2025 جىلدىڭ سوڭىنا دەيىن شىعىس قازاقستان وبلىسىندا ونەركاسىپ ورتالىقتارى مەن تۋريستىك نىساندارعا اپاراتىن 400 شاقىرىمعا جۋىق جول قالپىنا كەلتىرىلەدى, دەپ حابارلايدى Egemen.kz.
كولىك ءمينيسترى مارات قاراباەۆتىڭ ايتۋىنشا, بۇگىندە بارلىق وڭىردە ورتاشا جوندەۋ جۇمىستارى جۇرگىزىلەتىن جولدار انىقتالعان.
«مەملەكەت باسشىسى رەسپۋبليكا بويىنشا كەمىندە 10 مىڭ شاقىرىم جولدى قامتۋ ءۇشىن ورتاشا جوندەۋ باعدارلاماسىن كەڭەيتۋدى تاپسىردى. ساپا – باستى باسىمدىق. بارلىق وڭىردە ورتاشا جوندەۋ جۇمىستارى جۇرگىزىلەتىن جولدار انىقتالدى. مىسالى, شىعىس قازاقستان وبلىسىنداعى ونەركاسىپ ورتالىقتارىنا اپاراتىن جولدار: ياعني التايعا, شەمونايحاعا, سەرەبريانسكقا اپاراتىن جولدار جوندەلەدى. سونداي-اق مارقاكول, راحمانوۆ بۇلاعى جانە كاتونقاراعاي تۋريستىك نىساندارىنا اپاراتىن جولدار دا جوندەۋدەن وتەدى», دەدى مينيستر.
سونىمەن قاتار بيىلدان باستاپ وسكەمەن مەن سەمەي قالالارىن بايلانىستىراتىن جولعا ورتاشا جوندەۋ جۇمىستارى جۇرگىزىلىپ جاتىر. بۇل جول 2026 جىلعا دەيىن تولىق جوندەلەدى دەپ جوسپارلانعان. ماماندار قازىردىڭ وزىندە بىرقاتار ۋچاسكەنى, اتاپ ايتقاندا تاۆريچەسكوە اۋىلى مەن نوۆو-ازوۆسكوە اۋىلىنا بۇرىلىس جولدارىن جوندەپ جاتىر, قالعاندارى 2025-2026 جىلدارى قامتىلماق.
سونداي-اق كەلەسى جىلى كاتونقاراعاي اۋدانى مەن مارقاكول ءوڭىرىن بايلانىستىراتىن ەسكى اۆستريالىق جولى ورتاشا جوندەۋدەن وتەدى دەپ جوسپارلانعان.