باس قالانىڭ تەمىر جول قاقپاسى جىلدار وتكەن سايىن ەلوردامەن بىرگە وركەندەپ, ءوسىپ كەلەدى. جولاۋشىلارعا ءتۇرلى قىزمەت كورسەتۋ ساپاسى بۇرىنعىعا قاراعاندا ەداۋىر جاقسارعان, كەلىپ-كەتىپ جاتاتىن جولاۋشىلاردىڭ دەمالىپ, تىنىعۋلارىنا بارلىق جاعداي جاسالعان. استانانىڭ تەمىر جول ۆوكزالى بۇگىندە ەلوردانىڭ كوركىنە كورىك قوساتىن, اجارىن ايشىقتاي تۇسەتىن, توعىز جولدىڭ تورابىنا ورنالاسقان ەڭسەلى ورىن-جايدىڭ بىرىنە اينالىپ وتىر.
– جولاۋشى پويىزدارىن ءجونەلتۋ جانە قابىلداۋ استانا ستانساسى باس پاركىنىڭ ءۇش جولى ارقىلى ءتورت باعىت بويىنشا ءجۇزەگە اسىرىلادى, – دەدى استانا تەمىر جول ۆوكزالىنىڭ باستىعى قايرات مايدين بىزبەن اڭگىمەسىندە. – ءبىرىنشى باعىت – استانا – التىن شوقى بويىنشا رەسەيدىڭ وڭتۇستىك-ورال تەمىر جولىنا قوسىلادى. ەكىنشى باعىت – استانا – پەتروپاۆل, ءۇشىنشى – استانا – ق ۇلىندى, ال ءتورتىنشى باعىت – استانا – مويىنتى-ساياق ستانسالارى بويىنشا قىرعىزستان مەن قىتاي حالىق رەسپۋبليكاسىنا شىعادى. جالپى, استانا ارقىلى 76 پويىز, ونىڭ ىشىندە 58 جولاۋشىلار جانە 18 قالا ماڭىنا جۇرەتىن پويىزدار قاتىنايدى.
استانا تەمىر جول ۆوكزالىنىڭ باستىعى قايرات ءمايديننىڭ ايتۋىنشا, قازىرگى كەزدە استانا ستانساسى 52 جولاۋشىلار پويىزىن قابىلداپ, جونەلتىپ ءجۇر. ونىڭ 10-ى, ياعني بەس جۇبى – حالىقارالىق باعىتتارعا, ال 24-ءى – وبلىسارالىق باعىتتارعا قاتىنايتىن جولاۋشىلار پويىزدارى. سونىمەن قاتار, ەلوردانىڭ تەمىر جول ستانساسىنان ترانزيتتىك پويىزدار دا وتەدى. استانالىق تەمىر جول ۆوكزالى ەلىمىزدىڭ بارلىق وبلىستارى ورتالىقتارىنا, سونداي-اق تمد ەلدەرىنىڭ ماسكەۋ, مينسك, كيەۆ, برەست, سانكت-پەتەربۋرگ, سۆەردلوۆسك, بىشكەك, تاشكەنت, ومبى جانە حالىقارالىق باعىتتار بويىنشا قاتىنايتىن بەرلين, ۆارشاۆا, ءۇرىمجى قالالارىمەن دە تىعىز بايلانىستا جۇمىس ىستەيدى.
– تەمىر جول ۆوكزالىنىڭ سىيىمدىلىعى 1800 جولاۋشىعا ەسەپتەلگەن, – دەدى ۆوكزال باستىعى ءارى قاراي. – پويىزداردان ءتۇسكەن جانە پويىزدارعا وتىراتىن جولاۋشىلارعا ارنايى جابدىقتالعان ەكى وتىرعىزۋ پلاتفورماسى قىزمەت كورسەتەدى. جولاۋشىلارعا قولايلى جاعداي تۋعىزىپ, ولارعا سەرۆيستىك قىزمەت كورسەتۋ ماقساتىندا ۆوكزالدا ەسكالاتورلار جانە مۇگەدەكتەر ءۇشىن ليفتىلەر ورناتىلعان.
ءبىز بۇعان ۆوكزال ءىشىن جانە پەررونداردى ارالاۋ كەزىندە انىق كوز جەتكىزدىك. جارنامالىق قۇرالدار, جولاۋشىلارعا قاجەتتى اقپاراتتار, تەلەمونيتورلار, تاعى باسقالار جەتكىلىكتى. ديكتور قايسى پويىزدىڭ كەلگەنىن, قاشان ءجۇرەتىنىن, ولاردىڭ قايسى جولعا توقتايتىنىن قازاق جانە ورىس ءتىلدەرىندە ءجيى-ءجيى حابارلاپ تۇرادى. ۆوكزال عيماراتتارىندا توعىز اقپاراتتىق ستەند ورناتىلعان. ونىڭ ۇشەۋىندە جولاۋشىلار پويىزدارىنىڭ كەستەسى, التاۋىندا اقپاراتتىق ەرەجەلەر كورسەتىلگەن.
