سولتۇستىك قازاقستان وبلىسىنىڭ پوليتسەيلەرى ءتورت كۇن ىشىندە وبلىس جولدارىندا 23 ماس جۇرگىزۋشىنى انىقتاعان, دەپ حابارلايدى Egemen.kz Polisia.kz-كە سىلتەمە جاساپ.
14 قازاننان باستاپ وبلىس اۋماعىندا «ماس جۇرگىزۋشى» ءجپىش وتكىزىلىپ جاتىر. وعان 400-گە جۋىق پاترۋلدىك پوليتسيانىڭ, ۋچاسكەلىك پوليتسيا ينسپەكتورى جانە وزگە دە پوليتسيا قىزمەتتەرىنىڭ قىزمەتكەرلەرى قاتىسىپ جاتىر.
«جول قاۋىپسىزدىگىن نىعايتۋ بويىنشا كۇشەيتىلگەن جۇمىستىڭ تۇبەگەيلى ماڭىزى بار. وتكەن جىلمەن سالىستىرعاندا وڭ وزگەرىسكە قول جەتكىزىلدى. وتكەن جىلى 9 ايدا ماس جۇرگىزۋشىلەردىڭ كىناسىنەن 18 جول-كولىك وقيعاسى تىركەلىپ, وندا 5 ادام قازا تاۋىپ, 25 ادام جاراقات الدى. جىل باسىنان باستاپ ماس اۆتوكولىك جۇرگىزۋشىلەرى 13 جول-كولىك وقيعاسىنىڭ سەبەپكەرى بولدى, وندا 16 ادام جاراقات الدى», دەدى سقو پد جپق باسقارماسىنىڭ باستىعى الىبەك عابدۋللين.
4 كۇن ىشىندە وبلىس جولدارىندا ماس كۇيىندە 23 جۇرگىزۋشى ۇستالدى. بارلىعى 1295 ءتۇرلى جول قوزعالىسى ەرەجەلەرىن بۇزۋ انىقتالدى, ونىڭ ىشىندە جىلدامدىقتى اسىرۋدىڭ 148 فاكتىسى جانە جاياۋ جۇرگىنشىلەرگە كولىك قوزعالىسىنا ارتىقشىلىق بەرمەۋدىڭ 37 جاعدايى انىقتالدى.