وبلىس ورتالىعىنىڭ وڭتۇستىك بۇيىرىندەگى كوتتەدجدەر قالاشىعى توقشىلىقتىڭ ءيسى بۇرقىراپ تۇرعان جەر. ءزاۋى ءبىر سەبەپپەن ات باسىن بۇرعانبىز. ەجەلگى تانىس ەرمەكبايدىڭ شاڭىراعى وسى جەردە. ەرمەكباي قازىر ءتورت قۇبىلاسى تەڭەلگەن, جاڭا قازاقتىڭ ساناتىندا. ۇيىندە ەكەن. اۋماعى ات شاپتىرىم اۋلاسىندا ينە-جىپتەن جاڭا شىققان سپورت كوستيۋمىن كيىپ, قىدىرىستاپ ءجۇر. كەڭ اۋلانىڭ ءبىر بۇرىشىندا ادەمىلەپ سىرلانعان, كادىمگى ءۇي سالاتىن جۋان قاراعايلاردان بۇرالعان, توبەسى شاتىرلانعان ءيتتىڭ ۇيشىگىنە بەتتەي بەردى. كولەڭكەدە جاتقان تازى كورىنگەن. كۇدىس بەل, كەڭ ومىراۋلى, جۋان ءسىڭىرلى ءيتىم-اق ەكەن.
قازىر قالادا تۇرسا دا ساننەن قالمايتىندار بار. سوڭعى جىلدارى ەل نازارى جەتى قازىنانىڭ بىرىنە اۋىپ, تۇششىمدى تاقىرىپقا اينالعالى قولى جەتكەن جۇرت تازا قاندى توبەت, قاقپان بەل تازى ۇستاۋعا كوشكەن. ەرمەكباي دا سونداي ادامداردىڭ ءبىرى.
– اڭ قاعاسىڭ با؟ – دەپ سۇرادىق ءبىز, – اۋىزدانعان تازى ما؟
– جوعا, كۇشىك كەزىنەن بەرى بايلاۋلى تۇر.
– اپىرماي, جەلمەن جارىسقان جۇيرىك ءيتتىڭ كيەسى بار ەمەس پە؟ سايىن دالانىڭ سانىنە اينالعان قايران تازىنى قور قىلىپ شىنجىرعا بايلاپ قويعانىڭ نە؟
– ارا-تۇرا ۇيگە قوناق كەلگەندە كورسەتۋگە جاقسى, – دەپ قارق-قارق كۇلدى ەرمەكباي, – كۇشىك كەزىنەن اتتىڭ تىزەسىنە ۇيرەتۋ كەرەك دەپ ەدى اڭشىلار, وعان ات جوق. اڭعا دا شىعىپ جاتقان جوقپىن. ءسان ءۇشىن عوي, ءسان ءۇشىن. ەندى ءبىر توبەت السام با دەپ ويلانىپ ءجۇرمىن.
ءمانسىز اڭگىمەنى ءارى قاراي سوزۋدىڭ رەتى جوق ەدى. تەك ءسان قۋعاننىڭ ءجونى وسى ەكەن دەپ, جالپاق دالادا بۇلا وسكەن تازى مەن توبەتتى شىنجىرلاپ باعىپ, بوساعاعا بايلاپ, تەلمىرتىپ قويعاننىڭ نەسى جاقسى؟ ءجۇنى جىعىلىپ, كوزدەرى مولدىرەگەن, تۋمىسىندا قولتىعىن سوگىپ ءبىر جۇگىرىپ كورمەگەن قايران تازىنى وسىلاي قورلاعانى ادامشىلىققا جاتا ما؟
كوكشەتاۋ