ۇلتتىق تەستىلەۋ ورتالىعىنا ازەربايجان رەسپۋبليكاسىنىڭ مەملەكەتتىك ستۋدەنتتەردى قابىلداۋ جونىندەگى كوميسسياسىنىڭ وكىلدەرى كەلدى. كەزدەسۋ بارىسىندا تاراپتار تەست تاپسىرمالارىن ازىرلەۋ جانە تەستىلەۋدى وتكىزۋ بارىسىنداعى ءوزارا قارىم-قاتىناس پەن تاجىريبە الماسۋ ماسەلەلەرىن تالقىلادى, دەپ حابارلايدى Egemen.kz. بۇل تۋرالى عىلىم جانە جوعارى ءبىلىم مينيسترلىگى رەسمي سايتىندا مالىمدەدى.
ءبىلىم بەرۋدى باعالاۋدىڭ وبەكتيۆتىلىگى مەن ساپاسىن قامتاماسىز ەتۋدىڭ نەگىزگى اسپەكتىلەرى بولىپ تابىلاتىن تەست تاپسىرمالارى مەن پەداگوگيكالىق ولشەمدەردىڭ دەرەكقورىن قالىپتاستىرۋ ماسەلەلەرىنە ەرەكشە نازار اۋدارىلدى. ۇلتتىق تەستىلەۋ ورتالىعىنىڭ ديرەكتورى بولاتبەك ابدراسيلوۆ قازاقستاندا قولدانىلاتىن وزىق ادىستەمەلەر مەن تاجىريبەلەرىن ءبولىستى. ءوز كەزەگىندە, مەملەكەتتىك ستۋدەنتتەردى قابىلداۋ جونىندەگى كوميسسيا توراعاسىنىڭ ورىنباسارى ناميك باباەۆ ازەربايجاندا قولدانىلاتىن تاسىلدەردى تانىستىرىپ, ىنتىماقتاستىقتى تەرەڭدەتۋگە نيەت ءبىلدىردى.
تالقىلاۋ بارىسىندا تاراپتار ورتاق ءتىل تاۋىپ, بىرلەسكەن جۇمىستىڭ پەرسپەكتيۆالىق باعىتتارىن تالقىلادى. مۇنداي ءوزارا قارىم-قاتىناس قازاقستاندا دا, ازەربايجاندا دا ءبىلىم بەرۋ ساپاسىن ارتتىرۋداعى ماڭىزدى قادام بولۋى مۇمكىن.
كەزدەسۋدى قورىتىندىلاي كەلە, تاراپتار ءوزارا ديالوگتى جالعاستىرۋعا جانە جوبالاردى بىرلەسىپ ازىرلەۋگە كەلىستى. قاتىسۋشىلاردىڭ ويىنشا, بۇل كەلىسىم حالىقارالىق بايلانىستاردى نىعايتىپ, ەكى ەلدىڭ ءبىلىم بەرۋ جۇيەلەرىن جەتىلدىرۋگە ەلەۋلى ۇلەسىن قوسادى.