«اۋىلدىڭ كوركى ازاماتىنان» دەيتىن ءسوزدىڭ جاتتاندى بولسا دا جانى بار. قىزىلجار اۋىلىنىڭ دامۋىنا 2,6 ملرد تەڭگە قاراجات باعىتتالىپ, كوپ-كورىم كوركەيىپ قالدى.
قارقىندى دامىپ, كوركى كەلىسە باستاعان اۋىلدىڭ سالتاناتتى رەڭى كوز قىزىقتىرارلىق. مول قاراجاتتىڭ ەسەبىنەن مەديتسينالىق ورتالىق, تىگىن تسەحى, كوپبەيىندى كەشەن سالىنىپ, اۋىل تۇرعىندارىنا قالتقىسىز قىزمەت ەتىپ تۇر. باسى اۋىرىپ, بالتىرى سىزداعاندارعا قىزمەت ەتەتىن زاماناۋي مەديتسينالىق ورتالىقتا قاجەتتى قۇرال-جابدىقتارمەن قامتاماسىز ەتىلگەن ەمدەۋ, رەنتگەن كابينەتتەرى جانە كۇندىزگى ستاتسيونار بار. ادامدار ەندى سابىلىپ الىسقا بارماي-اق, وسى جەردىڭ وزىندە ساپالى ەم قابىلداي الادى.
ال مەديتسينالىق كيىم تىگەتىن تسەحتىڭ اشىلۋى ونداعان جۇمىس ورنىن قۇرىپ, ادامداردىڭ تۇراقتى جۇمىسپەن قامتىلۋىنا ءتاپ-ءتاۋىر سەپتىگىن تيگىزىپ وتىر. ءبىر اۋىسىمدا 500 كيىمگە دەيىن تىگە الادى.
تۋعان اۋىلىنىڭ ءتۇتىنىن ءتۇزۋ ۇشىرۋعا بەل بۋا كىرىسىپ, ءبىرتالاي ىرگەلى ءىس اتقارىپ تاستاعان كاسىپكەر زاماناۋي سۋپەرماركەت, ءبىلىم جانە شىعارماشىلىق ورتالىق ورنالاسقان كەشەن سالدى. قازىر ورتالىققا 200-گە جۋىق بالا بارادى. ەل ەرتەڭى ساناتىنداعى جاسوسپىرىمدەر رۋحاني قازىنانىڭ ورتالىعىنا اينالعان كەشەندەگى بي, سپورت, كوركەمونەرپازدار ۇيىرمەلەرىنە قاتىسىپ, شاحمات, دويبى وينايدى. وسى ارادا ءدال وسىنداي قامقورلىق بار جەردەگى اۋىل بالالارىنىڭ قالا بالالارىنان سىنىق سۇيەم كەم قالماي, دامىپ, جان-جاقتى وسۋىنە مول مۇمكىندىك تۋىنداپ وتىرعاندىعىن ەكپىن ءتۇسىرىپ ايتا كەتسەك, ارتىق بولماس. وسىنداي جاعدايعا جەتۋ كاسىپكەر قامقورلىعىنىڭ ارقاسىندا مۇمكىن بولىپ وتىر.
الداعى ۋاقىتتا دا كوركى كەلىسكەن قىزىلجار اۋىلى جان-جاقتى دامىپ, كەمەلدەنە تۇسپەك. ەلدى مەكەندە فيتنەس ورتالىعى, مونشا, ساۋىقتىرۋ كەشەنى, ءدامحانا, ناۋبايحانا, مەديتسينا قىزمەتكەرلەرىنە ارنالعان كوپپاتەرلى تۇرعىن ءۇي كەشەنى سالىنىپ جاتىر. وسىنىڭ بارلىعى تولىق جۇزەگە اسقان كەزدە اۋىل جەر بەتىندەگى جۇماق ىسپەتتى ىستىق ۇياعا اينالماق. بۇل ءىستىڭ تاربيەلىك تە ءمانى بار. اۋىلعا جانى اشيتىن ازاماتتىڭ قانشالىقتى ەڭبەگىن ءسىڭىرىپ جاتقانىن كوزىمەن كورگەن جاس تولقىن دا ەرتەڭ الدىڭعى بۋىن اعالاردىڭ ىزىمەن ءجۇرىپ, دارقان دالا توسىندە وزدەرىنىڭ ونەگەلى ءىزىن سالارى ءسوزسىز.
«مەلس» سەرىكتەستىگىنىڭ باس ديرەكتورى ەرلان سۇلەيمەنوۆ الداعى ۋاقىتتا كاسىبي تەحنيكالىق كوللەدج, 150 ورىندىق بالاباقشا, جۇمىسشىلارعا ارنالعان جاتاقحانا, كينوتەاترى بار مادەنيەت ءۇيى, ۇلتتىق ناقىشتاعى قوناقۇي كەشەنىن سالماق. وسىنداي ساۋلەتتى عيماراتتار ارحيتەكتۋرالىق ۇيلەسىممەن بوي كوتەرگەن كەزدە قىزىلجار اسپانىنداعى جۇلدىزدار دا ىنتىماعى جاراسقان ىرگەلى ەلدىڭ ۇستىنە سۇيىسپەنشىلىك ساۋلەسىن قۇيىپ تۇرارى داۋسىز.
كاسىپكەر دارىلىك پرەپاراتتاردى قايتا وڭدەيتىن فابريكا قۇرىلىسىن باستاۋدى دا جوسپارلاپ قويعان. ويعا العان شارۋاسى وڭىنان وڭعارىلسا, اۋىلدا قانشاما جۇمىس ورنى اشىلىپ, الەۋمەتتىك-تۇرمىستىق جاعداي وڭالا تۇسپەك. اۋىل ينفراقۇرىلىمىن ودان ءارى دامىتۋ ماقساتىندا بەس ساتىلى تازارتۋمەن كارىز-تازارتۋ قۇرىلىستارى دا قولعا الىنباق. وسىلايشا, تىرەك اۋىلداردىڭ بىرىنە اينالعان قىزىلجار بولاشاق كەڭىستىگىنە ەركىن ەنەتىن ەڭسەلى ەلدىڭ قاتارىنا كىرەدى. وسىنىڭ بارلىعى ەل يگىلىگىنە اينالىپ جاتقان ينۆەستيتسيانىڭ سىباعاسى.
اقمولا وبلىسى,
تسەلينوگراد اۋدانى