شىمكەنتتەگى جەكەمەنشىك «زەردە» مەكتەبىندە 10 وقۋشى ۋلانىپ قالدى, دەپ جازادى Egemen.kz.
قالالىق ءبىلىم باسقارماسىنىڭ مالىمدەۋىنشە, وقيعا بۇگىن, ساعات 12:25 شاماسىندا بولعان. مەكتەپتىڭ 10-سىنىپ وقۋشىسى ويناپ ءجۇرىپ ارنايى قۇتىداعى گازدى (پەرتسوۆىي باللونچيك) شاشقان. سالدارىنان وزگە وقۋشىلار ءوزىن جايسىز سەزىنگەن.
مەكتەپ اكىمشىلىگى العاشقى مەديتسينالىق كومەك كورسەتكەن سوڭ, ءبىلىم الۋشىلار جەدەل جاردەم كولىگىمەن شىمكەنت قالالىق توكسيكولوگيالىق اۋرۋحاناسىنا جەتكىزىلگەن.
«وقىس جاعدايدان كەيىن وقۋشىلار ۇيىنە قايتارىلدى. قازىر جاعداي بويىنشا تەكسەرۋ جۇمىستارى جۇرگىزىلۋدە. قازىرگى ۋاقىتتا مەكتەپ عيماراتى زارارسىزداندىرىلعان. مەكتەپتە وقۋ پروتسەسى 1 اۋىسىمدا جۇرگىزىلەتىن بولعاندىقتان, وقۋ ەرتەڭ جالعاستىرىلادى», دەلىنگەن قالالىق ءبىلىم باسقارماسى تاراتقان حابارلامادا.
تۇران اۋداندىق پوليتسيا ءبولىمى مەكتەپكە ارنايى قۇتىداعى گازدى الىپ كەلگەن وقۋشىنى تەرگەۋگە كىرىسكەن.