بۇگىن ۇكىمەت وتىرىسىندا قازاقستانداعى ورمان اۋماقتارىن ساقتاۋ جانە ۇلعايتۋ بويىنشا جۇرگىزىلىپ جاتقان جۇمىستار تالقىلاندى, دەپ جازادى Egemen.kz.
ەكولوگيا جانە تابيعي رەسۋرستار ءمينيسترى ەرلان نىسانباەۆتىڭ دەرەگىنشە, قازاقستاندا كەيىنگى 5 جىلدا ورمان القاپتارىنىڭ اۋدانى 267 مىڭ گەكتارعا ۇلعايتىلعان. سونداي-اق ورماندى قورعاۋ مەكەمەلەرىن تەحنيكامەن قامتۋ, ورمان شارۋاشىلىعى قىزمەتكەرلەرىن الەۋمەتتىك قولداۋ بويىنشا شارالار قابىلدانىپ جاتىر.
«ماسەلەن, وتكەن جىلى تەحنيكا مەن جابدىقتاردى ساتىپ الۋعا رەسپۋبليكالىق جانە جەرگىلىكتى بيۋدجەتتەردەن 15,9 ملرد تەڭگە ءبولىنىپ, 526 بىرلىك ورتكە قارسى جانە پاترۋلدىك تەحنيكا ساتىپ الىندى. بيىل ەلىمىزدىڭ ورمان شارۋاشىلىعى تاريحىندا العاش رەت 1384 بىرلىك ورتكە قارسى تەحنيكا مەن 921 بىرلىك تىركەمە جانە اسپا جابدىقتارىن ساتىپ الۋعا 52 ملرد تەڭگە, ونىڭ ىشىندە ليزينگ ەسەبىنەن – 40 ملرد تەڭگە ءبولىندى. بۇل شارالار ەلىمىزدىڭ ورتكە اسا بەيىم وڭىرلەرىندەگى ورمان قورعاۋ مەكەمەلەرىنىڭ جاراقتاندىرىلۋىن 100%-عا دەيىن جەتكىزۋگە مۇمكىندىك بەرەدى», دەدى ەرلان نىسانباەۆ.
ەلىمىزدەگى 900 مىڭ گا مەملەكەتتىك ورمان قورى ورمان ورتتەرىن ەرتە انىقتاۋ جۇيەلەرىمەن قامتىلعان. كەلەسى جىلى 3,1 ملرد تەڭگە سوماسىنا وسىنداي جۇيە «سەمەي ورمانى» رەزەرۆاتىندا ەنگىزىلەدى دەپ جوسپارلانىپ وتىر.
مينيسترلىكتەر مەن اكىمدىكتەردىڭ 12 مەكەمەسى اتالعان جۇيەنى 24 ملرد تەڭگە مولشەرىندە ليزينگتىك قارجىلاندىرۋ ەسەبىنەن ورناتادى.