو اتالعان شارالار بالالاردىڭ قۇقىقتارىن قورعاۋ جۇيەسىن نىعايتۋعا جانە ومىرلىك قيىن جاعدايعا تاپ بولعان ءاربىر بالاعا ۋاقتىلى, ساپالى كومەكتى قامتاماسىز ەتۋگە باعىتتالعانىن اتاپ ءوتتى.