شىمكەنتتە رەفەرەندۋم باستالعان كۇنى ءبىرىنشى بولىپ №6506 اسكەري ءبولىمىنىڭ 665 اسكەري قىزمەتشىسى №89 رەفەرەندۋم ۋچاسكەسىنە تاڭعى ساعات 06.00-دە بارىپ داۋىس بەردى. ودان كەيىن ساعات 07.00-دە پوليتسەيلەر مەن توتەنشە جاعدايلار قىزمەتىنىڭ وكىلدەرى العاشقى بيۋللەتەندى جاشىككە تاستادى. ولار «تۇركىستان» سارايىنداعى №231 ۋچاسكەگە بارىپ, ءوز تاڭداۋىن جاسادى.
شىمكەنتتە 18 جاسقا تولعان 660 563 تۇرعىن داۋىس بەرۋگە قۇقىلى. قالادا رەفەرەندۋم كۇنى 344 ۋچاسكە جۇمىس ىستەدى. ونىڭ 23-ءى – جابىق. ول ەرەكشە ساناتتاعى ازاماتتارعا ارنالدى.
ساياسي ماڭىزدى وقيعا كۇنى مەگاپوليستە قوعامدىق كولىكتەر تەگىن ءجۇردى. ينۆاتاكسيلەر مۇگەدەكتىگى بار ازاماتتارعا قىزمەت كورسەتتى. مەگاپوليستە ەرەكشە قىزمەتتى قاجەت ەتكەن 3 615 سايلاۋشى تىركەلدى. مۇگەدەكتىگى بار 1 512 ازاماتقا ينۆاتاكسي جۇمىلدىرىلدى. ەستۋ قابىلەتى بۇزىلعان 1 423 ادامعا سۋردواۋدارماشىلار كومەككە كەلسە, كورۋ قابىلەتى ناشار 680 تۇرعىنعا تاكتيلدى جولدار, ءبرايلدى بيۋللەتەندەر, قۇلاققاپتار قاراستىرىلدى.
رەفەرەندۋمدا «Amanat» پارتياسى شىمكەنت قالالىق فيليالىنىڭ توراعاسى ب.نارىمبەتوۆ №231 ۋچاسكەدە داۋىس بەردى. ول رەفەرەندۋم ەل ءۇشىن ماڭىزدى وقيعا ەكەنىن, ءار ادام ءوزىنىڭ قۇقىعىن پايدالانىپ, داۋىس بەرۋگە كەلۋ كەرەكتىگىن اتاپ ءوتتى.
شىمكەنت قالاسىنىڭ اكىمى عابيت سىزدىقبەكوۆ تە ءوز تاڭداۋىن جاساپ, مەملەكەتتىك ماڭىزدى ىستەن ەشبىر ادام شەت قالماۋ كەرەكتىگىن ەسكە سالدى.
وسى ماڭىزدى وقيعا بارىسىندا كوپتەگەن قىزىقتى ساتتەر ورىن الدى. ماسەلەن, كيمەشەك كيگەن اپالار داۋىس بەرۋ ۋچاسكەسىندە حالىق اندەرىن توگىلتە شىرقادى. باسىنداعى بورىك پەن ۇستىندەگى شاپانى جاراسا قونعان قاريالار ناعىز ابىز اقساقالدارعا ۇقساپ جۇرت نازارىن وزدەرىنە قاراتتى. №167 داۋىس بەرۋ ۋچاسكەسىندە قالالىق قۋىرشاق تەاترىنىڭ ارتىستەرى كەلۋشىلەردىڭ كوڭىلىن كوتەرۋ ماقساتىندا قىزىقتى كونتسەرت قويدى.
بۇل كۇنى قوعام قايراتكەرلەرى و.راحمانبەرديەۆ پەن ش.مىرزاحمەتوۆتەر داۋىس بەرۋ ۋچاسكەلەرىنە كەلىپ, ازاماتتىق تاڭداۋىن جاسادى.
«وسى رەفەرەندۋمنان سوڭ ەلدە ماڭىزدى شەشىم قابىلدانادى. ونىڭ تاعدىرى قالاي بولاتىنىن بۇگىنگى داۋىس بەرۋشىلەردىڭ بەرگەن داۋىستارى شەشەدى. رەفەرەندۋم ناتيجەسى قالاي بولعان كۇننىڭ وزىندە, ەلگە تەك پايداسى تيسە ەكەن دەپ تىلەيمىن», دەدى ش.مىرزاح- مەتوۆ.
سيدنەي وليمپياداسىنىڭ كۇمىس جۇلدەگەرى م.دىلدابەكوۆ تە داۋىس بەردى. ول ەل ءۇشىن ماڭىزدى شەشىم قابىلدانار تۇستا نەمقۇرايدىلىق تانىتۋعا بولمايتىندىعىن ءبىلدىردى. داڭقتى سپورتشى ەلىمىزدەگى وسىنداي ساياسي وقيعالار ءوزىنىڭ وتباسى ءۇشىن مەرەكە ىسپەتتى ەكەنىن اتادى.
سپورت دەمەكشى, №1 وليمپيادا رەزەرۆىن دايارلاۋ سپورت مەكتەبىندەگى رەفەرەندۋم ۋچاسكەسىندە داۋىس بەرۋشىلەرگە گىر تاسىن كوتەرۋ, اسىق اتۋ سەكىلدى ۇلتتىق ويىندار ۇيىمداستىرىلدى.
وسى كۇنى قازاقستاننىڭ كوركەم گيمناستيكادان قۇرمەتتى جاتتىقتىرۋشىسى ءاليا يۋسۋپوۆا دا حالىقپەن بىرگە ماڭىزدى شەشىم قابىلداۋ ءىس-شاراسىنا قاتىستى. ول تاعدىرشەشتى ماسەلە تۇرعاندا ەلىمىزدىڭ ءاربىر ازاماتى جەكە شارۋاسىن قويىپ وسىناۋ ساياسي وقيعانىڭ باسى-قاسىنان تابىلۋعا ءتيىس دەگەن وي ايتتى. سونداي-اق داۋىس بەرۋشىلەر قاتارىندا شىمكەنت قالالىق وپەرا جانە بالەت تەاترىنىڭ ديرەكتورى, بەلگىلى وپەرا ءانشىسى مايرا مۇحامەدقىزى دا بولدى. ول حالىقتىڭ تالقىلاۋىنا تۇسكەن ساۋالعا ءوزىنىڭ قالاۋىنداعى جاۋابىن بەرىپ, ەلدىڭ كەلەشەگى ءۇشىن دۇرىس شەشىم قابىلداۋ ماقساتىندا رەفەرەندۋم ۋچاسكەسىنە اسىعا كەلگەنىن مالىمدەدى.
جالپى, مەگاپوليستە رەفەرەندۋم ەشقانداي زاڭبۇزۋشىلىقسىز ءوتتى. بۇل ءسوزىمىزدى №269 ۋچاسكەنىڭ باقىلاۋشىسى جىبەك قاۋمەن دە قوستاپ وتىر. ونىڭ ايتۋىنشا, بەكىتىلگەن ۋچاسكەدە ەشبىر ءتارتىپ بۇزۋشىلىق ورىن الماعان. ۋچاسكەدە تىركەلگەن مۇمكىندىگى شەكتەۋلى بىرنەشە ازاماتقا داۋىس بەرگىزۋ ءۇشىن رەفەرەندۋم ۇيىمداستىرۋشىلارى ۇيىنە بارىپ قايتقان.
شىمكەنت