دارىگەرلەر سالعىرتتىعى تەكسەرىلدى

2019 جىلى جەدەل جاردەم بريگاداسى دەنە قىزۋى كوتەرىلىپ, جالپى السىزدىكپەن 76 جاستاعى ايەلدى ورال قالالىق اۋرۋحاناسىنا جەتكىزگەن. دارىگەرلەر سوزىلمالى برونحيت پەن پنەۆمونيا دەگەن دياگنوز قويىپ, تەراپيا بولىمىنە جاتقىزعان. ەم ناتيجە بەرمەي, ناۋقاستىڭ جاعدايى اۋىرلاعان. كومپيۋتەرلىك توموگرافيا پلەۆريت دەگەن كۇدىكتى كورسەتكەن. 4 اپتادان كەيىن ناۋقاستىڭ جاعدايى ناشارلاۋىنا بايلانىس­تى وبلىستىق اۋرۋحاناعا جەتكىزىلىپ, سول جەردە قايتىس بولعان.

قايتىس بولعان ايەلدىڭ ۇلى دەنساۋلىق ساقتاۋ باسقارماسىنا دارىگەرلەردىڭ سالعىرتتىعى مەن ءتيىستى ەم قابىلداماعانى تۋرالى شاعىممەن جۇگىنگەن. تەكسەرۋ بارىسىندا اۋرۋحانا تاراپىنان زاڭ بۇزۋشىلىق انىقتالعان. تەكسەرۋ ماتەريالدارى باتىس قازاقستان وبلىستىق پوليتسيا دەپارتامەنتىنە جولدانىپ, قىلمىستىق ءىس قوزعالىپ, قىلمىستىق قۇقىق بۇزۋشىلىق قۇرامىنىڭ بولماۋىنا بايلانىستى بىرنەشە رەت توقتاتىلىپ, پروكۋراتۋرا كۇشىن جويعان.

دەنساۋلىق ساقتاۋ باسقارماسى قالالىق اۋرۋحا­نانىڭ قارسىلىعىن قابىلداماعاندىقتان, مار­قۇمنىڭ ۇلى اۋرۋحانادان مورالدىق شى­عىندى وتەۋ تۋرالى ورال قالاسىنىڭ №2 سوتىنا شاعىم تۇسىرگەن. ول اناسىنىڭ ولىمىنە ساپاسىز مەديتسينالىق كومەك پەن قالالىق اۋرۋحانا دارىگەرلەرىنىڭ ارەكەتسىزدىگى سەبەپ بولعانىن اتاپ وتكەن. سونداي-اق تالاپ قويۋشىنىڭ اناسى ەمدەلىپ جاتقان اۋرۋحانانىڭ تەراپيا بولىمىندە جالپى پراكتيكالىق دارىگەردىڭ كۋالىگى بار مامان جۇمىس ىستەگەنى, وعان قۇقىعى جوق ەكەنى تۋرالى فاكت انىقتالدى.

ساراپشى ناۋقاسقا ونىڭ جاسى مەن وندا بار سوزىلمالى اۋرۋلارى, سونىڭ ىشىندە, بۇيرەكتىڭ جەدەل زاقىمدانۋىن تۋدىرعان انتيبيوتيكتەر ەسكەرىلمەي, ءدارى-دارمەك تاعايىندالعانىن انىقتادى. ءتيىستى باكتەرياعا قارسى پرەپاراتتار مەن گەمودياليزدى ەنگىزۋ ناۋقاستىڭ ءومىرىن ۇزارتۋى مۇمكىن ەدى.

سوت مەديتسينالىق قۇجاتتاردى, ساراپشىلىق قورىتىندىلاردى جانە تەكسەرۋ اكتىسىن ەسكەرە وتىرىپ, دەر كەزىندە قايتالاما سىناقتار وتكىزبەۋ, ناۋقاستىڭ جاعدايىن دۇرىس باعالاماۋ, ەمدەۋدى كەش تۇزەتۋ, نەفرولوگتىڭ كەڭەسىنىڭ ۋاقىتىندا بولماۋى مەن كونسيليۋمنىڭ كەش جۇرگىزىلۋى اۋرۋدىڭ ناتيجەسىنە اسەر ەتكەنىن, ولىمگە اكەلىپ سوققانىن انىقتادى.

وسى ايتىلعانداردىڭ نەگىزىندە تالاپ قويۋ ءىشىنارا قاناعاتتاندىرىلدى: تالاپ قويۋشىنىڭ پايداسىنا اۋرۋحانادان 2 ملن تەڭگە مورالدىق شىعىن ءوندىرىلدى. شەشىم زاڭدى كۇشىنە ەنگەن جوق.