پرەمەر-ءمينيستردىڭ ورىنباسارى – ۇلتتىق ەكونوميكا ءمينيسترى نۇرلان بايبازاروۆ ەسەپتى كەزەڭدە ەكونوميكانىڭ ءوسىمى 4% -دى قۇراعانىن باياندادى. ناقتى سەكتوردا وڭ ديناميكا 5%-دى, قىزمەت كورسەتۋ سالاسىندا 3,8%-دى قۇراعان, دەپ حابارلايدى Egemen.kz ەكونوميكا مينيسترلىگىنىڭ ءباسپاسوز قىزمەتىنە سىلتەمە جاساپ.
مينيسترلىك مالىمەتىنشە, سالالار اراسىندا ەڭ جوعارى ءوسۋدى اۋىل شارۋاشىلىعى مەن قۇرىلىس سالاسى كورسەتكەن. كولىك قىزمەتى 8,0%-عا, بايلانىس 6,4%-عا, ساۋدا 6,3%-عا, وڭدەۋ ونەركاسىبى 4,8%-عا وسكەنى بەلگىلى بولدى.
«نەگىزگى كاپيتالعا سالىنعان ينۆەستيتسيالاردىڭ ءوسۋ قارقىنى 0,6%-دى قۇرادى. ينۆەستيتسيا كولەمى بايلانىستا 81,7%-عا, ءبىلىم بەرۋدە – 79,3%-عا, كولىكتە – 31,1%-عا, وڭدەۋ ونەركاسىبىندە – 6,3%-عا, دەنساۋلىق ساقتاۋدا – 4,8%-عا ءوستى», دەپ حابارلادى ۆەدومستۆونىڭ ءباسپاسوز قىزمەتى.
ال, قاڭتار-تامىز ايلارىندا ەلىمىزدىڭ سىرتقى ساۋدا اينالىمى $91,7 ملرد-تى قۇراعان. ەكسپورت $53,5 ملرد-تى, ونىڭ ىشىندە وڭدەلگەن تاۋارلاردىڭ ەكسپورتى $17,8 ملرد-تى, يمپورت $38,1 ملرد-تى قۇراعان. جالپى العاندا, قر-نىڭ وڭ ساۋدا بالانسى $15,4 ملرد-قا تەڭ انىقتالعان.سونىمەن قاتار وڭدەۋ ونەركاسىبىندە وڭ ءوسۋ قارقىنى ساقتالعانى اتاپ ءوتىلدى. ءوندىرىس كولەمى 4,8%-عا, ال تاۋ-كەن ونەركاسىبىندە 1,2%-عا وسكەن.
«بيىلعى جىلعى قاڭتار-قىركۇيەك ايلارىندا 12,4 ملن شارشى مەتر تۇرعىن ءۇي پايدالانۋعا بەرىلدى, بۇل وتكەن جىلدىڭ ءتيىستى كەزەڭىنىڭ كورسەتكىشىنەن 6,2%-عا ارتىق.اۋىل شارۋاشىلىعى ءوسۋدىڭ بەلسەندى كەزەڭىنە ءوتتى. ءداندى داقىلداردى جيناۋداعى ۇدەمەلى قارقىننىڭ ارقاسىندا سالا ءوندىرىسىنىڭ كولەمى 11,4%-عا ۇلعايدى. وسىمدىك شارۋاشىلىعىنىڭ ءوسىم 17,8%-دى قۇرادى»,دەلىنگەن حابارلامادا.
ەكونوميكا ءمينيسترىنىڭ ايتۋىنشا, ەكونوميكالىق ءوسۋدى قامتاماسىز ەتۋ ءۇشىن ورتالىق جانە جەرگىلىكتى اتقارۋشى ورگاندار مىناداي شارالارعا باسا نازار اۋدارۋى قاجەت:
يگەرۋ سومالارىن قاتاڭ باقىلاۋعا الىپ, ينۆەستيتسيالىق بيۋدجەتتەردى يگەرۋ; جىلدىڭ سوڭىنا دەيىن مۇناي ءوندىرۋدىڭ جوسپارلانعان كولەمىن ورىنداۋ; «سامرۇق-قازىنا» حولدينگى وتاندىق وندىرۋشىلەردىڭ تاۋارلارىن كومپانيا توبىمەن ساتىپ الۋىن ۇلعايتۋ; استىق جيناۋدى تولىق كولەمدە اياقتاۋ, «قازاقستان تەمىر جولى» اكتسيونەرلىك قوعامى جانە مۇددەلى مەملەكەتتىك ورگاندار استىقتى, ونىڭ ىشىندە ەكسپورتقا ۇزدىكسىز تاسىمالداۋ مەن وتكىزۋدى قامتاماسىز ەتسىن.