بەرەكەلى بيزنەس ۇيىتقىسى

ءبىر جاقسىسى, شيكىزاتقا قاجەتتى ءسۇتتى الىستان ىزدەمەيدى. ءوزىنىڭ ساۋىن سيىرلارى بار. الەۋمەتتىك جەلىدەن وقىپ بىلگەن سوڭ, ارنايى قۇرىلعى ساتىپ العان. اۋىلدى قاق جارىپ يمانتاۋ, شالقار كۋرورتتى ولكەسىنە وتەتىن تاسجولدىڭ بويىنان وكپەك جولاۋشىنىڭ ءىزى سۋىمايدى. دايىن بالمۇزداق ساتاتىن كىشكەنتاي دۇڭگىرشەگىن قارا جولدىڭ بويىنا, كولىك توقتاۋعا قولايى جەرگە ورناتقان. تۇپ-تۋرا ءوز ءۇيىنىڭ الدىنا. جاز بويى اعىلعان جۇرت اۋىلدا دايىندالعان ءدامى ءتىل ۇيىرەتىن بالمۇزداققا ءوش. كاسىبى دە ءجۇرىپ, ازىن-اۋلاق قاراجاتتىڭ باسىن قۇراپ الىپتى.

– حالىق بالمۇزداقتى قارا قار­عانىڭ ميى قاينايتىن ىستىقتا الادى, – دەيدى ەربولدىڭ ءوزى, – قالعان ۋاقىتتا دا قاراپ وتىرماۋ كەرەك قوي. وسى ورايدا مەملەكەتتىڭ قامقورلىعىنا ەرەكشە توقتالىپ, ايتا كەتۋىم كەرەك. «ەڭبەك» مەملەكەتتىك باعدارلاماسى ارقىلى 1 ملن تەڭگە قايتارىمسىز گرانتقا يە بولدىق. وزگە تالاپكەرلەر ءتارىزدى بيزنەس جوسپار جاسادىق. ەندىگى ماقسات – مال ونىمدەرىن ۇقساتۋ.

اۋماعى اتشاپتىرىم ءۇيىنىڭ جانىنداعى ءوز وتباسى بۇرىن جەتى جىل قونىستانعان ەسكى ءۇيدى كۇردەلى جوندەۋ­دەن وتكىزىپتى. بوساعادان اتتاسىمەن-اق ۇقىپتى قولدىڭ تابى بايقالادى. مۇنتازداي تاپ-تازا, الدەنەشە بولمە. بارلىعىن ءوز قاراجاتىنا جوندەپ, جاڭعىرتقان. قۇرىلىسشىنىڭ قالا­عىنان جاڭا شىققانداي سىڭعىرلاپ تۇر. ءبىر بولمەسىنە گرانتقا بەرىلگەن قاراجاتقا العان مۇزداتقىشى, ەت تۋراعىشى قويىلىپتى. الدىنان جۇمىس ۇركىپ وتىراتىن ەڭبەكقور جىگىت ءوز مالىمەن قوسا اۋىلداعى اعايىننىڭ بورداقىسىن ساتىپ الىپ, تۇشپارا, مانتى, سامسا ءتارىزدى جارتىلاي دايىن ونىمدەر ازىرلەمەك.

– اۋىل حالقى مۇنداي تاعامداردى وزدەرى-اق جاساماي ما؟ – دەپ سۇرادىق ءبىز.

– وسى ىسكە بەل بۋاردىڭ الدىندا قابىرعامىزبەن كەڭەستىك, – دەيدى كاسىپ­كەر. – ءبىزدىڭ اۋىلدىڭ ءبىراز تۇرعىنى وبلىس ورتالىعىندا جۇمىس ىستەيدى. ەگەر قاجەتتى تاعامدى وسى جەردە دايىنداپ وتىرساق, ولارعا دا قولايلى. الدىمەن سۇراستىرىپ كورگەنبىز, ونىڭ ۇستىنە كوكشەتاۋ قالاسىنداعى بىرنەشە دۇكەنمەن الدىن الا كەلىسىمىمىز بار.

نەسى بار, ەل ىشىندەگى ەلگەزەك جىگىت­تەر قولدا بارىن كادەگە اسىرىپ جاتسا, جاقسىلىقتىڭ نىشانى ەمەس پە؟

اقمولا وبلىسى,

زەرەندى اۋدانى