تۋريزم جانە سپورت ءمينيسترى ەربول مىرزابوسىنوۆ بۋداپەشتكە ساپارى اياسىندا قول جەتكىزىلگەن جاعىمدى جاڭالىقتاردى الەۋمەتتىك جەلى ارقىلى ءبولىستى, دەپ جازادى Egemen.kz.
ءمينيستردىڭ حابارلاۋىنشا, 2027 جىلى دزيۋدودان الەم چەمپيوناتى قازاقستاندا وتەدى. ەربول مىرزابوسىنوۆ بۇل ايتۋلى وقيعا لوس اندجەلەس وليمپياداسىنىڭ الدىندا سپورتشىلارىمىزعا ۇلكەن مۇمكىندىك سىيلايتىنىن ايتتى.
«بۋداپەشتتەگى ساپارىمدا حالىقارالىق دزيۋدو فەدەراتسياسىنىڭ (IJF) پرەزيدەنتى ماريۋس ۆيزەرمەن وتە ماڭىزدى كەزدەسۋ وتكىزدىم. بۇل كەزدەسۋدىڭ ناتيجەسىندە ەلىمىزدە دزيۋدونى دامىتۋ باعىتىندا بىرقاتار ماڭىزدى كەلىسىمدەرگە قول جەتكىزدىك. 2027 جىلى دزيۋدودان الەم چەمپيوناتىن قازاقستاندا وتكىزۋ بويىنشا ۋاعدالاستىق. سونىمەن قاتار, حالىقارالىق دزيۋدو فەدەراتسياسىنىڭ اكادەمياسىنىڭ وكىلدىگىن قازاقستاندا اشۋ تۋرالى كەلىسىمگە كەلدىك», دەپ جازدى تۋريزم جانە سپورت ءمينيسترى ەربول مىرزابوسىنوۆ.
بۇل باستامالار ارقىلى ەل سپورتشىلارى مەن جاتتىقتىرۋشىلارىنىڭ كاسىبي دەڭگەيىن كوتەرۋ كوزدەلگەن.