ۇستازدار كۇنىندە مۇعالىمدەرگە گۇل سىيلاۋعا بولا ما

سوڭعى جىلدارى قازاقستاندا مەملەكەتتىك قىزمەتكەرلەرگە سىيلىق بەرۋگە شەكتەۋلەر كۇشەيتىلدى. سىبايلاس جەمقورلىققا قارسى شارالاردىڭ مۇعالىمدەرگە دە قاتىسى بار. بىراق مەكتەپ مۇعالىمدەرىنە ارنالعان سىيلىق ماسەلەسى جىل سايىن جەلىدە تالقىلانادى.

«ۇستازدار كۇنى - ۇستازداردىڭ ومىرىمىزدەگى ماڭىزدى ورنىن ەسكە تۇسىرەتىن ەرەكشە مەرەكە. بۇل ءبىزدىڭ ءبىلىم مەن تاربيەمىزگە جانىن قيعان جاندارعا العىس ايتۋ مۇمكىندىگى. گۇلدەر, جىلى لەبىزدەر - مۇنىڭ ءبارى دە نىشان. ۇستازدارىمىزعا دەگەن قۇرمەت پەن ريزاشىلىقتى بىلدىرەتىن قيمىلدار ۇرپاقتار اراسىنداعى بايلانىستى نىعايتىپ, ۇستاز ەڭبەگىنىڭ قانشالىقتى ماڭىزدى ەكەنىن كورسەتەدى», دەپ جاۋاپ بەردى وقۋ-اعارتۋ مينيسترلىگىنىڭ ءباسپاسوز قىزمەتى.

ەسكە سالا كەتەيىك, زاڭعا سايكەس, ەگەر سىيلىق قۇنى 5 اەك-تەن (18 460 تەڭگە) اسسا وندا بۇل قىلمىستىق كودەكستىڭ 247-بابى بويىنشا قىلمىستىق جاۋاپكەرشىلىككە اكەپ سوعۋى مۇمكىن. الايدا, الدىن الا كەلىسىلمەگەن, 5 اەك-كە دەيىنگى (18 460 تەڭگە) شاعىن سىيلىقتار ءۇشىن ۇستازدار قىلمىستىق كودەكستىڭ بابى بويىنشا جاۋاپكەرشىلىككە تارتىلمايدى.

بۇعان دەيىن وقۋ-اعارتۋ ءمينيسترى عاني بەيسەمباەۆ ۇستازدارعا گۇل سىيلاۋ يگى ءداستۇر ەكەنىن اتاپ وتكەن ەدى.

ء«تاتتى-تاپسەككە قاتىستى ويلانۋ كەرەك. اركىمنىڭ قالاۋى ءارتۇرلى. بىراق وقۋشىلاردان مۇعالىمنىڭ گۇل الۋى كوڭىل-كۇيدى كوتەرەتىن ءۇردىس. وقۋشىلاردىڭ مۇعالىمدەرگە قۇرمەت رەتىندە گۇل سىيلاۋى داستۇرگە اينالعان. سوندىقتان ونى دۇرىس دەپ ەسەپتەيمىن. گۇل سىيلاۋ − اركىمنىڭ ءوزىنىڭ كوڭىلى مەن نيەتىنە بايلانىستى. بىراق گۇل سىيلاۋدى مىندەتتەمەۋ كەرەك», دەدى مينيستر.