حابارسىز كەتكەن قىزىل اسكەر ساربازى الىشەر قىزىنباەۆ 1943 جىلى كۋرسك وبلىسىنىڭ بەلگورود اۋدانىندا قازا تاۋىپ, باۋىرلاستار قابىرىنە جەرلەنگەن ەكەن, دەپ حابارلايدى Egemen.kz.
قورعانىس مينيسترلىگىنىڭ ءباسپاسوز قىزمەتىنەن ءمالىم بولعانداي, ەلورداداعى قارۋلى كۇشتەردىڭ ۇلتتىق اسكەري-پاتريوتتىق ورتالىعىندا جاۋىنگەردىڭ تۋعان-تۋىستارىنا جەرلەۋ ورنىنان اكەلىنگەن ءبىر ۋىس توپىراقتى تابىستاۋ ءراسىمى ءوتتى.
مينۋتتىق ۇنسىزدىكپەن باستالعان ەسكە الۋ جيىنىنا «قارۋلى كۇشتەردىڭ ارداگەرلەرى» رقب توراعاسىنىڭ ورىنباسارى وتستاۆكاداعى گەنەرال-مايور مارات ناعۇمانوۆ, قر قورعانىس مينيسترلىگىنىڭ وكىلدەرى, اقمولا وڭىرلىك گارنيزونىنىڭ اسكەري قىزمەتشىلەرى, قازا تاپقان ساربازدىڭ تۋعان-تۋىستارى – جارقىن قىزىنباەۆا مەن باقىت مامىروۆ قاتىستى.
الىشەر قىزىنباەۆ 1903 جىلى قىزىلوردا وبلىسىندا دۇنيەگە كەلگەن. 31 جىلعى اشتىق كەزىندە ونىڭ وتباسى وزبەكستانعا كوشكەن.
تۋىسى جارقىن قىزىنباەۆانىڭ ايتۋىنشا, اعاسىن بۇحارا اۋداندىق اسكەري كوميتەتى مايدانعا شاقىرعان.
«سوعىسقا دەيىن اعامىز ۇيلەنگەن ەدى, ارتىندا ءوسىپ قالعان ۇلى بولدى. حابارسىز كەتكەنگە دەيىن تۋىستارى ودان بىرنەشە قىسقا حات الدى. دالالىق پوشتا سوڭعى حاباردى 1943 جىلى جەتكىزگەن, سودان كەيىن بايلانىس ءۇزىلدى. وسى ۋاقىتقا دەيىن ءبىز ونى ىزدەۋدى توقتاتپادىق», دەيدى ول.
ەكى جىل بۇرىن تۋىستارى ىزدەۋ سايتتارىندا دەرەكتەردى تاپقان كەزدە ءۇمىت پايدا بولعان. ىزدەۋشىلەردىڭ ارقاسىندا جاۋىنگەردىڭ رەسەيدىڭ كۋرسك وبلىسىنداعى جاپپاي قابىرگە جەرلەنگەنى انىقتالعان.
مارقۇمنىڭ تۋىستارى قورعانىس مينيسترلىگى مەن ىزدەۋشىلەرگە العىستارىن ءبىلدىردى. بۇگىندە جاۋىنگەردىڭ ۇرپاقتارى ەلىمىزدە, وزبەكستان مەن قىرعىزستاندا تۇرادى. جاقىندارىنىڭ قالاۋى بويىنشا الىشەر قىزىنباەۆتىڭ توپىراعى تۋىستارى تۇراتىن بۇحاراعا جەتكىزىلەدى.