– جول ءجۇرۋ قۇجاتتارى (بيلەتتەر) “جولاۋشى تاسىمالى” اق-تىڭ 19 بيلەت كاسسالارى ارقىلى ساتىلادى, – دەدى قايرات مايدين بيلەت ساتاتىن كاسسالار زالىنا كەلگەنىمىزدە. – بۇلاردان بولەك ۆوكزالدا جولاۋشىلار پويىزدارىنا بوس ورىننىڭ بار نەمەسە جوق ەكەنىنەن اقپارات بەرەتىن ەلەكتروندى تابلو, “105” ءنومىرلى ءبىرتۇتاس كوپارنالى “جابىق” انىقتاما بيۋروسى دا ورناتىلعان. سونىمەن قاتار, جولاۋشىلاردىڭ جول ءجۇرۋ بيلەتتەرىن ينتەرنەت ارقىلى راسىمدەۋ جەلىسى دە ەنگىزىلىپ وتىر. ولارعا بيلەتتەر كەزەكتەن تىس ساتىلادى.
بيلەت ساتاتىن جانە جولاۋشىلاردىڭ كۇتۋ زالدارىندا دا ادام سانى ەداۋىر مول كورىندى. كاسسا الدىندا كەزەكتە تۇرعان ورتا جاستاعى جىگىتتى اڭگىمەگە تارتتىق. ءوزىن قوجانازار اقبۇركىتوۆ دەپ تانىستىرعان ازاماتتان ۆوكزال قىزمەتى جونىندە سۇراعان ەدىك. “جۇمىس بابىمەن استانادان الماتىعا ءجيى بارىپ تۇرامىن, – دەدى ول. – كەلگەنىمە 10-15 مينوتتىڭ شاماسى بولدى. بيلەت ساتاتىن كاسسالاردىڭ بارلىعى جۇمىس ىستەپ تۇر. ۆوكزال قىزمەتى بۇرىنعىعا قاراعاندا جاقسارعان. كەمشىلىك, ولقىلىقتار بايقالمايدى. ەڭسەلى ەلوردانىڭ تەمىر جول قاقپاسى, ونىڭ ىشىندە تەمىر جول ۆوكزالى وسىنداي بولۋى قاجەت”.
ۆوكزال كەشەنىندە ءتورت كۇتۋ زالى, ءبىر قوناق ءۇي, ءۇش جۇك ساقتايتىن ورىنجاي, ەكى سەرۆيستىك ورتالىق, ون بانكومات, ۆاليۋتا ايىرباستايتىن پۋنكت, ءدارىحانا, نامازحانا, تاعى باسقا دا كوپتەگەن ورىندار جولاۋشىلارعا قىزمەت كورسەتىپ تۇر. سونداي-اق قوعامدىق ءتارتىپتى ساقتايتىن پوليتسيا قىزمەتكەرلەرى مەن كوشى-قون پوليتسياسى, اسكەري كومەنداتۋرا, سانيتارلىق ەپيدەميالىق ستانسا كۇندىز-ءتۇنى جۇمىس ىستەۋدە.
ۆوكزال باستىعىنان اڭگىمە بارىسىندا ۆوكزالدىڭ جولاۋشىلارعا قىزمەت كورسەتۋ ساپاسىن ارتتىرۋداعى پەرسپەكتيۆالىق جوسپارلارىن دا سۇراعان ەدىك.
– الدا تۇرعان جۇمىس جوسپارىمىز اۋقىمدى, – دەدى قايرات مايدين وسى جايىندا. – ەڭ باستىلارىن اتاپ وتەيىن, ديكتوردىڭ جۇمىس ورنىن اۆتوماتتاندىرۋ, 2011 جىلى وتەتىن قىسقى ازيا ويىندارىنا بايلانىستى ۆوكزال قىزمەتكەرلەرىنە اعىلشىن ءتىلىن ۇيرەتۋدى تەرەڭدەتۋ, انىقتاما-اقپاراتتىق جابدىقتارعا جاڭا تەحنولوگيالاردى ەنگىزۋ, تاعى باسقالار. بۇل جۇمىستاردىڭ بارلىعى جولاۋشىلارعا ساپالى قىزمەت كورسەتۋدى كوزدەيدى. ويتكەنى, ەلورداعا اتباسىن بۇرعىسى كەلەتىندەر قاتارى جىل وتكەن سايىن ەسەلەپ ارتىپ كەلەدى. ولارعا ويداعىداي قىزمەت كورسەتۋ – ءبىزدىڭ ءمىندەتىمىز.
ءاليسۇلتان قۇلانباي, سۋرەتتەردى تۇسىرگەن ورىنباي بالمۇرات.