استانادا «Connected – 2024» حالىقارالىق كونفەرەنتسياسى ءوتىپ جاتىر. ءىس-شارانىڭ سالتاناتتى اشىلۋىندا پرەمەر-ءمينيستردىڭ ورىنباسارى تامارا دۇيسەنوۆا ءسوز سويلەپ, پرەزيدەنت قاسىم-جومارت توقاەۆتىڭ قۇتتىقتاۋ حاتىن جەتكىزدى.
مەملەكەت باسشىسى «Connected – 2024» – شىعارماشىلىق يدەيالاردى تالقىلاۋعا, بولاشاقتى بولجاۋعا, سونداي-اق وزىق ءبىلىم مەن تاجىريبە الماسۋعا باعىتتالعان بىرەگەي جوبا ەكەنىن اتاپ ءوتتى.
«قازاقستان شەتەلدىڭ بەدەلدى جوعارى وقۋ ورىندارىمەن بىرلەسە وتىرىپ, اكادەميالىق حاب قۇرۋ جولىندا بەلسەندى جۇمىس جۇرگىزىپ كەلەدى. ءبىز ەلىمىزدىڭ عىلىمي-يننوۆاتسيالىق الەۋەتىن ارتتىرۋ ءۇشىن بەرىك نەگىز قالىپتاستىرىپ جاتىرمىز. «Connected – 2024» كونفەرەنتسياسى وسى ماقساتقا جەتۋگە سەپتىگىن تيگىزەدى. بۇگىنگى باسقوسۋ عالىمدار مەن ساراپشىلاردىڭ حالىقارالىق بايلانىسىن بەكەمدەۋگە, ءبىلىم بەرۋ جانە ادام كاپيتالىن دامىتۋ سالاسىنا تىڭ تاسىلدەر ەنگىزۋگە جول اشادى دەپ سەنەمىن», دەلىنگەن مەملەكەت باسشىسىنىڭ حاتىندا.
ەكى كۇنگە جوسپارلانعان ءىس-شاراعا 20-دان اسا ەلدەن 1,5 مىڭعا جۋىق دەلەگات, سونداي-اق 100-دەن اسا بەلگىلى عالىمدار مەن الەمنىڭ جەتەكشى ۋنيۆەرسيتەتتەرىنىڭ وكىلدەرى قاتىسادى. كونفەرەنتسيا اياسىندا ءبىلىم مەن عىلىمدى دامىتۋ جونىندەگى شەشىمدەر ۇسىنىلىپ, تالقىلاناتىن بولادى.
ت.دۇيسەنوۆا مەملەكەت باسشىسىنىڭ تاپسىرماسىنا سايكەس, الەمنىڭ الدىڭعى قاتارلى 23 جوعارى وقۋ ورنىنىڭ فيليالدارى ەلىمىزدە جۇمىسىن باستاعانىن اتاپ ءوتتى. ۆيتسە-پرەمەر ستراتەگيالىق ارىپتەستەرگە ۇكىمەت اتىنان العىس ءبىلدىرىپ, بۇل قادامنىڭ نەگىزگى ماقساتى تۋرالى ايتتى.
«بىرىنشىدەن, حالىقارالىق ستاندارتتارعا ساي وقۋ باعدارلاماسىن مەڭگەرگەن, ەڭبەك نارىعى سۇرانىسىنا يە جوعارى بىلىكتى كادرلاردى دايىنداۋ, ەكىنشىدەن, وقۋ باعدارلامالارى جانە وقىتۋ تەحنولوگيالارىنىڭ وزىق ۇلگىلەرىن ترانسفەرتتەۋ, ۇشىنشىدەن, عىلىم مەن يننوۆاتسيالاردى دامىتۋ ماقساتى تۇر. «جۇمىلا كوتەرگەن جۇك جەڭىل» دەگەن ءسوز بار. ءوزارا ءتيىمدى جۇمىس ىستەپ, الدىمىزعا قويعان ماقساتىمىزعا بىرگە جەتەمىز دەپ سانايمىن», دەدى ت.دۇيسەنوۆا.