قازاقستاننىڭ مەكتەپتەرىندە ەرەكشە ءبىلىم بەرۋ قاجەتتىلىكتەرى بار بالالار ءۇشىن كەدەرگىسىز ورتا قالىپتاستىرىلىپ جاتىر. بۇگىنگى تاڭدا مەكتەپتەردىڭ 88%-دا ينكليۋزيۆتى ءبىلىم الۋعا جاعداي جاسالعان, دەپ حابارلايدى Egemen.kz.
وقۋ-اعارتۋ مينيسترلىگىنىڭ مالىمەتىنشە, بيىل العاش رەت پسيحولوگيالىق-پەداگوگيكالىق قولداۋدىڭ ءۇش دەڭگەيلى مودەلى ەنگىزىلگەن. سونداي-اق ەرەكشە قاجەتتىلىكتەرى بار بالالارمەن جۇمىس ىستەۋ ءۇشىن قولداۋ كورسەتۋ كابينەتتەرى مەن جەكە باعدارلامالارعا ارنالىپ جاڭا تالاپتار ازىرلەنگەن.
«قازىرگى ۋاقىتتا ءبىلىم بەرۋ مەكەمەلەرىندە 60 مىڭ بالا قاجەتتى پسيحولوگيالىق-پەداگوگيكالىق قولداۋمەن قامتىلعان. بۇل ءاربىر بالانىڭ ساپالى بىلىمگە تەڭ قول جەتكىزۋى ءۇشىن جاسالعان ماڭىزدى قادام», دەدى قر وقۋ-اعارتۋ مينيسترلىگى ينكليۋزيۆتى جانە ارنايى ءبىلىم بەرۋ دەپارتامەنتىنىڭ ديرەكتورى لاۋرا بۋتاباەۆا.
ايتا كەتەيىك, ينكليۋزيۆتى ءبىلىم بەرۋدى جۇزەگە اسىراتىن مەكتەپتەردىڭ باستى مىندەتى — ءار بالاعا جەكە قولداۋ كورسەتە وتىرىپ, بىرەگەي قابىلەتتەرىن دامىتۋعا جانە الەۋمەتتىك سىن-تەگەۋرىندەرگە توزىمدىلىك تانىتۋعا كومەكتەسۋ.