رەسپۋبليكالىق ەكولوگيالىق «تازا قازاقستان» ناۋقانى شەڭبەرىندە جولشىلار 40 نىساندى تازالاپ, اباتتاندىرۋ جۇمىستارىن جۇرگىزدى, دەپ حابارلايدى Egemen.kz قر كولىك مينيسترلىگىنە سىلتەمە جاساپ.
اتالعان اكتسيا تاريحي-مادەني ەسكەرتكىشتەردى, شولۋ الاڭدارىن, كەمپينگتەر مەن جول بويىنداعى قىزمەت كورسەتۋ نىساندارىن قامتىدى. ءسوز ەتىلگەن نىسانداردا قوقىستاردى جيناۋ, اۋماقتاردى تازارتۋ جانە ينفراقۇرىلىمدى كۇتىپ-ۇستاۋ جۇمىستارى اتقارىلدى.
رەسپۋبليكالىق ناۋقانعا «قازاۆتوجول» ۇك» اق جانە «جول اكتيۆتەرى ساپاسىنىڭ ۇلتتىق ورتالىعى» شجق رمك قىزمەتكەرلەرى, سونداي-اق ولاردىڭ وڭىرلەردەگى فيليالدارىنىڭ قىزمەتكەرلەرى قاتىستى.
ەلىمىزدىڭ ءار ايماعىندا تازالاۋ جۇمىستارىن جۇرگىزۋ ءۇشىن بىرنەشە نىسان تاڭدالدى. ماسەلەن, اقتوبە وبلىسىندا جول قىزمەتكەرلەرى «اتىراۋ – اقتوبە» اۆتوموبيل جولىنىڭ بويىندا ورنالاسقان ەسەت باتىر ەسكەرتكىشى ماڭىنداعى اۋماقتى تازارتۋ بويىنشا سەنبىلىك وتكىزدى.
تۇركىستان وبلىسىندا جولشىلار ماقتاارال اۋدانىنداعى الپامىس باتىر ەسكەرتكىشىن اباتتاندىردى. سولتۇستىك قازاقستان وبلىسىندا «استانا – پەتروپاۆل» اۆتوجولىندا ورنالاسقان «س – 80 تراكتورى» ارحيتەكتۋرالىق نىسانى رەتكە كەلتىرىلىپ, شىعىس قازاقستان وبلىسىندا قازاقتىڭ تۇڭعىش اسكەري ۇشقىشى جاقىپبەك مالدىباەۆتىڭ ەسكەرتكىشى ايماعىندا سەنبىلىك وتكىزىلدى.