بۇگىندە ۆەنەتسيا بيەننالەسىندە ۇسىنىلىپ جاتقان ەلىمىزدىڭ ۇلتتىق پاۆيلونى كورمەگە كەلۋشىلەردىڭ نازارىن اۋداردى. «Jerūiyq: كوكجيەكتەن تىس كوزقاراس» اتتى قازاقستان پاۆيلونىنا حالىقارالىق سىنشىلار دا جاقسى پىكىر ءبىلدىرىپتى. جالپى, كورمە اشىلعاننان بەرى ميفتىك اڭىزدىڭ زاماناۋي ۇلگىسىن كورسەتكەن ەكسپوزيتسيا بيەننالەگە قاتىسۋشىلار مەن قوناقتار اراسىندا كوپ تالقىعا تۇسكەن ەدى.
ەلىمىزدىڭ ۇلتتىق پاۆيلونى مادەنيەت جانە اقپارات مينيسترلىگىنىڭ قولداۋىمەن العاش رەت بەدەلدى كورمەدە ۇسىنىلىپ وتىر. ونىڭ كوميسسارى – مادەنيەت جانە اقپارات ءمينيسترى ايدا بالاەۆا.
«Jerūiyq» (جەرۇيىق) ميفتىك جەر تۋرالى ەجەلگى اڭىزدىڭ زاماناۋي ينتەرپرەتيتسياسى كورمەگە كەلۋشىلەردى تاڭعالدىرعانى راس. «شەتەلدىكتەر بارلىق جەردە» اتتى كەزەكتى ۆەنەتسيا ونەر بيەننالەسىنە 90 ەلدىڭ سۋرەتشىلەرى قاتىسىپ وتىر. كورمەنىڭ نەگىزگى تۇجىرىمداماسى كوشى-قون, مادەني پليۋراليزم ماسەلەلەرىن جانە جاھاندىق وڭتۇستىك ەلدەردەن كەلگەن مودەرنيستىك سۋرەتشىلەردىڭ ەسىمدەرىن قايتادان تانىستىرادى.
«Jerūiyq» – بۇگىنگە دەيىن اۋىزدان-اۋىزعا تاراپ, ۇرپاقتان-ۇرپاققا جەتكەن قازاق اڭىزى بويىنشا «قۇتتى مەكەندى» ىزدەۋ. ەكسپوزيتسيادا فۋتۋريستىك كوكجيەكتەر مەن قازىرگى پورتالدان بولەك ولشەمگە دەيىنگى قيال الەمى ۇسىنىلعان. قازاق سۋرەتشىلەرىنىڭ تۋىندىلارى تاقىرىپتى بىرنەشە بۋىن تۇرعىسىنان كورسەتۋ ءۇشىن مۇقيات ىرىكتەلىپ الىنعان: حح عاسىردىڭ 70-80-90 جىلدارىندا قالاي قابىلدانعانى, ونى جاڭا مەديامەن جۇمىس ىستەيتىن زاماناۋي سۋرەتشىلەر قايتادان باستان كەشىرگەنى كورىنەدى.
«قازاقستانعا ءوز ونەرىن كورسەتۋ وتە ماڭىزدى. تاريح پەن قازىرگى زاماندى ۇشتاستىرۋ يدەياسى مەن تۇجىرىمداماسى قىزىقتى جانە ماعان ۇنادى», دەدى گەرمانيالىق ارت-سىنشى ءارى سۋرەتشى ۆالەريا ابەنتروت.
قازاقستان پاۆيلونىن كوپشىلىك جىلى قابىلدادى. وعان پاۆيلوننىڭ بىرەگەي تۇجىرىمداماسى مەن سۋرەتشىلەردىڭ ۇرپاقتار ساباقتاستىعى بايقالاتىن ەرەكشە جۇمىستارى سەپ بولدى. ماسەلەن, وتكەن ونجىلدىقتى بەينەلەيتىن كاميل مۋللاشەۆ پەن ەربولات تولەپبايدىڭ جۇمىستارى, ساكەن نارىنوۆ پەن سەرگەي ماسلوۆتىڭ زاماناۋي ديالوگى قازاق ونەرىنىڭ مودەرنيزمنەن جاڭا مەدياعا دەيىنگى ەۆوليۋتسياسىن كورسەتەدى.
اسىرەسە «The2vvo» سۋرەتشىلەر توبىنىڭ «قاتىسۋ» ساۋند-ينستاللياتسياسى مەن انۆار مۇسىرەپوۆتىڭ «الاستاۋ» بەينە-ەسسەسى سياقتى ءداستۇردى جاڭا مەديامەن ۇيلەستىرەتىن جۇمىستار كوپشىلىكتىڭ نازارىن اۋدارتتى.
«بىرىنشىدەن, ماعان قاتتى اسەر ەتكەن دۇنيە – سىزدەر اتا-بابانىڭ داڭقتى ءداستۇرىن جالعاستىرىپ, سونىمەن بىرگە ونى قازىرگى زامانمەن ۇشتاستىرا الاتىندارىڭىز. وتكەن مەن بولاشاقتى ۇيلەستىرە وتىرىپ, العا ۇمتىلىپ جاتىرسىزدار. مۇنىڭ ناتيجەسى كەرەمەت بولادى. بۇل – ۇلكەن جەتىستىك, ويتكەنى باتىسقا جەتپەيتىنى – وسى», دەدى مىسىر مەن سولتۇستىك افريكاداعى يتاليالىق راديوتەلەۆيزيا بيۋروسىنىڭ جەتەكشىسى مارك يننارو.
ءداستۇرلى قازاق يىرىمدەرى مەن زاماناۋي كوركەمدىك تاجىريبەلەردىڭ ەرەكشە ۇيلەسىمى سىنشىلاردىڭ عانا ەمەس, جالپى جۇرتشىلىقتىڭ قىزىعۋشىلىعىن تۋدىردى. پاۆيلون جۇمىس ىستەگەن كۇندەرى كەلۋشىلەر سانى ارتىپ, جوبانى تالقىلاپ, پىكىر بىلدىرگەندەردىڭ دە قاراسى كوپ بولدى.
ايتا كەتەيىك, وتاندىق سۋرەتشىلەردىڭ ونەر كورمەسىنە قاتىسۋى «ViledFashion» جشس باس دەمەۋشىسىنىڭ, «Qazaq oil» جشس, «Universal Energy Kazakhstan» جشس قولداۋىمەن ۇيىمداستىرىلدى.
«Navale» مۇراجايىنىڭ تاريحي عيماراتىندا ءوتىپ جاتقان 60-شى ۆەنەتسيا ونەر بيەننالەسى 24 قاراشاعا دەيىن جالعاسادى.
ەسكە سالساق, حالىقارالىق ونەر كورمەسى العاش رەت 1895 جىلى ۆەنەتسيادا ءوتىپ, بىردەن ونەر الەمىندەگى باستى وقيعالاردىڭ بىرىنە اينالدى. ەكى جىلدا ءبىر رەت وتكىزىلەتىن بيەننالەگە جارتى ميلليونعا جۋىق ادام قاتىسادى.