بيىلعى ماۋسىمداعى ەۋروكۋبوكتا ەلىمىزدىڭ جالعىز كومانداسى «استانا» عانا قالعانى بەلگىلى. ەلوردالىق كلۋب بەيسەنبىنىڭ كەشىندە ۋەفا كونفەرەنتسياسى ليگاسىنىڭ توپتىق تۋرنيرىندەگى تۇساۋكەسەر كەزدەسۋىن الماتىداعى ورتالىق ستاديوندا وتكىزدى.
اتالعان دوپ دوداسىنىڭ العاشقى كەزدەسۋىندە «استانا» سەربيانىڭ باچكا-توپولا قالاسىنان كەلگەن تستس كلۋبىمەن كۇش سىناستى. نەبارى 12 مىڭ تۇرعىنى بار شاعىن عانا شاھاردا جاساقتالعان ۇجىمنىڭ قۇرىلعانىنا 111 جىل تولسا دا, ولار تەك كەيىنگى كەزدەرى عانا ورەلى ونەرىمەن ءوز كورەرمەندەرىن قۋانتىپ ءجۇر. اتاپ ايتساق, 2013/2023 جىلدارداعى ماۋسىمدا تستس سەربيانىڭ سۋپەرليگاسىندا قولا مەدالدى يەلەنسە, بىلتىرعى چەمپيوناتتا كۇمىسكە قول سوزدى. قازىرگى كەزدە ولار 9 ويىننان كەيىن 13 ۇپاي جيناپ, جارىس كەستەسىندە 9-ورىندى قاناعات تۇتىپ تۇر. الماتىداعى ماتچقا قوس كوماندا مىناداي قۇرامدا شىقتى:
«استانا»: چوندريچ, كازۋكولوۆاس, ماروچكين, امانوۆيچ, بارتولەتس, ەبونگ, گريپشي, ۆوروگوۆسكي, توماسوۆ, چينەدۋ, كامارا.
تستس: يليچ, ستەۆانوۆيچ, دجوردجەۆيچ, پەتروۆيچ, رادين, يوۆانوۆيچ, ستانيچ, دجاكوۆاتس, چيركوۆيچ, پانتوۆيچ, بانياتس.
باسەكە الما-كەزەك شابۋىلمەن باستالدى. 15-مينۋتتا ەلوردالىق كلۋبتىڭ ويىنشىسى نازمي گريپشيدىڭ بۇرىشتامادان اۋەلەتىپ بەرگەن دوبىن يان ۆوروگوۆسكي قاعىپ الىپ, باعىتىن وزگەرتە ءبىلدى. ءدال سول مۇمكىندىكتى ۇتىمدى پايدالانعان كيپراس كازۋكولوۆاس ونى باسپەن ۇرىپ قاقپاعا سىلق ەتكىزدى. گول! 1:0 ەسەبىمەن «استانا» العا شىقتى. جىلدام سوعىلعان گولدان سەربيالىقتار تەز ەس جيدى. ءجيى شابۋىلداپ, چوندريچ قورعاعان قاقپانى بىرنەشە مارتە نىساناعا الدى. باسقاسىن ايتپاعاندا, 29-مينۋتتا ميلوش پانتوۆيچ پەن 42-مينۋتتا يفەت دجاكوۆاتستىڭ قاقىراتا تەپكەن دوپتارى ماڭدايشاعا تيگەندە, ورتالىق ستاديونعا جينالعان جانكۇيەرلەر سىلتىدەي تىندى. ابىروي بولعاندا قاقپامىز امان قالدى.
«استانانىڭ» دا ەسەپتى ەسەلەۋگە ءبىر ەمەس, بىرنەشە مۇمكىندىگى بولدى. ۋسمان كامارا ەكى رەت قاقپانىڭ ءدال الدىندا تۇرىپ, دوپتى قيسىق تەپتى. دەگەنمەن باسەكە اياقتالار تۇستا گۆينەيالىق ۆينگەر مەرگەندىك تانىتقان ەدى. بىراق كامارا ويىننان تىس قالعاندىقتان, بۇل گول ەسەپكە الىنبادى. سول ارالىقتا الەكساندر چيركوۆيچ تاعى ءبىر مارتە دوپتى ماڭدايشاعا تيگىزگەنىن دە ايتا كەتكەن ءجون. ءسويتىپ, 1:0 ەسەبى ويىننىڭ سوڭىنا دەيىن ساقتالدى. ەندى گريگوري باباياننىڭ شاكىرتتەرى كەلەسى كەزدەسۋىن 28 قازاندا سىرت الاڭدا ۋەلستىڭ تنس كلۋبىنا قارسى وتكىزەدى.