بارلىق وڭىردە سۋارۋ ماۋسىمى اياقتالدى

بيىل مينيسترلىككە قاراستى «قازسۋشار» مەكەمەسىنىڭ فيليالدارى شارۋا قوجالىقتارىمەن سۋارمالى سۋ بەرۋ جونىندە 25 مىڭعا جۋىق كەلىسىمشارت جاساسقان.

مينيسترلىك مالىمەتىنشە, تۇتىنۋ تۇرعىسىندا كوش باسىندا قىزىلوردا وبلىسى (3,7 ملرد تەكشە مەتر) تۇر. تۇركىستان ايماعىنىڭ شارۋالارى 3,4 ملرد تەكشە مەتر سۋ العان. جەتىسۋ وبلىسى ديقاندارىنا 1,37 ملرد تەكشە مەتر سۋ بەرىلسە, الماتى وبلىسىنىڭ شارۋالارى 1,57 ملرد تەكشە مەتر سۋدى پايدالانعان.

«ۇكىمەت توتەنشە جاعداي مەن سۋارمالى سۋ تاپشىلىعىنىڭ الدىن الدى. ءبىز بىلتىرعى جاعدايدان تاجىريبە جيناپ, ساباق الدىق. وسىنىڭ ناتيجەسىندە بيىل شارۋالاردى ۇزدىكسىز سۋارمالى سۋمەن قامتاماسىز ەتتىك. سۋ ديپلوماتياسى دا ماڭىزدى ءرول اتقارعانىن ايتا كەتكەن ءجون. بيىل وزبەكستان, قىرعىزستان جانە تاجىكستان ەلىمىزگە باستاپقىدا بولجانعان كولەمنەن ارتىق سۋ جىبەردى», دەدى سالا ءمينيسترى نۇرجان نۇرجىگىتوۆ.

بۇگىندە ۆەدومستۆو تاسقىن كەزەڭىنە دايىندىقتى باستادى. سولتۇستىك, باتىس, شىعىس, ورتالىق ايماقتارىنداعى سۋ قويمالارىنان سۋ جىبەرىلە باستادى. ال وڭتۇستىك وبلىستارداعى سۋ قويمالارى كەرىسىنشە, سۋ جيناۋ رەجيمىندە جۇمىس ىستەپ جاتىر.

ورتالىق ازيانىڭ مەملەكەتارالىق سۋ شارۋاشىلىعىن ۇيلەستىرۋ كوميسسياسىنىڭ كەلەسى وتىرىسىندا نارىن-سىرداريا سۋ قويمالارى كاسكادىنىڭ بولجامدى جۇمىس كەستەسى جاسالماق جانە كەلەسى جىلعا سۋ بەرۋ كولەمى بەكىتىلمەك.