«سامۇرىق-قازىنا» بىرىڭعاي قايىرىمدىلىق وپەراتورى «Samruk-Kazyna Trust» كق ارقىلى بيىلعى 9 ايدا كومەك العان بالا سانى وسىنداي بولىپ وتىر.
«باقىتتى بالالىق شاقتى قامتاماسىز ەتۋ – ءبىزدىڭ, ەرەسەكتەردىڭ باستى مىندەتى. وسى ورايدا, مىنە, بىرنەشە جىل بويى قورىمىز بالالاردىڭ سەنىمدى سەرىگىنە اينالعانىن ايتقىم كەلەدى. اسىرەسە ەرەكشە بالالارعا قوعامدا تەڭ مۇمكىندىك جاساۋ قاجەت», دەيدى «Samruk-Kazyna Trust» كق باس ديرەكتورى الفيا اديەۆا.
ماسەلەن, قور وسى جىلى بالالاردى قورعاۋ كۇنى «Samruk Charity Marathon» قايىرىمدىلىق مارافونىندا كراۋدفاندينگ ءتاسىلىن قولدانۋ ارقىلى 1000-عا تارتا ازامات پەن 30-دان استام كومپانيادان 126,7 ملن تەڭگە جيناي الدى. ناتيجەسىندە, جاڭا وقۋ جىلى ەلوردانىڭ 5 بىردەي مەكتەبىندە ينكليۋزيانى قولداۋ كابينەتتەرى اشىلىپ, 150-دەن استام ەرەكشە بالا قاتارلاستارىمەن بىرگە مەكتەپتە وقىپ جاتىر. قور باسشىلىعى قوعام مەن بيزنەس وكىلدەرىن الداعى ۋاقىتتا دا وسىنداي باستامالارعا بەلسەندى ءۇن قوسۋعا شاقىرادى.
بۇدان بولەك, قور قولداۋىمەن, «سالاماتتى قازاقستان» مەديتسينالىق پويىزىنىڭ جۇمىسى اياسىندا وڭىرلەردە 14 مىڭنان استام جەتكىنشەككە جوعارى بىلىكتى دارىگەرلەر تەگىن ءارى ساپالى قىزمەت كورسەتسە, سانى 40-تان اسقان وڭالتۋ ورتالىعى دا مۇگەدەكتىگى بار بالالار مەن ولاردىڭ اتا-انالارىنا تۇراقتى قولۇشىن سوزىپ كەلەدى. جاز بويى تانىمدىق, ساياحات لاگەرلەرى جۇمىس ىستەپ, وسكەلەڭ ۇرپاققا قاجەت ءبىلىم, مەديتسينا, بۇقارالىق سپورت, مادەنيەت سالاسىنداعى وزگە دە جوبالار جالعاسىن تاۋىپ وتىر.